മഹാരാഷ്ട്രയിൽ നിന്ന് ബിഹാറിലേക്ക് പോവുകയായിരുന്ന ട്രെയിനിൽ പുലർച്ചെ രണ്ട് മണിക്ക് ടിടിഇ (TTE – Travelling Ticket Examiner) ചമഞ്ഞ് യാത്രക്കാരുടെ ടിക്കറ്റുകൾ പരിശോധിച്ച സ്ത്രീ പിടിയിലാകുന്നതിൽ നിന്നും തലനാരിഴയ്ക്ക് രക്ഷപ്പെട്ടു. പെരുമാറ്റത്തിൽ സംശയം തോന്നിയ യാത്രക്കാരൻ ഐഡന്‍റിറ്റി കാർഡ് ആവശ്യപ്പെട്ടതോടെയാണ് സ്ത്രീയുടെ തട്ടിപ്പ് പുറത്തായത്.
‘നീതു’ എന്ന എക്സ് ഉപയോക്താവാണ് ചിത്രങ്ങൾ സഹിതം ഈ സംഭവം പുറത്തുവിട്ടത്. പുലർച്ചെ രണ്ട് മണിക്ക് യാത്രക്കാരെ ഉണർത്തി ടിക്കറ്റ് പരിശോധിക്കുകയും, ടിക്കറ്റില്ലാത്ത യാത്രക്കാരന് വെള്ളക്കടലാസിൽ ടിക്കറ്റ് എഴുതി നൽകാൻ ശ്രമിക്കുകയുമായിരുന്നു ഇവർ ചെയ്തത്.
യൂണിഫോം ഇല്ലാതെ ടിക്കറ്റ് പരിശോധിക്കുന്നത് ശ്രദ്ധയിൽപ്പെട്ട ഒരു യാത്രക്കാരൻ ഇവരോട് ഐഡി കാർഡ് കാണിക്കാൻ ആവശ്യപ്പെട്ടു. എന്നാൽ ഐഡി കാർഡ് കാണിക്കാൻ വിസമ്മതിച്ച ഇവർ, ഉദ്യോഗസ്ഥരോട് മാത്രമേ ഐഡി കാണിക്കൂ എന്ന് വാദിച്ചു.
ചോദ്യം ചെയ്യൽ ശക്തമായതോടെ പരിഭ്രാന്തയായ സ്ത്രീ, യാത്രക്കാരൻ തന്നെ ഉപദ്രവിക്കാൻ ശ്രമിക്കുകയാണെന്ന് ആരോപിക്കുകയും ആൾക്കൂട്ടത്തിനിടയിൽ മാസ്ക് ധരിച്ച് ഊരിപ്പോവുകയുമായിരുന്നു.
ഔദ്യോഗിക യൂണിഫോമും തിരിച്ചറിയൽ കാർഡുമില്ലാതെ ഒരു സ്ത്രീ ട്രെയിനിൽ കയറി യാത്രക്കാരെ പരിശോധിച്ചിട്ടും ജീവനക്കാർ അറിയാതിരുന്നത് സുരക്ഷാ വീഴ്ചയാണെന്ന് ചോദ്യങ്ങൾ ഉയർന്നു. എക്സിലെ പോസ്റ്റിന് മറുപടിയായി “ബന്ധപ്പെട്ട ഉദ്യോഗസ്ഥരെ വിവരം അറിയിച്ചിട്ടുണ്ട്” എന്ന് റെയിൽവേ വ്യക്തമാക്കി.
ഇവർ യാത്രക്കാരിൽ നിന്നും പണം തട്ടിയെടുത്തിട്ടുണ്ടോ എന്നും ഇവരെ തിരിച്ചറിഞ്ഞിട്ടുണ്ടോ എന്നതിലും ഇതുവരെ കൂടുതൽ വ്യക്തത വന്നിട്ടില്ല.
See the post here:
