റോഡപകടങ്ങളിൽ സാധാരണയായി കാണാറുള്ള വഴക്കുകൾക്കും തർക്കങ്ങൾക്കും പകരം വ്യത്യസ്തമായൊരു സംഭവത്തിന്‍റെ സിസിടിവി ദൃശ്യങ്ങൾ സമൂഹമാധ്യമങ്ങളിൽ വൈറലാകുന്നു. ചെറിയൊരു കാറപകടത്തിന് പിന്നാലെ കാർ ഡ്രൈവർ പുറത്തിറങ്ങി താൻ ഇടിച്ച കാൽനടയാത്രക്കാരനെ കെട്ടിപ്പിടിച്ച് ആശ്വസിപ്പിക്കുന്ന ദൃശ്യങ്ങളാണ് പുറത്തുവന്നിരിക്കുന്നത്. ഉത്തരാഖണ്ഡ് പോലീസ് തങ്ങളുടെ ഔദ്യോഗിക എക്സ് പേജിലൂടെയാണ് ഈ വീഡിയോ പങ്കുവെച്ചത്.
റോഡ് മുറിച്ച് കടന്ന് അശ്രദ്ധമായി നടന്ന യുവാവിന്‍റെ ദേഹത്ത് ഒരു ചുവന്ന ഹാച്ച്ബാക്ക് കാർ തട്ടുകയായിരുന്നു. ഉടൻതന്നെ വണ്ടി നിർത്തിയ ഡ്രൈവർ പുറത്തിറങ്ങി വന്ന് വഴക്കിന് പകരം യുവാവിനെ കെട്ടിപ്പിടിച്ച് പരിക്കുകൾ ഒന്നുമില്ലെന്ന് ഉറപ്പുവരുത്തുകയായിരുന്നു.
തുടർന്ന് ഇരുവരും അൽപ്പനേരം സംസാരിച്ച് പിരിയുന്നതും ദൃശ്യങ്ങളിൽ വ്യക്തമാണ്.
ചെറിയ വാഹനാപകടങ്ങളിൽ ക്ഷമയും മനുഷ്യത്വവും കാണിച്ചാൽ റോഡിലെ വലിയ തർക്കങ്ങളും സംഘർഷങ്ങളും ഒഴിവാക്കാമെന്ന് ഉത്തരാഖണ്ഡ് പോലീസ് ചൂണ്ടിക്കാണിക്കുന്നു. തെറ്റ് മനസ്സിലാക്കി വഴക്കിടാതിരുന്ന ഡ്രൈവറെ പോലീസ് അഭിനന്ദിക്കുകയും ചെയ്തു.
വീഡിയോ വൈറലായതോടെ റോഡ് സുരക്ഷയെക്കുറിച്ചും റോഡ് റേജിനെക്കുറിച്ചും സോഷ്യൽ മീഡിയയിൽ വലിയ ചർച്ചകളാണ് നടക്കുന്നത്. വാഹനമോടിക്കുമ്പോൾ ഡ്രൈവർമാർ വേഗത നിയന്ത്രിക്കണമെന്നും കാൽനടയാത്രക്കാരെ ബഹുമാനിക്കണമെന്നും അഭിപ്രായങ്ങൾ ഉയരുന്നുണ്ട്. അതേസമയം, റോഡിലേക്ക് ഇറങ്ങുമ്പോൾ കാൽനടയാത്രക്കാരും ശ്രദ്ധിക്കേണ്ടതായിരുന്നു എന്ന് ചിലർ ചൂണ്ടിക്കാണിക്കുന്നു.
o
