കണ്ണൂർ: കണ്ണൂരിൽ ആംബുലൻസ് നിയന്ത്രണം ആൽമരത്തിലിടിച്ച് മൂന്ന് പേർ മരിച്ചു. ഒരാൾക്ക് ഗുരുതരപരിക്കേറ്റു. പയ്യാവൂർ ചുണ്ടപ്പറന്പ് സ്വദേശികളായ വെട്ടിക്കുഴിയിലെ ബിജോ (45), ഭാര്യ റെജീന (37), ഡ്രൈവറായ വാതിൽമട ഭൂതത്താൻ കോളനിയിലെ ഒറ്റേടത്ത് നിധിന്‍രാജ് (40) എന്നിവരാണ് മരിച്ചത്.
റെജീനയുടെ സഹോദരൻ കാവുന്പായി സ്വദേശി ബെന്നി (43)യാണ് ഗുരുതര പരിക്കുകളോടെ ചികിത്സയിലുള്ളത്.പയ്യാവൂർ വാതിൽമട ഭൂതത്താൻ ട്രസ്റ്റിന്‍റെ ആംബുലൻസാണ് ഇന്ന് പുലർച്ചെ 5.30 തോടെ അപകടത്തിൽപ്പെട്ടത്. കണ്ണൂര്‍ എളയാവൂരിനടത്ത് വെച്ച് നിയന്ത്രണംവിട്ട ആംബുലൻസ് ആൽമരത്തിലേക്ക് ഇടിച്ചുകയറുകയായിരുന്നു.
മരിച്ച ബിജോയ്ക്ക് രക്തത്തിലെ ഓക്സിജന്‍റെ അളവ് കുറഞ്ഞതുമൂലം പയ്യാവൂരിലെ മേഴ്സി ഹോസ്പിറ്റലിൽ നിന്നും കണ്ണൂരിലെ സ്വകാര്യ ആശുപത്രിയിലേക്ക് പോകവേയാണ് അപകടം. പരിക്ക് പറ്റിയ ബെന്നി കണ്ണൂർ ജില്ലാ ആശുപത്രിയിൽ ചികിത്സയിലാണ്.
പത്ത് വർഷമായി ബിജോയും റെജീനയും ചുണ്ടപ്പറമ്പിൽ വാടകയ്ക്ക് താമസിച്ചു വരികയായിരുന്നു. മരിച്ച മൂന്ന് പേരുടേയും മൃതദേഹം ജില്ലാശുപത്രി മോർച്ചറിയിലാണുള്ളത്.പൊട്ടൻപ്ലാവ് വെട്ടികുഴി മൈക്കി‌ൾ-ഗ്രേസി ദന്പതികളുടെ മകനാണ് മരിച്ച ബിജോ. ടൂറിസ്റ്റ് ടാക്സി ഡ്രൈവറാണ്.
റെജീന മണിക്കടവ് സെന്‍റ് തോമസ് സ്കൂളിലെ അധ്യാപികയാണ്. മക്കൾ: മെറി ത്രേസ്യ, എബിൻ. വാതിൽമട ഭൂതത്താൻ കോളനിയിലെ വിജയൻ- രാധാമണി ദന്പതികളുടെ മകനാണ് മരിച്ച നിധിൻ രാജ്. സഹോദരി: നിതിന മോൾ.
