കോൽക്കത്ത: പ്ലസ് വൺ വിദ്യാർഥിയായ പതിനേഴുകാരിയെ പീഡിപ്പിച്ച് കൊലപ്പെടുത്തിയ കേസിൽ അറസ്റ്റിലായ പ്രതി പൊലിസ് ഏറ്റുമുട്ടലിൽ കൊല്ലപ്പെട്ടു. പ്രഹ്ളാദ് ദാസ് (23) എന്ന യുവാവാണ് ചൊവ്വാഴ്ച പുലർച്ചെ കൊല്ലപ്പെട്ടത്. പശ്ചിമ ബംഗാളിലെ ഉത്തര 24 പർഗാനാസ് ജില്ലയിൽ ആണ് സംഭവം.
ബോൺഗാവിൽ തെളിവെടുപ്പിനിടെയാണ് സംഭവം. പുലർച്ചെ മൂന്നിനു പൊലിസ് ഉദ്യോഗസ്ഥരുടെ പക്കൽ നിന്ന് തോക്ക് തട്ടിയെടുത്ത പ്രതി പൊലിസിന് നേരെ വെടിയുതിർക്കുകയും രക്ഷപ്പെടാൻ വേണ്ടി അടുത്തുള്ള കുളത്തിലേക്ക് ചാടുകയുമായിരുന്നു. തുടർന്ന് സ്വയരക്ഷയ്ക്കായി പൊലിസ് തിരിച്ച് വെടിയുതിർത്തു. ഗുരുതരമായി പരിക്കേറ്റ ഇയാളെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ഞായറാഴ്ച രാവിലെ ഗായ്ഘട്ടയിൽ നിന്നാണ് പെൺകുട്ടിയുടെ മൃതദേഹം കണ്ടെത്തിയത്. ശനിയാഴ്ച രാത്രി നടന്ന സംഗീത പരിപാടിയിൽ പങ്കെടുക്കാൻ പോയ പെൺകുട്ടിയെ കാണാതാവുകയായിരുന്നു. തുടർന്ന് നടത്തിയ തെരച്ചിലിലാണ് ഒരു ബന്ധുവിന്‍റെ വീടിന്‍റെ സമീപത്ത് മൃതദേഹം കണ്ടെത്തിയത്. തലയിലും മുഖത്തും ഉൾപ്പെടെ ശരീരത്തിൽ ഗുരുതരമായ പരിക്കുകൾ ഉണ്ടായിരുന്നു.
തുടർന്ന് കുടുംബാംഗങ്ങളുടെ പരാതിയുടെ അടിസ്ഥാനത്തിലാണ് ഗായ്ഘട്ട ഷിമുൽപൂർ സ്വദേശി പ്രഹ്ളാദ് ദാസിനെ പൊലിസ് അറസ്റ്റ് ചെയ്തത്. സംഭവത്തെ തുടർന്ന് പ്രദേശത്ത് വലിയ രീതിയിൽ പ്രതിഷേധങ്ങൾ ഉയർന്നിരുന്നു.
