ജപ്പാനിലെ ടോക്കിയോയിൽ അരങ്ങേറുന്നത് വിചിത്രമായ ഒരു മത്സരമാണ്. വേഗത്തിൽ ഉറങ്ങാനും ഏറ്റവും ഗാഢമായി ഉറങ്ങാനും കഴിയുന്നവരെ കണ്ടെത്താൻ ജപ്പാനിൽ അപൂർവ്വവും കൗതുകകരവുമായ മത്സര സംഘാടനം. ‘മാറ്റ് റെയ്‌സ്’ (Matt Race) എന്ന് പേരിട്ടിരിക്കുന്ന ഈ മത്സരത്തിൽ വിജയിയാകുന്ന വ്യക്തിക്ക് ലഭിക്കുന്നത് 20 ലക്ഷത്തിലധികം യെൻ (ഏകദേശം 12 ലക്ഷത്തോളം ഇന്ത്യൻ രൂപ) സമ്മാനമാണ്.
ടോക്കിയോ ആസ്ഥാനമായി പ്രവർത്തിക്കുന്ന ‘ക്വാല സ്ലീപ്പ് ജപ്പാൻ’ എന്ന മെത്ത നിർമ്മാണ കമ്പനിയാണ് ഈ വിചിത്രമായ മത്സരത്തിന് പിന്നിൽ. വെളിച്ചം കുറച്ച മുറിയിൽ മനോഹരമായ മെത്തകളിൽ കിടന്ന് 90 മിനിറ്റാണ് മത്സരാർഥികൾ ഉറങ്ങേണ്ടത്. എത്ര വേഗത്തിലും ആഴത്തിലും ഉറങ്ങാൻ സാധിക്കുന്നു എന്നതിന്‍റെ അടിസ്ഥാനത്തിലാണ് വിജയിയെ നിശ്ചയിക്കുന്നത്.
ഇതിനായി മത്സരാർഥികളുടെ തലയിൽ പ്രത്യേക ഉറക്ക നിരീക്ഷണ ഉപകരണങ്ങൾ (Sleep Tracking Devices) ഘടിപ്പിച്ചിരുന്നു. ചിലർ തങ്ങളുടെ പ്രിയപ്പെട്ട പാവകളെ കയ്യിൽ പിടിച്ചാണ് മെത്തയിൽ കിടന്നത്.
‘സ്വിമി’ എന്ന വിളിപ്പേരിൽ അറിയപ്പെടുന്ന വ്യക്തിയാണ് മത്സരത്തിൽ ഒന്നാം സ്ഥാനം നേടിയത്. സമ്മാനത്തുക ഉപയോഗിച്ച് വാടക വീട്ടിലേക്ക് മാറാനും ‘രാജകുമാരിമാരുടേത് പോലെയുള്ള’ ഒരു കിടക്ക വാങ്ങാനുമാണ് തന്‍റെ പ്ലാനെന്ന് വിജയി പറഞ്ഞു.
ഒരു വിനോദ പരിപാടിയായിട്ടാണ് സംഘടിപ്പിച്ചതെങ്കിലും, ജപ്പാൻ നേരിടുന്ന കടുത്ത ഉറക്കമില്ലായ്മയെന്ന പ്രശ്നത്തിലേക്ക് വെളിച്ചം വീശുകയാണ് ഈ മത്സരം.
2021ലെ OECD ഡാറ്റ പ്രകാരം, വികസിത രാജ്യങ്ങളിൽ ഏറ്റവും കുറഞ്ഞ ശരാശരി ഉറക്കം (ദിവസത്തിൽ 7 മണിക്കൂർ 24 മിനിറ്റ്) ലഭിക്കുന്നത് ജപ്പാൻകാർക്കാണ്.2025ലെ സ്ലീപ്പ് സൈക്കിൾ റിപ്പോർട്ട് അനുസരിച്ച്, ആഗോളതലത്തിൽ തന്നെ ഏറ്റവും കുറഞ്ഞ ഉറക്കനിലവാരമുള്ള രാജ്യങ്ങളിൽ ഒന്നാണ് ജപ്പാൻ.
ജോലിയിലെ കടുത്ത തൊഴിൽ സമ്മർദ്ദം, ജോലിസ്ഥലത്തേക്കുള്ള നീണ്ട യാത്രകൾ, തിരക്കുപിടിച്ച ജീവിതരീതി എന്നിവയാണ് ജനങ്ങളുടെ ഉറക്കം കെടുത്തുന്നത്. ജപ്പാനിലെ നാലിലൊരാൾ കടുത്ത ഉറക്കമില്ലായ്മ അനുഭവിക്കുന്നുണ്ടെന്നാണ് ആരോഗ്യമന്ത്രാലയത്തി
ന്‍റെ കണക്ക്. ഉറക്കത്തെക്കുറിച്ച് ആളുകളിൽ കൂടുതൽ അവബോധവും താല്പര്യവും വളർത്താനാണ് ഇത്തരമൊരു പരിപാടി സംഘടിപ്പിച്ചതെന്ന് സംഘാടകർ വ്യക്തമാക്കുന്നു.
