മോഷണം തടയാൻ ഹോസ്റ്റൽ മുറിയിൽ സ്ഥാപിച്ച സിസിടിവി ക്യാമറയിൽ പതിഞ്ഞത് ഞെട്ടിക്കുന്ന മറ്റൊരു ദൃശ്യം. ഉറങ്ങിക്കിടക്കുകയായിരുന്ന വിദ്യാർഥിയുടെ ശരീരത്തിലേക്ക് ഭിത്തിയിൽ ഉറപ്പിച്ചിരുന്ന വലിയ അലമാര പെട്ടെന്ന് തകർന്നുവീണു. അദ്ഭുതകരമായാണ് വിദ്യാർഥി പരിക്കേൽക്കാതെ രക്ഷപ്പെട്ടത്.
മത്സരപരീക്ഷകൾക്കുള്ള പരിശീലന കേന്ദ്രങ്ങൾക്ക് പേരുകേട്ട രാജസ്ഥാനിലെ കോട്ടയിലാണ് സംഭവം. മുറിയിൽ തുടർച്ചയായി മോഷണം നടന്നതിനെ തുടർന്നാണ് വിദ്യാർഥി സ്വന്തമായി സിസിടിവി ക്യാമറ സ്ഥാപിച്ചത്.
ഒരു ദിവസം രാത്രി വിദ്യാർഥി കട്ടിലിൽ ഉറങ്ങിക്കിടക്കുമ്പോൾ ഭിത്തിയിൽ സ്ഥാപിച്ചിരുന്ന ഭാരമേറിയ അലമാര പെട്ടെന്ന് ഊരി കട്ടിലിലേക്ക് വീഴുകയായിരുന്നു. അലമാരയിലുണ്ടായിരുന്ന പുസ്തകങ്ങളും സാധനങ്ങളും വിദ്യാർത്ഥിയുടെ മേലേക്ക് ചിതറിവീണു.
ആദ്യം എന്താണ് സംഭവിച്ചതെന്ന് മനസിലാകാതിരുന്ന വിദ്യാർഥി, ഏതാനും സെക്കൻഡുകൾക്ക് ശേഷം പതുക്കെ എഴുന്നേറ്റിരിക്കുകയും ഫോണെടുത്ത് മറ്റുള്ളവരെ വിവരമറിയിക്കാൻ ശ്രമിക്കുകയും ചെയ്യുന്നത് വീഡിയോയിൽ കാണാം. വിദ്യാർഥിക്ക് പരിക്കുകളൊന്നും ഏറ്റിട്ടില്ല.
സിസിടിവി ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെ, കോട്ടയിലെ ഹോസ്റ്റലുകളിൽ കുട്ടികൾക്കായി നൽകുന്ന ഫർണിച്ചറുകളുടെ ഗുണനിലവാരത്തെയും സുരക്ഷയെയും കുറിച്ച് വലിയ ആശങ്കയും വിമർശനവുമാണ് ഉയരുന്നത്.
