മുംബൈ ലോക്കൽ ട്രെയിനിന്‍റെ ഫസ്റ്റ് ക്ലാസ് കമ്പാർട്ട്മെന്‍റിന്‍റെ സീറ്റുകളിൽ രണ്ട് പേർ കിടന്നുറങ്ങുന്നതിന്‍റെ വീഡിയോ പുറത്ത്. സംഭവത്തിൽ റെട്രോയ്വേ പ്രൊട്ടക്ഷൻ ഫോഴ്‌സ് നടപടിയെടുക്കണമെന്ന് ആവശ്യപ്പെട്ട് ഒരു യാത്രക്കാരൻ രംഗത്തെത്തി.
ചിൻമയ് പുരവ് എന്ന എക്സ് ഉപയോക്താവാണ് ഈ ദൃശ്യങ്ങൾ സാമൂഹിക മാധ്യമങ്ങളിൽ പങ്കുവെച്ചത്. ബോറിവ്ലി പ്ലാറ്റ്‌ഫോം 2ൽ നിന്നും രാവിലെ 6.40ന് പുറപ്പെട്ട സ്ലോ ലോക്കൽ ട്രെയിനിലാണ് സംഭവം നടന്നതെന്ന് അദ്ദേഹം പറയുന്നു.
ഫസ്റ്റ് ക്ലാസ് കമ്പാർട്ട്മെന്റിലെ സീറ്റുകളിൽ രണ്ട് പേർ സുഖമായി കിടന്നുറങ്ങുന്നതായി വീഡിയോയിൽ കാണാം. ഇവർ ടിക്കറ്റില്ലാതെയാകാം യാത്ര ചെയ്യുന്നതെന്നും, ഇത്തരം സംഭവങ്ങൾ പതിവാണെന്നും വീഡിയോയിൽ ചിത്രീകരിച്ചുകൊണ്ട് ചിൻമയ് പറയുന്നു.
റെയിൽവേ ഹെൽപ്പ്‌ലൈൻ നമ്പറായ ‘139’ൽ ബന്ധപ്പെടാൻ ശ്രമിച്ചെങ്കിലും, ആർപിഎഫ് ഉദ്യോഗസ്ഥരുമായി സംസാരിക്കാൻ മനുഷ്യന്‍റെ സഹായം ലഭിക്കുന്ന ഓപ്ഷൻ കണ്ടെത്താനായില്ലെന്ന് അദ്ദേഹം പരാതിപ്പെട്ടു. വെസ്റ്റേൺ റെയിൽവേ, മുംബൈ സെൻട്രൽ ഡിവിഷണൽ റെയിൽവേ മാനേജർ (ഡി.ആർ.എം), ആർപിഎഫ് എന്നിവരെ ടാഗ് ചെയ്തുകൊണ്ടാണ് അദ്ദേഹം വീഡിയോ പങ്കുവെച്ചത്.
യാത്രക്കാരന്‍റെ പരാതിക്ക് വെസ്റ്റേൺ റെയിൽവേയുടെ മുംബൈ സെൻട്രൽ ഡിആർഎം ഓഫീസ് മറുപടി നൽകി. വിഷയം ബന്ധപ്പെട്ട ഉദ്യോഗസ്ഥരുടെ ശ്രദ്ധയിൽപ്പെടുത്തിയിട്ടുണ്ടെന്ന് റെയിൽവേ അധികൃതർ അറിയിച്ചു. വീഡിയോയിൽ ഈ വ്യക്തികളുടെ ടിക്കറ്റ് വിവരങ്ങൾ വ്യക്തമല്ലെങ്കിലും, സംഭവം യാത്രക്കാർക്കിടയിൽ ചർച്ചയായിട്ടുണ്ട്.
