കോട്ടയം: കേന്ദ്രസര്‍ക്കാരിന്‍റെ ആനുകൂല്യങ്ങള്‍ ബിജെപി ഓഫീസില്‍ നടന്ന ചടങ്ങില്‍ വിതരണം ചെയ്തത് വിവാദത്തിൽ. ബിജെപി കോട്ടയം ഈസ്റ്റ്, വെസ്റ്റ് ജില്ലാ കമ്മിറ്റികൾ സംഘടിപ്പിച്ച പരിപാടിയിലാണ് സേവാ സ്പര്‍ശം എന്ന പേരില്‍ വയോജനങ്ങള്‍ക്കുള്ള സഹായ ഉപകരണങ്ങൾ വിതരണം ചെയ്തത്.
കേന്ദ്ര പദ്ധതികളെ ബിജെപി രാഷ്ട്രീയ നേട്ടത്തിനായി ഉപയോഗിക്കുന്നുവെന്ന വിമർശനം ഇതോടെ ശക്തമായിരിക്കുകയാണ്. കേന്ദ്രസര്‍ക്കാരിന്‍റെ വയോശ്രീ പദ്ധതിയുടെ ഭാഗമായുള്ള ഉപകരണങ്ങളാണിവ.
കോട്ടയം ഈസ്റ്റ് ജില്ലാ കമ്മിറ്റിയില്‍ ലിജിന്‍ ലാലും വെസ്റ്റ് ജില്ലാ കമ്മിറ്റിയില്‍ സംസ്ഥാന സെക്രട്ടറി അശോകന്‍ കുളനടയുമാണ് സഹായ ഉപകരണങ്ങള്‍ വിതരണം ചെയ്തത്. ഷോണ്‍ ജോര്‍ജാണ് വിതരണം ഉദ്ഘാടനം ചെയ്തത്.
