പത്തനാപുരം: കല്ലുംകടവില്‍ സ്വകാര്യ ബസ് സ്റ്റാന്റ് നിര്‍മ്മിച്ചിട്ടുണ്ടെങ്കിലും ഒരു ബസുപോലും സ്റ്റാന്റിനുള്ളില്‍ കയറാറില്ല.സ്വകാര്യബസുകളുടെ അനധികൃത പാര്‍ക്കിംഗ് ഗതാഗത തടസം സൃഷ്ടിക്കുന്നു. പത്തനംതിട്ട,അടൂര്‍ ഭാഗങ്ങളിലേക്ക് പോകേണ്ട ബസുകള്‍ സെന്‍ട്രല്‍ ജംഗ്ഷനില്‍ പഴയ പോലീസ് സ്‌റ്റേഷന്റെ എതിര്‍വശത്താണ് നിര്‍ത്തിയിടുന്നത്.യാത്രക്കാരെ കയറ്റുന്നതിനും ഇറക്കുന്നതിനുമായി സ്‌റ്റോപ്പ് മാത്രമാണ് ഇവിടെ അനുവദിച്ചിട്ടുള്ളത്. എന്നാല്‍ തിരക്കേറിയ ഇവിടം ബസ് പാര്‍ക്കിംഗായി മാറിയതോടെ നഗരത്തില്‍ ഗതാഗതക്കുരുക്കിന് കാരണമാകുന്നു.
തിരക്കേറിയ സമയങ്ങളില്‍ പോലും പതിനഞ്ച് മിനിട്ടിലധികം സമയം ഒന്നിലധികം സ്വകാര്യ ബസുകള്‍ ഇവിടെ നിര്‍ത്തിയിടുന്നത് പതിവാണ്.ഗതാഗത നിയന്ത്രണത്തിനായി നഗരത്തില്‍ വിന്യസിച്ചിട്ടുള്ള ഹോംഗാര്‍ഡുകളുടെ നിര്‍ദേശങ്ങള്‍ പാലിക്കാന്‍ കൂട്ടാക്കാത്ത ബസ് ജീവനക്കാര്‍ ഇവരെ അസഭ്യം പറയുന്നതും പതിവാണ്. താലൂക്ക് വികസനസമിതി യോഗങ്ങളില്‍ പല തവണ സ്വകാര്യ ബസുകള്‍ കല്ലുംകടവിലെ ബസ് സ്റ്റാന്റില്‍ പാര്‍ക്ക് ചെയ്യണമെന്ന് തീരുമാനമെടുത്തിരുന്നെങ്കിലും ബസ് ജീവനക്കാരും,ഉടമകളും ചേര്‍ന്ന് നിയമം ലംഘിക്കുകയാണ്.
ബസ് ജീവനക്കാര്‍ തമ്മില്‍ നടക്കുന്ന തര്‍ക്കങ്ങളും ഗതാഗതക്കുരുക്ക് സൃഷ്ടിക്കാറുണ്ട്.നടുറോഡില്‍ ജീവനക്കാര്‍ തമ്മിലുണ്ടാകുന്ന കയ്യാങ്കളി യാത്രക്കാര്‍ക്കും തലവേദനയാണ്. സ്വകാര്യ ബസ്റ്റാന്റ് സാമൂഹ്യവിരുദ്ധരുടെ താവളമായി മാറിയിരിക്കുകയാണ്.ഇവിടം ഫലപ്രദമായി വിനിയോഗിക്കാന്‍ അധികൃതര്‍ തയാറാകുന്നില്ലെന്നും ആക്ഷേപമുണ്ട്.
