ന്യൂഡൽഹി: തങ്ങൾ ഇന്ത്യാ മുന്നണിക്ക് എതിരല്ലെന്ന് സിജെപി സ്ഥാപകൻ അഭിജീത് ദിപ്കെ. സിജെപി ഒരു സ്വതന്ത്ര പ്രഷർ ഗ്രൂപ്പാണെന്നും അത് എപ്പോഴും അങ്ങനെതന്നെ തുടരുമെന്നും അദ്ദേഹം വ്യക്തമാക്കി. എന്നാൽ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഇന്ത്യാ മുന്നണിയും തങ്ങളും ഒരേ കാര്യത്തിന് വേണ്ടിയാണ് പോരാടുന്നതെന്നും അദ്ദേഹം പറഞ്ഞു.
തെരഞ്ഞെടുപ്പ് അട്ടിമറിക്കാൻ കൂട്ടുനിൽക്കുന്ന ഗ്യാനേഷ് കുമാറിന്‍റെ രാജി ആവശ്യപ്പെട്ടുള്ള സമരങ്ങൾ ഇരുവിഭാഗത്തിന്‍റെയും പൊതുവായ ലക്ഷ്യമാണെന്ന് മാധ്യമങ്ങളോട് സംസാരിക്കവെ ദീപ്കെ വ്യക്തമാക്കി. പാർട്ടിയെ ഔദ്യോഗികമായി രാഷ്ട്രീയ പാർട്ടിയായി രജിസ്റ്റർ ചെയ്യാൻ ഉദ്ദേശിക്കുന്നില്ലെന്നും അദ്ദേഹം കൂട്ടിച്ചേർത്തു.
സിജെപി നേതാക്കളെ ജയിലിലടച്ചത് കേന്ദ്രത്തിന്‍റെ ഭീരുത്വം; ജന്തർമന്തർ തിരിച്ചുപിടിക്കുമെന്ന് രാഹുൽ ഗാന്ധി
ന്യൂഡൽഹി: ജന്തർമന്തറിൽ അതിക്രമിച്ചു കയറി ദേശീയ പതാക ഉയർത്തിയെന്നാരോപിച്ച് സിജെപി നേതാക്കളായ സൗരവ് ദാസിനെയും അശുതോഷ് റാങ്കയെയും അഞ്ച് ദിവസത്തേക്ക് ജയിലിലടച്ച കേന്ദ്ര സർക്കാർ നടപടിയെ രൂക്ഷമായി വിമർശിച്ച് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. സമാധാനപരമായി ദേശീയ പതാക വീശുന്നതും ‘ഭാരത് മാതാ കീ ജയ്’ വിളിക്കുന്നതും എങ്ങനെയാണ് കുറ്റകൃത്യമാകുന്നതെന്ന് അദ്ദേഹം ചോദിച്ചു.
സർക്കാരിന്‍റെ ഇത്തരം ജനാധിപത്യവിരുദ്ധ നടപടികൾ കേന്ദ്രത്തിന്‍റെ ഭയത്തെയും ഭീരുത്വത്തെയുമാണ് കാണിക്കുന്നത്. ജനങ്ങളുടെ പ്രതിഷേധിക്കാനുള്ള അവകാശത്തെ ഇല്ലാതാക്കാൻ സമരവേദിയായ ജന്തർമന്തർ നിരോധിച്ച നടപടി അംഗീകരിക്കാനാവില്ലെന്നും, ജനാധിപത്യ പോരാട്ടങ്ങളിലൂടെ ജന്തർമന്തർ തിരിച്ചുപിടിക്കുമെന്നും രാഹുൽ ഗാന്ധി വ്യക്തമാക്കി.
മുഖ്യ തെരഞ്ഞെടുപ്പ് കമ്മീഷണർക്കെതിരെയുള്ള പ്രതിഷേധത്തിൽ ഇന്ത്യ സഖ്യവും സിജെപിയും മുന്നോട്ടുപോകുന്നതിനിടെയാണ് രാഹുൽ ഗാന്ധി നേതാക്കൾക്ക് പിന്തുണയുമായി രംഗത്തെത്തിയത്.
രാഹുൽ ഗാന്ധി തള്ളിമാറ്റിയെന്ന പ്രചാരണത്തിനിടെ ചിത്രം പുറത്തുവിട്ട് ഡികെ
ബംഗളൂരു: ഇന്ത്യ സഖ്യത്തിന്‍റെ സുപ്രീം കോടതി മാർച്ചിനിടെ കർണാടക മുഖ്യമന്ത്രിയും കോൺഗ്രസ് നേതാവുമായ ഡി.കെ. ശിവകുമാറിനെ പ്രതിപക്ഷ നേതാവ് രാഹുൽ ഗാന്ധി തള്ളിമാറ്റിയെന്ന ആരോപണവുമായി ചിലർ രംഗത്തുവന്നതിനു പിന്നാലെ രാഹുൽ ഗാന്ധിയുമൊന്നിച്ചുള്ള ചിത്രങ്ങൾ പോസ്റ്റ് ചെയ്ത് ഡി.കെ. ശിവകുമാർ.
പ്രധാനമായും ബിജെപി അനുകൂല പ്ലാറ്റ്ഫോമുകളിലാണ് ഈ പ്രചാരണം വ്യാപകമായി നടന്നത്. ഡി.കെ. ശിവകുമാറിനെ അവഗണിച്ചെന്നും പിന്നിലേക്കു രാഹുൽ തള്ളി മാറ്റിയെന്നുമായിരുന്നു ആക്ഷേപം. എന്നാൽ, രാഹുൽ മനപ്പൂർവം അങ്ങനെ ചെയ്തിട്ടില്ലെന്ന് ദൃശ്യങ്ങൾ പങ്കുവച്ചുകൊണ്ട് കോൺഗ്രസ് വൃത്തങ്ങൾ പ്രതികരിച്ചിരുന്നു. രാഹുൽ മൂന്നു മാസം ഗർഭിണിയായ തന്നെ തള്ളിമാറ്റിയെന്ന ആരോപണവുമായി ഒരു വനിതാ മാധ്യമപ്രവർത്തകയും രംഗത്തുവന്നിരുന്നു. എന്നാൽ, ഇതും കോൺഗ്രസ് നിഷേധിച്ചു.
ഇത്രയും സംഘർഷഭരിതമായ അന്തരീക്ഷത്തിൽ ഗർഭിണിയായ മാധ്യമപ്രവർത്തക കടന്നുചെന്നതു തന്നെ ഉചിതമായില്ലെന്ന് ചില കോൺഗ്രസ് പ്രവർത്തകർ ചൂണ്ടിക്കാട്ടി. മാത്രമല്ല ഇവരെ രാഹുൽ ഗാന്ധി മനപ്പൂർവം തള്ളി നീക്കിയിട്ടില്ലെന്നും ആശുപത്രയിൽ അഡ്മിറ്റായ ഇവരെ ബിജെപി നേതാക്കൾ സന്ദർശിച്ചത് സംശയാസ്പദമാണെന്നും കോൺഗ്രസുകാർ കുറ്റപ്പെടുത്തി.
ആയിരക്കണക്കിന് ആളുകൾ തിക്കിത്തിരക്കി നീങ്ങുമ്പോൾ അവരെ നിയന്ത്രിക്കാനുള്ള സ്വാഭാവിക ശ്രമങ്ങൾ മാത്രമാണ് രാഹുൽ ഗാന്ധി നടത്തിയിട്ടുള്ളതെന്നും കോൺഗ്രസ് വൃത്തങ്ങൾ പറഞ്ഞു. ഇതിനു പിന്നാലെയാണ് രാഹുൽ ഗാന്ധിക്കൊപ്പം കൈ പിടിച്ചുനിൽക്കുന്ന ചിത്രങ്ങൾ ഡി.കെ.ശിവകുമാർ തന്‍റെ ഫേസ്ബുക്ക് അക്കൗണ്ടിൽ പോസ്റ്റ് ചെയ്തത്.
ഇന്നലെ രാഹുലിന്‍റെ വസതിയിൽ നടന്ന ചായ സൽക്കാരത്തിനിടയിലുള്ളതാണ് ചിത്രങ്ങൾ. പ്രിയങ്ക ഗാന്ധിയും ചിത്രത്തിലുണ്ട്. ഭരണഘടനയും ജനാധിപത്യവും സംരക്ഷിക്കാൻ ഒറ്റക്കെട്ടാണെന്ന കുറിപ്പും ഇതിനൊപ്പമുണ്ട്. ഇതുകൂടാതെ രാഹുൽ ഗാന്ധി തള്ളിമാറ്റിയെന്ന രീതിയിൽ പ്രചരിപ്പിക്കുന്നതിന്‍റെ യഥാർഥ വിഡിയോയും ഷെയർ ചെയ്തിട്ടുണ്ട്. പിന്നിലൂടെ വന്ന രാഹുലിനു കയറി വരാൻ ഡി.കെ. അല്പം ഒതുങ്ങിക്കൊടുക്കുന്നതായിട്ടാണ് ദൃശ്യങ്ങളിലുള്ളത്. രാഹുൽ അദ്ദേഹത്തെ തള്ളുന്ന രംഗങ്ങൾ ഇതിലില്ല.
