2026ലെ യുഎസ് ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് കനത്ത തിരിച്ചടി നേരിട്ടതിന് പിന്നാലെ യുഎസ് പ്രസിഡന്‍റ് ഡൊണാൾഡ് ട്രംപിനെ ലക്ഷ്യമിട്ട് സമൂഹമാധ്യമങ്ങളിൽ ട്രോളുകളും മീമുകളും പ്രവഹിക്കുന്നു. കോൺഗ്രസിന്‍റെ ഇരുസഭകളിലും ഡെമോക്രാറ്റുകൾ വ്യക്തമായ മുന്നേറ്റം നേടിയതോടെയാണ് സമൂഹമാധ്യമങ്ങളിൽ ട്രെൻഡിങ് ആയത്.
യുഎസ് മിഡ്‌ടേം തെരഞ്ഞെടുപ്പിൽ ഡെമോക്രാറ്റുകൾ കോൺഗ്രസിന്‍റെ ഇരുസഭകളുടെയും നിയന്ത്രണം പിടിച്ചെടുത്തു. ടെക്സസ്, കാൻസാസ്, അയോവ, സൗത്ത് കരോലിന തുടങ്ങിയ റിപ്പബ്ലിക്കൻ സ്വാധീന മേഖലകളിലും ഡെമോക്രാറ്റുകൾ വിജയം കണ്ടു. ട്രംപിന്‍റെ ബാക്കി കാലാവധിയിൽ അദ്ദേഹത്തിന്‍റെ ഭരണകൂടത്തിന് വലിയ രാഷ്ട്രീയ വെല്ലുവിളികൾ തീർക്കുന്നതാണ് ഈ വിജയം.
ഡെമോക്രാറ്റുകളുടെ വൻ വിജയത്തെ വിശേഷിപ്പിക്കാൻ #BlueTsunami, #Bluenami തുടങ്ങിയ ഹാഷ്‌ടാഗുകളാണ് സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. ട്രംപിന്‍റെ കർശനമായ കുടിയേറ്റ നയങ്ങളെ പരിഹസിച്ച് “അമേരിക്ക ട്രംപിന്‍റെ ഭൂരിപക്ഷത്തെ നാടുകടത്താൻ ശ്രമിക്കുകയാണെന്ന് തോന്നുന്നു” എന്ന തരത്തിലുള്ള പോസ്റ്റുകളും വൈറലായിട്ടുണ്ട്. ടെക്സസിൽ ഉൾപ്പെടെ റിപ്പബ്ലിക്കൻ പാർട്ടിക്ക് സീറ്റുകൾ നഷ്ടപ്പെട്ടതിനെ പരിഹസിച്ചും നിരവധി പേർ രംഗത്തെത്തി.
തെരഞ്ഞെടുപ്പ് ഫലം അംഗീകരിക്കുന്നുവെന്നും ഡെമോക്രാറ്റുകളുമായി ചേർന്ന് പ്രവർത്തിക്കാൻ തയ്യാറാണെന്നും ട്രംപ് വ്യക്തമാക്കി. താൻ നേരിട്ട് മത്സരരംഗത്തില്ലായിരുന്നുവെന്നും താനാണ് മത്സരിച്ചിരുന്നെങ്കിൽ വൻ വിജയം നേടുമായിരുന്നു എന്നുമാണ് ട്രംപിന്‍റെ നിലപാട്. എങ്കിലും നവമാധ്യമങ്ങളിൽ ട്രംപിനെതിരെയുള്ള മീം ഫെസ്റ്റ് ഇപ്പോഴും തുടരുകയാണ്.
