കൊച്ചി: പാചകവാതക വിലയും പച്ചക്കറി ഉള്‍പ്പടെയുള്ള മറ്റ് അവശ്യസാധനങ്ങളുടെ വിലയും വര്‍ധിച്ചതോടെ വലഞ്ഞ് ഹോട്ടല്‍ മേഖല. കൊച്ചിയില്‍ വാണിജ്യ സിലിണ്ടറിന് കഴിഞ്ഞ മാസത്തേക്കാള്‍ 65 രൂപയാണ് വര്‍ധിച്ചത്. ഇതോടെ വില 2,828 രൂപയായി.
ഇതിനിടയിലാണ് പച്ചക്കറി വിലയിലും വര്‍ധനയുണ്ടായിരിക്കുന്നത്. മഹാരാഷ്ട്രയിലടക്കം പെയ്ത കനത്ത മഴയാണ് വില വര്‍ധനവിന് കാരണമായിട്ടുള്ളത്. വിലക്കയറ്റം പിടിച്ചുനിര്‍ത്തിയില്ലെങ്കില്‍ പ്രതിസന്ധി രൂക്ഷമാകുമെന്ന് ഹോട്ടല്‍ വ്യാപാരികള്‍ പറയുന്നു. സിലിണ്ടര്‍, പച്ചക്കറി എന്നിവയുടെ വില വര്‍ധിച്ച സാഹചര്യത്തില്‍ ഭക്ഷണത്തിനു വില കൂടുമോ എന്ന ആശങ്കയിലാണ് പൊതുജനം.
