പങ്കാളിയുമായുള്ള അഭിപ്രായവ്യത്യാസങ്ങളും വഴക്കുകളും എങ്ങനെ സമാധാനപരമായി പരിഹരിക്കാമെന്ന് വ്യക്തമാക്കി പ്രമുഖ സംരംഭകനും ഇൻഫ്ലുവൻസറുമായ അങ്കുർ വരിക്കൂവും ഭാര്യ രുചിയും. തങ്ങൾ തമ്മിൽ വഴക്കുണ്ടാകുമ്പോൾ പിന്തുടരാറുള്ള മൂന്ന് ലളിതമായ തത്വങ്ങൾ വ്യക്തമാക്കുന്ന വീഡിയോ സോഷ്യൽ മീഡിയ പ്ലാറ്റ്‌ഫോമായ എക്സിൽ അങ്കുർ വരിക്കൂ പങ്കുവെച്ചു.
ബന്ധങ്ങളിൽ പരസ്പര ബഹുമാനവും സമാധാനവും നിലനിർത്താൻ ഇരുവരും നിർദ്ദേശിക്കുന്ന 3 പ്രധാന കാര്യങ്ങൾ ഇവയാണ്:
മറ്റുള്ളവരുടെ മുന്നിലോ കുട്ടികളുടെ മുന്നിലോ വെച്ച് ഒരിക്കലും തർക്കങ്ങളിൽ ഏർപ്പെടരുത്. ഇത് ദാമ്പത്യത്തിലെ സ്വകാര്യ വിഷയമായതിനാൽ അടച്ചിട്ട മുറിയിൽ ഇരുന്ന് സ്വകാര്യമായി മാത്രം സംസാരിക്കുക. വഴക്ക് തീർക്കാതെ രാത്രി ഉറങ്ങാൻ കിടക്കരുത്. എത്ര വൈകിയാലും പരസ്പരം സംസാരിച്ച് പ്രശ്നം പരിഹരിച്ച ശേഷം മാത്രം ഉറങ്ങുക.
ആരാണ് ശരി ആരാണ് തെറ്റ് എന്ന് തെളിയിക്കാനല്ല ശ്രമിക്കേണ്ടത്. പരസ്പരം പോരാടുന്നതിന് പകരം രണ്ടുപേരും ചേർന്ന് ആ പ്രശ്നത്തിനെതിരെ പോരാടുകയും പരിഹാരം കണ്ടെത്തുകയുമാണ് ചെയ്യേണ്ടത്.
ഈ വീഡിയോ സോഷ്യൽ മീഡിയയിൽ ഏറെ ശ്രദ്ധ നേടിയിട്ടുണ്ട്. ചില ഉപയോക്താക്കൾ തമാശരൂപേണ തങ്ങളുടെ വഴക്കുകൾ പരിഹരിക്കുന്ന രീതികളും വീഡിയോയ്ക്ക് താഴെ കമന്‍റുകളായി പങ്കുവെച്ചു. വ്യക്തിഗത ധനകാര്യം, കരിയർ, സംരംഭകത്വം, വ്യക്തിബന്ധങ്ങൾ എന്നിവയെക്കുറിച്ച് സ്ഥിരമായി വീഡിയോകളും ലേഖനങ്ങളും പങ്കുവെക്കാറുള്ള എഴുത്തുകാരൻ കൂടിയാണ് അങ്കുർ വരിക്കൂ.
