സാധാരണയായി വർണപ്പൊടികളും അരിപ്പൊടിയും പൂവിതളുകളും ഉപയോഗിച്ചാണ് ദീപാവലിക്ക് രംഗോലി ഒരുക്കുന്നത്. എന്നാൽ, സ്വർണ്ണാഭരണങ്ങളും വജ്രങ്ങളും കൊണ്ട് പടുകൂറ്റൻ രംഗോലി തീർത്ത് ലോകശ്രദ്ധ നേടിയിരിക്കുകയാണ് ദുബായ്.
ദീപാവലി ആഘോഷങ്ങളുടെ ഭാഗമായി ‘സിറ്റി സെന്‍റർ ദേര’ മാളിലാണ് ഈ ആഡംബര കലാരൂപം പ്രദർശിപ്പിച്ചിരിക്കുന്നത്. ജ്വല്ലറി ബ്രാൻഡായ ‘ദമാസ്’, ദുബായ് ഫെസ്റ്റിവൽസ് ആൻഡ് റീട്ടെയിൽ എസ്റ്റാബ്ലിഷ്‌മെന്‍റുമായി സഹകരിച്ചാണ് ഇത് ഒരുക്കിയത്.
ഏകദേശം 6.5 കിലോഗ്രാം തൂക്കം വരുന്ന 213 സ്വർണ്ണാഭരണങ്ങളാണ് ഇതിനായി ഉപയോഗിച്ചത്. മാലകൾ, വളകൾ, കമ്മലുകൾ, പെൻഡന്‍റുകൾ എന്നിവ അതിമനോഹരമായി അടുക്കിവെച്ചാണ് രംഗോലി രൂപകൽപ്പന ചെയ്തത്. ഇതിനുപുറമെ 380 കാരറ്റിലധികം വരുന്ന വജ്രങ്ങളും ഇതിന് തിളക്കം കൂട്ടുന്നു.
10 കലാകാരന്മാർ തുടർച്ചയായി 16 മണിക്കൂർ കഠിനാധ്വാനം ചെയ്താണ് ഓരോ ആഭരണവും കൃത്യമായ അളവിൽ അടുക്കിവെച്ച് ഈ രംഗോലി പൂർത്തിയാക്കിയത്.
ഈ സ്വർണ രംഗോലിയുടെ വീഡിയോ സോഷ്യൽ മീഡിയയിൽ ഇതിനോടകം തന്നെ വൈറലായിട്ടുണ്ട്. ഇത്രയും വിലപിടിപ്പുള്ള ആഭരണങ്ങൾ ഒരു പൊതുസ്ഥലത്ത് യാതൊരു ഭയവുമില്ലാതെ പ്രദർശിപ്പിക്കാൻ സാധിക്കുന്നത് ദുബായിലെ സുരക്ഷാ സംവിധാനങ്ങളുടെയും ആഡംബരത്തിന്റെയും തെളിവാണെന്ന് നിരവധി പേർ അഭിപ്രായപ്പെട്ടു. പരമ്പരാഗത ഇന്ത്യൻ കലാരൂപത്തിന് തിളക്കമാർന്ന പുതിയൊരു മുഖം നൽകിയിരിക്കുകയാണ് ഈ ദീപാവലി കാഴ്ച.
