ആകാശത്ത് ആയിരക്കണക്കിന് അടി ഉയരത്തിൽ വെച്ച് വ്യത്യാസങ്ങളൊന്നുമില്ലാതെ ദീപാവലി ആഘോഷിച്ച് ഒരു കൂട്ടം യാത്രക്കാർ. ഇൻഡിഗോ വിമാനത്തിലെ പൈലറ്റായ പ്രദീപ് കൃഷ്ണന്‍റെ ആശയമാണ് വിമാനത്തിനുള്ളിൽ വേറിട്ടൊരു ദീപാവലി ആഘോഷത്തിന് വഴിയൊരുക്കിയത്.
പ്രദീപ് കൃഷ്ണൻ തന്‍റെ ഇൻസ്റ്റാഗ്രാം പേജിൽ പങ്കുവെച്ച വീഡിയോയിലാണ് ഈ ഹൃദ്യമായ നിമിഷങ്ങളുള്ളത്. വിമാനത്തിലെ അനൗൺസ്‌മെന്‍റ് സിസ്റ്റത്തിലൂടെ യാത്രക്കാർക്ക് ദീപാവലി ആശംസകൾ നേർന്ന പൈലറ്റ്, വെളിച്ചത്തിന്‍റെ ഉത്സവമായ ദീപാവലി എല്ലാവർക്കും ഒന്നിച്ചു ആഘോഷിക്കാമെന്ന് നിർദ്ദേശിക്കുകയായിരുന്നു.
തുടർന്ന് എല്ലാവരോടും മൊബൈൽ ഫോണുകൾ എടുത്ത് ഫ്ലാഷ്‌ലൈറ്റുകൾ (ടോർച്ച്) ഓൺ ചെയ്യാൻ അദ്ദേഹം അഭ്യർഥിച്ചു. പൈലറ്റിന്‍റെ വാക്ക് കേട്ട് യാത്രക്കാർ ഒന്നടങ്കം ഫോൺ ടോർച്ചുകൾ തെളിച്ചതോടെ വിമാനത്തിന്‍റെ ക്യാബിൻ നിമിഷനേരം കൊണ്ട് വെളിച്ചത്താൽ നിറഞ്ഞു.
യാത്രക്കാർക്ക് പൈലറ്റ് നൽകിയ രസകരമായ ആശംസയും ഏറെ ശ്രദ്ധിക്കപ്പെട്ടു. “ഇന്ന് നിങ്ങൾ കഴിക്കുന്ന ഓരോ മധുരപലഹാരവും അത്ഭുതകരമായി പ്രോട്ടീനായി മാറട്ടെ! ഏവർക്കും ദീപാവലി ആശംസകൾ! നന്നായി ആസ്വദിക്കൂ, നന്നായി ഭക്ഷണം കഴിക്കൂ, ‘ജോളി ആ ഇറുങ്ക’ (സന്തോഷമായിരിക്കൂ)” എന്നായിരുന്നു വീഡിയോയ്‌ക്കൊപ്പം അദ്ദേഹം കുറിച്ച വരികൾ.
വീടുകളിൽ നിന്നും പ്രിയപ്പെട്ടവരിൽ നിന്നും അകലെ ആയിരുന്നിട്ടും, മൊബൈൽ ഫ്ലാഷ്‌ലൈറ്റുകൾ മാത്രം ഉപയോഗിച്ച് ഒരു സാധാരണ വിമാനയാത്രയെ അവിസ്മരണീയമായ ആഘോഷമാക്കി മാറ്റാൻ കഴിഞ്ഞതിന്‍റെ സന്തോഷത്തിലാണ് യാത്രക്കാർ. ദീപാവലി ആഘോഷിക്കാൻ വലിയ അലങ്കാരങ്ങളോ ആർഭാടങ്ങളോ വേണമെന്നില്ലെന്നും, നല്ലൊരു മനസ്സ് മാത്രംമതി ആകാശത്തും സന്തോഷം നിറയ്ക്കാനെന്നും ഈ സംഭവം തെളിയിക്കുന്നു.
