ആഡംബര കാർ നിർമാതാക്കളായ ബുഗാട്ടിയുടെ സിഇഒ മെയ്റ്റ് റിമാക്സിന്‍റെ പ്രശസ്തമായ ബുഗാട്ടി ചിറോൺ (Chiron) കാർ മോഷ്ടിക്കപ്പെട്ടു. ക്രൊയേഷ്യയിലെ കമ്പനി ക്യാമ്പസിൽ നിന്ന് കാറിന്‍റെ താക്കോൽ ഉള്ളിൽ തന്നെ വെച്ചതിനെ തുടർന്ന് അബദ്ധത്തിൽ നഷ്ടപ്പെട്ട കാർ, ഒടുവിൽ സിനിമയെ വെല്ലുന്ന നാടകീയ സംഭവങ്ങൾക്കൊടുവിൽ ഓസ്ട്രിയൻ പോലീസാണ് പിടികൂടിയത്. സംഭവത്തിന്‍റെ വിശദാംശങ്ങൾ റിമാക്സ് സാമൂഹിക മാധ്യമങ്ങളിലൂടെ പങ്കുവെച്ചു.
കമ്പനി ക്യാമ്പസിൽ ജീവനക്കാർക്ക് കാറുകൾ എടുത്തുമാറ്റാനും പരിശോധനകൾക്കും സൗകര്യപ്രദമായിരിക്കാൻ റിമാക്സ് പതിവായി കാറിന്‍റെ താക്കോൽ അകത്തുതന്നെ സൂക്ഷിക്കാറുണ്ടായിരുന്നു. എന്നാൽ ഈ ചെറിയ അശ്രദ്ധയാണ് മോഷണത്തിന് കാരണമായത്.
കമ്പനി പരിസരത്ത് മതിലുകളോ ഗേറ്റുകളോ ഇല്ലാത്തതിനാൽ ആളുകൾക്ക് സ്വതന്ത്രമായി പ്രവേശിക്കാൻ കഴിയുമായിരുന്നു. ജോലി തേടിയെത്തിയ മുപ്പതുകളുടെ പകുതിയിലുള്ള ഒരു ക്രൊയേഷ്യൻ പൗരനാണ് താക്കോലോടുകൂടിയ കാർ കണ്ട് മോഷ്ടിച്ച് കടന്നുകളഞ്ഞത്.
കാർ നഷ്ടപ്പെട്ട വിവരം വൈകിയാണ് ജീവനക്കാർ അറിയുന്നത്. ഉടൻ തന്നെ ജിപിഎസ് ലൊക്കേഷൻ ഡാറ്റ പരിശോധിച്ച റിമാക്സ് പോലീസ് സഹായത്തോടെ കാറിന്‍റെ നീക്കങ്ങൾ ട്രാക്ക് ചെയ്തു. സ്ലോവേനിയ അതിർത്തി കടന്ന് ഓസ്ട്രിയയിലേക്ക് പോയ കാർ, പെട്രോൾ തീർന്നതിനെ തുടർന്ന് ഇന്ധനം നിറയ്ക്കാൻ നിർത്തിയ സമയത്താണ് ഓസ്ട്രിയൻ പോലീസ് പ്രതിയെ പിടികൂടിയത്.
കാറിന് ചെറിയ തോതിൽ കേടുപാടുകൾ സംഭവിച്ചിട്ടുണ്ടെങ്കിലും അത് പരിഹരിക്കാമെന്നും, എന്നാൽ ഇനി മുതൽ ഫാക്ടറിയിൽ കാറിന്‍റെ താക്കോൽ സൂക്ഷിക്കില്ലെന്നും റിമാക്സ് വ്യക്തമാക്കി. കടുത്ത നിയമനടപടികൾ നേരിടേണ്ടി വരുന്നതിനാൽ താൻ പ്രത്യേകമായി പരാതി നൽകുന്നില്ലെന്നും അദ്ദേഹം പറഞ്ഞു. ഓസ്ട്രിയൻ പോലീസിന്‍റെ വേഗത്തിലുള്ള ഇടപെടലിനെയും അദ്ദേഹം അഭിനന്ദിച്ചു.
