ഭർത്താവിൽ നിന്ന് വഴക്ക് കേട്ട് ചെയ്ത വീഡിയോ ലോകമറിയുന്നതുകണ്ട് കണ്ണുനിറഞ്ഞ് ഒരു ഗ്രാമീണ അധ്യാപിക. ഉത്തർപ്രദേശിലെ കൗശാംബി സ്വദേശിയും ‘English with Dehati Madam’ എന്ന ഇൻസ്റ്റാഗ്രാം പേജിന്‍റെ ഉടമയുമായ യശോദ ലോധിയാണ് പ്രിയങ്ക ചോപ്രയടക്കമുള്ള ബോളിവുഡ് താരങ്ങളുടെ കൈയടി നേടി ഇൻസ്റ്റാഗ്രാമിൽ വൈറലാകുന്നത്.
പ്രിയങ്ക ചോപ്ര സ്വന്തം ഇൻസ്റ്റാഗ്രാം സ്റ്റോറിയിൽ യശോദയുടെ വീഡിയോ പങ്കുവെച്ചതോടെ ഇവരുടെ ഫോളോവേഴ്‌സിന്‍റെ എണ്ണം നാല് ലക്ഷം കടന്നു.
ദിവസങ്ങൾക്ക് മുൻപ് വയലിൽ ജോലി ചെയ്യുന്നതിനിടെയാണ് ഒരു പുതിയ വീഡിയോ ചിത്രീകരിക്കാൻ യശോദ തീരുമാനിച്ചത്. എന്നാൽ ജോലി തടസ്സപ്പെടുത്തി വീഡിയോ എടുക്കുന്നതിനിടെ ഭർത്താവിൽ നിന്ന് കടുത്ത വഴക്ക് കേൾക്കേണ്ടി വന്നു. എന്നാൽ പിന്മാറാൻ തയ്യാറാകാതിരുന്ന യശോദ എങ്ങനെയോ വീഡിയോ പൂർത്തിയാക്കി ഇൻസ്റ്റാഗ്രാമിൽ പോസ്റ്റ് ചെയ്യുകയായിരുന്നു.
എന്നാൽ തൊട്ടുപിന്നാലെ അവിശ്വസനീയമായ കാര്യങ്ങളാണ് സംഭവിച്ചത്. നടി പ്രിയങ്ക ചോപ്ര യശോദയുടെ പോസ്റ്റ് തന്‍റെ സ്റ്റോറിയായി പങ്കുവെച്ചു.
വീട്ടിൽ ടെലിവിഷൻ പോലുമില്ലാത്ത തനിക്ക് പല സിനിമാ താരങ്ങളെക്കുറിച്ചും വലിയ അറിവില്ലായിരുന്നുവെന്ന് യശോദ പറയുന്നു. പ്രിയങ്ക ചോപ്രയ്ക്ക് പുറമെ മൃണാൾ ഠാക്കൂർ, അഭയ് ഡിയോൾ, ആർ. മാധവൻ തുടങ്ങിയ പ്രമുഖരും തന്‍റെ ശ്രമങ്ങളെ പ്രശംസിച്ച് പോസ്റ്റുകൾ പങ്കുവെച്ചിരുന്നു. തന്‍റെ വിദ്യാർഥികൾ പറഞ്ഞപ്പോഴാണ് ഇത്രയധികം പ്രശസ്തരായ വ്യക്തികൾ തന്‍റെ അധ്വാനത്തെ അഭിനന്ദിച്ച കാര്യം യശോദ അറിയുന്നത്.
ലഭിച്ച വലിയ പ്രചാരത്തിൽ പ്രിയങ്ക ചോപ്ര അടക്കമുള്ള എല്ലാവർക്കും യശോദ നന്ദി അറിയിച്ചു. എന്നാൽ താരങ്ങളുടെ പ്രശംസയേക്കാൾ താൻ പ്രാധാന്യം നൽകുന്നത് താൻ ചെയ്യുന്ന ദൗത്യത്തിനാണെന്ന് അവർ വ്യക്തമാക്കി.
ഭാഷ അറിയാത്തതിന്‍റെ പേരിൽ ആത്മവിശ്വാസം നഷ്ടപ്പെടുന്ന ഗ്രാമീണരായ സ്ത്രീകളെയും സാധാരണക്കാരെയും ഇംഗ്ലീഷ് പഠിപ്പിക്കുകയും അവരുടെ ആത്മവിശ്വാസം വളർത്തുകയുമാണ് തന്‍റെ ലക്ഷ്യമെന്ന് അവർ പറഞ്ഞു. “നമ്മുടെ ചെറിയ ശ്രമങ്ങളെ ഒരിക്കലും നിസാരമായി കാണരുത്, നമ്മെ ആരാണ് നിരീക്ഷിക്കുന്നതെന്ന് നമുക്ക് പറയാനാകില്ല,” തന്‍റെ ആരാധകരോടായി യശോദ കൂട്ടിച്ചേർത്തു.
