തിരുവനന്തപുരം: വൈദ്യുതി വാങ്ങലിൽ ജിഎൻഎയുമായി ഒരു കരാറുമില്ലെന്ന് വ്യക്തമാക്കി മുഖ്യമന്ത്രി വി.ഡി. സതീശൻ. ഹിമാചൽ വൈദ്യുതിയിൽ നിന്നും ജിഎൻഎ വൈദ്യുതിയിൽ നിന്നും രണ്ട് പ്രൊപ്പോസലുകളാണ് വന്നതെന്നും കൂട്ടത്തിൽ ലാഭകരമെന്ന നിലയിലാണ് ജിഎൻഎ എന്ന് തീരുമാനിച്ചതെന്നും മുഖ്യമന്ത്രി വാർത്താസമ്മേളനത്തിൽ പറഞ്ഞു.
അതേസമയം, വൈദ്യുതി വാങ്ങൽ മന്ത്രിസഭാ യോഗത്തിൽ ചർച്ചയായില്ല. നിയമനിർമാണത്തിന് നവംബർ 30 മുതൽ ഡിസസംബർ 10 വരെ നിയമസഭ സമ്മേളനം ചേരാനും തീരുമാനമായി.
ആവശ്യത്തിന് വൈദ്യുതി ഉണ്ട്; സർക്കാർ കൃത്രിമമായി വൈദ്യുതി ക്ഷാമം സൃഷ്ടിക്കുകയായിരുന്നു: പി. ജയരാജൻ
പത്തനംതിട്ട: ജിഎന്‍എ കരാറില്‍ യുഡിഎഫ് സര്‍ക്കാരിനെതിരെ രൂക്ഷവിമര്‍ശനവുമായി സിപിഎം സംസ്ഥാന സെക്രട്ടേറിയറ്റ് അംഗം പി. ജയരാജന്‍. വൈദ്യുതി മന്ത്രിയെ ഇരുട്ടില്‍ നിര്‍ത്തി മുഖ്യമന്ത്രി തീരുമാനം പ്രഖ്യാപിക്കുകയാണെന്നും ആവശ്യമായ വൈദ്യുതി ഉണ്ടായിട്ടും കൃത്രിമമായ വൈദ്യുതിക്ഷാമം സൃഷ്ടിച്ചെന്നും ജയരാജന്‍ ആരോപിച്ചു.
മുന്നണിഭരണത്തില്‍ പാലിക്കേണ്ട മര്യാദ മുഖ്യമന്ത്രി വി ഡി സതീശന്‍ പാലിച്ചില്ലെന്നും പി ജയരാജന്‍ പറഞ്ഞു. കേരളത്തിലെ സതീശന്‍ സര്‍ക്കാര്‍ ആറ് മാസത്തിനകം കൂട്ടുത്തരവാദിത്തം ഇല്ലാത്ത സര്‍ക്കാര്‍ ആണെന്ന് തെളിയിച്ചിരിക്കുകയാണ്. മുഖ്യമന്ത്രിക്കും മന്ത്രിമാര്‍ക്കും കൂട്ടുത്തരവാദിത്തം വേണമെന്നത് ഭരണഘടനാപരമായ കാര്യമാണ്. ഞാനൊന്നുമറിയില്ല, മുഖ്യമന്ത്രിയാണ് തീരുമാനം എടുത്തതെന്നാണ് വൈദ്യുതി മന്ത്രി ഒടുവില്‍ പറഞ്ഞത്. ഇപ്പോള്‍ ആളുകള്‍ പരിഹസിക്കുകയാണ്.
യുഡിഎഫ് സര്‍ക്കാര്‍ അധികാരത്തില്‍ വന്നതോടെയാണ് കറന്‍റ് കട്ട് ഏര്‍പ്പെടുത്തിയത്. ആവശ്യമായ വൈദ്യുതി ഉണ്ടായിട്ട് പോലും കൃത്രിമമായി വൈദ്യുതി ക്ഷാമം സൃഷ്ടിച്ചാണ് ഇത്തരമൊരു കരാര്‍ ഉണ്ടാക്കിയത്. മുന്നണി ഭരണത്തില്‍ പാലിക്കേണ്ട മര്യാദയും സതീശന്‍ പാലിക്കുന്നില്ലെന്ന് മറ്റുഘടകക്ഷികളിലെ മന്ത്രിമാരും പറഞ്ഞുതുടങ്ങി. മന്ത്രിയറിയാത്ത തീരുമാനങ്ങള്‍ മുഖ്യമന്ത്രി പ്രഖ്യാപിക്കുകയാണ്-പി. ജയരാജന്‍ ആരോപിച്ചു.
