മഹാരാഷ്ട്രയിലെ നാസിക്കിൽ ജ്വല്ലറിയിൽ നിന്ന് സ്വർണ മോതിരങ്ങളടങ്ങിയ ട്രേയുമായി കടന്നുകളഞ്ഞ മോഷ്ടാക്കളെ പിടികൂടാൻ ഗ്ലാസ് കൗണ്ടറിന് മുകളിലൂടെ എടുത്തുചാടി കടയുടമ. നവംബർ 9ന് നടന്ന ഈ നാടകീയ സംഭവത്തിന്‍റെ സിസിടിവി ദൃശ്യങ്ങൾ ഇപ്പോൾ സമൂഹമാധ്യമങ്ങളിൽ വൈറലാണ്.
ഉപഭോക്താക്കളെന്ന വ്യാജേനയാണ് രണ്ടംഗ സംഘം ജ്വല്ലറിയിലെത്തിയത്. സ്വർണ മോതിരങ്ങൾ വാങ്ങാനെന്ന ഭാവത്തിൽ എത്തിയ ഇവർക്കായി കടയുടമ കൗണ്ടറിന് മുകളിൽ മോതിരങ്ങളടങ്ങിയ ട്രേ നിരത്തിവെച്ചു. ഉടമ മറ്റ് ആഭരണങ്ങൾ കാണിക്കുന്ന തിരക്കിലായ തക്കം നോക്കി, സംഘത്തിലൊരാൾ പെട്ടെന്ന് മോതിരങ്ങളടങ്ങിയ ട്രേ മുഴുവനായി തട്ടിയെടുത്ത് പുറത്തേക്ക് ഓടുകയായിരുന്നു. പിന്നാലെ കൂട്ടുപ്രതിയും ഓടി രക്ഷപ്പെട്ടു.
സംഭവം കണ്ട ഉടൻ തന്നെ കടയുടമ കൗണ്ടറിന് മുകളിലൂടെ എടുത്തുചാടി ഇവർക്ക് പിന്നാലെ പാഞ്ഞു. കടയിലെ മറ്റ് ജീവനക്കാരും ഒപ്പം ഓടിയെങ്കിലും, ജ്വല്ലറിക്ക് പുറത്ത് നിർത്തിയിട്ടിരുന്ന കാറിൽ കയറി മോഷ്ടാക്കൾ രക്ഷപ്പെട്ടു.
മോഷണം പോയ ട്രേയിൽ ഏകദേശം 2.5 തോല (25 ഗ്രാം) തൂക്കം വരുന്ന 12 സ്വർണ മോതിരങ്ങളാണ് ഉണ്ടായിരുന്നത്. സിസിടിവി ദൃശ്യങ്ങൾ കേന്ദ്രീകരിച്ച് അഡ്ഗാവ് (Adgaon) പോലീസ് ഒളിവിൽ പോയ പ്രതികൾക്കായി അന്വേഷണം ഊർജ്ജിതമാക്കിയിട്ടുണ്ട്.
