കോട്ടയം: കോട്ടയം അതിരൂപതയുടെ സഹായ മെത്രാന്‍ മോണ്‍. തോമസ് ആനിമൂട്ടിലിന്‍റെ മെത്രാഭിഷേക ശുശ്രൂഷകള്‍ ഇന്ന് ഉച്ചകഴിഞ്ഞ് രണ്ടിന് കോട്ടയം ക്രിസ്തുരാജ കത്തീഡ്രലിൽ നടക്കും.
മെത്രാഭിഷേക ചടങ്ങുകള്‍ക്ക് കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് മുഖ്യകാര്‍മികത്വം വഹിക്കും. ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍, തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനി എന്നിവര്‍ സഹകാര്‍മികരായിരിക്കും.
കോഴിക്കോട് ആര്‍ച്ച്ബിഷപ്പും കെസിബിസി പ്രസിഡന്‍റുമായ ഡോ. വര്‍ഗീസ് ചക്കാലയ്ക്കല്‍ സന്ദേശം നല്‍കും. തുടര്‍ന്ന് മാര്‍ തോമസ് ആനിമൂട്ടില്‍ വിശുദ്ധ കുര്‍ബാന അര്‍പ്പിക്കും. തിരുവല്ല ആര്‍ച്ച്ബിഷപ് തോമസ് മാര്‍ കൂറിലോസ് അനുമോദനസന്ദേശം നല്‍കും.
തീക്ഷ്ണമതിയായ അജപാലകന്‍
(ഫാ. മൈക്കിള്‍ വെട്ടിക്കാട്ട്, വികാരി ജനറാള്‍, കോട്ടയം അതിരൂപത)
തനിക്ക് ഏല്‍പ്പിക്കപ്പെടുന്ന ദൈവജനത്തെ സഭയോടു ചേര്‍ത്തുനിര്‍ത്തി സ്വര്‍ഗരാജ്യം ലക്ഷ്യമാക്കി നയിക്കുകയെന്ന ഇടയദൗത്യം മേല്‍പ്പട്ട ശുശ്രൂഷയിലൂടെ നിര്‍വഹിക്കാന്‍ ദൈവം തെരഞ്ഞെടുത്ത മോണ്‍. തോമസ് ആനിമൂട്ടിലിന് പ്രാര്‍ത്ഥനാനിര്‍ഭരമായ ആശംസകള്‍ നേരുന്നു.
പൗരോഹിത്യ ശുശ്രൂഷയില്‍ നാളിതുവരെ ഏല്‍പ്പിക്കപ്പെട്ട വൈവിധ്യങ്ങളായ ദൗത്യങ്ങള്‍ വലിയ ഉത്തരവാദിത്വത്തോടെയും കാര്യക്ഷമതയോടെയും നിര്‍വഹിച്ച ചരിത്രമാണ് മോണ്‍. തോമസ് ആനിമൂട്ടിലിനുള്ളത്. വികാരി എന്ന നിലയില്‍ അജഗണങ്ങളെ നയിക്കുന്നതിനുള്ള അസാധാരണമായ പ്രാഗത്ഭ്യം വിവിധ ഇടവകകളിലെ ശുശ്രൂഷകളിലൂടെ അദ്ദേഹം തെളിയിച്ചിട്ടുണ്ട്.
ആരായിരിക്കണം ഒരു അജപാലകന്‍ എന്ന വ്യക്തമായ ദര്‍ശനം അദ്ദേഹത്തിനുണ്ട്. ഇടവക ശുശ്രൂഷകളിലെ അദ്ദേഹത്തിന്റെ വിജയത്തിന്റെ അടിസ്ഥാനം ഈ ദര്‍ശനമാണെന്നാണ് ഞാന്‍ മനസിലാക്കിയിട്ടുള്ളത്. അച്ചടക്കമുള്ളതും കൃത്യതയുള്ളതുമായ ജീവിതശൈലിയും അനുദിന ജീവിതചര്യകളും മോണ്‍. തോമസ് ആനിമൂട്ടിലിന്‍റെ പ്രത്യേകതയാണ്.
എല്ലാ കാര്യങ്ങളും കൃത്യതയോടും വ്യക്തതയോടും കൂടി ആദ്യംതന്നെ പ്ലാന്‍ ചെയ്യും. തന്നില്‍ ഏല്‍പ്പിക്കപ്പെടുന്ന അജഗണത്തിന്റെ ജീവിത സാഹചര്യങ്ങളും പശ്ചാത്തലങ്ങളും മനസിലാക്കുന്നതിനും വ്യക്തിബന്ധങ്ങള്‍ സ്ഥാപിക്കുന്നതിനുമായി ഭവന സന്ദര്‍ശനം ഇടവകകളില്‍ അതിവേഗം പൂര്‍ത്തിയാക്കും. തന്റെ അജഗണത്തെ ശ്രദ്ധിക്കുന്നതിലും അവര്‍ക്ക് ആവശ്യമായ മാര്‍ഗനിര്‍ദേശങ്ങള്‍ കൃത്യമായി നല്‍കുന്നതിലുമുള്ള സവിശേഷമായ ഒരു കഴിവ് ഇടവകശുശ്രൂഷകളില്‍ ആനിമൂട്ടില്‍ അച്ചന് സ്വന്തമായിരുന്നു. ഇടവകകളിലെ വിവിധ സംഘടനകള്‍ സജീവമായി പ്രവര്‍ത്തിക്കുന്നതിന് ആവശ്യമായ സാഹചര്യങ്ങള്‍ ഒരുക്കുകയും അവരെ പ്രോത്സാഹിപ്പിക്കുകയും ചെയ്യും.
ഇടവകയിലെ കൊച്ചുകുട്ടികള്‍ മുതല്‍ പ്രായമായവര്‍വരെ, തന്നെ സമീപിക്കുമ്പോഴുള്ള ആ ചെറുപുഞ്ചിരിയും, പേരുചൊല്ലി വിളിച്ചുള്ള ആത്മബന്ധവും അദ്ദേഹത്തെ അടുത്തറിഞ്ഞവര്‍ക്ക് ഒരിക്കലും മറക്കാന്‍ കഴിയാത്തതാണ്. എല്ലാവരെയും പേരുചൊല്ലി വിളിക്കാന്‍ കഴിയുന്നത് വെറും ഓര്‍മശക്തിയായിരുന്നില്ല, ഹൃദയത്തില്‍നിന്നുള്ള കരുതലാണ്. ഓരോ വ്യക്തിയെയും വ്യക്തിപരമായി അറിയാനും, അവരുടെ കുടുംബവിശേഷങ്ങള്‍ ഓര്‍മിക്കാനും അദ്ദേഹം ശ്രദ്ധിക്കും. ആരെയും അകറ്റി നിര്‍ത്താതെ, എല്ലാവരെയും ചേര്‍ത്തുനിര്‍ത്തുമ്പോഴും തന്റെ നിലപാടുകളില്‍ ഒരു വിട്ടുവീഴ്ചയും ചെയ്യാതെ ഉറച്ചുനില്‍ക്കുകയും ചെയ്യും. രണ്ട് അഭിപ്രായത്തിന് ഇടം കൊടുക്കാതെ, കാര്യങ്ങള്‍ വ്യക്തമായി അവതരിപ്പിക്കാനും നടപ്പാക്കാനും അദ്ദേഹം കാണിച്ച ആര്‍ജവം ഇടവകകളുടെ ആത്മീയവും ഭൗതികവുമായ വളര്‍ച്ചയ്ക്ക് വഴിയൊരുക്കുന്നുവെന്നത് ശ്രദ്ധേയമാണ്.
മെത്രാന്‍റെ ദൗത്യത്തിനു പൊതുവില്‍ മൂന്നു തലങ്ങളുണ്ട്. ദൈവജനത്തെ വിശുദ്ധീകരിക്കുക, പ്രബോധിപ്പിക്കുക, രൂപതയെയും ദൈവജനത്തെയും നയിക്കുക. ഈ മൂന്ന് ദൗത്യങ്ങളുടെയും വിത്തുകള്‍ മോണ്‍. ആനിമൂട്ടിലിന്‍റെ വൈദികജീവിതത്തില്‍ നേരത്തെതന്നെ കാണാന്‍ കഴിഞ്ഞിട്ടുണ്ട്. വൈദികന്‍റെ ഏറ്റവും വലിയ ദൗത്യം മനുഷ്യരെ ദൈവത്തിലേക്ക് അടുപ്പിക്കുക എന്നതാണ്. ഔപചാരിക മതജീവിതത്തിനപ്പുറം, മനുഷ്യരുടെ ജീവിതത്തിലേക്ക് കടന്നുചെന്ന് അവരോടൊപ്പം ആയിരിക്കാനുള്ള പ്രത്യേക കഴിവ് അദ്ദേഹത്തിനുണ്ട്. തന്നെ സമീപിക്കുന്നവര്‍ക്ക് അദ്ദേഹം സംലഭ്യനായിരുന്നു.
മനുഷ്യബന്ധങ്ങള്‍ സൂക്ഷിക്കുന്നതിലും സൗഹൃദങ്ങള്‍ ഊട്ടി ഉറപ്പിക്കുന്നതിലും ഏറെ ശ്രദ്ധിക്കും. കൂടാതെ നല്ല ഒരു കേള്‍വിക്കാരനും, ശാന്തതയോടെ കാര്യങ്ങള്‍ പഠിച്ച് തീരുമാനങ്ങള്‍ എടുക്കാന്‍ പ്രാപ്തനുമാണ്. ദൈവം നല്കിയ ഈകഴിവുകള്‍ ഫലപ്രദമായി അര്‍പ്പണബോധത്തോടെ നിര്‍വഹിച്ചതിനാലാണ് താന്‍ ശുശ്രൂഷചെയ്ത വിവിധ സ്ഥാപനങ്ങളിലും മികവാര്‍ന്ന പ്രര്‍ത്തനങ്ങള്‍ നടത്തി ദീര്‍ഘവീക്ഷണമുള്ള നല്ല ഒരു ഭരണകര്‍ത്താവും ടീം ലീഡറുമായി വിജയിക്കുവാന്‍ നിയുക്ത പിതാവിന് സാധിച്ചത്.
മലബാറിലെ കുടിയേറ്റ കര്‍ഷക ഭവനത്തില്‍ ജനിച്ചുവളര്‍ന്ന്, സാധാരണക്കാരന്‍റെ നോവും വേവും അറിയാവുന്നതിനാല്‍തന്നെ ചോര പൊടിയുന്ന തമ്പുരാന്‍റെ മുഖം ഏവരിലും ദര്‍ശിച്ച് തനിക്കേല്‍പ്പിക്കപ്പെട്ട ദൈവജനത്തെ ഒന്നായി ചേര്‍ത്തുപിടിച്ച് ദൈവം കൃപയായി നല്കിയ ഇടയദൗത്യം ദൈവമഹത്വത്തിനും ദൈവജനത്തിന്റെ നന്മയ്ക്കുമായി നിര്‍ഭയം എളിമയോടെ നിര്‍വഹിക്കുവാന്‍ മോണ്‍. തോമസ് ആനിമൂട്ടിലിനു സാധിക്കും.
നൂറ്റാണ്ടുകളുടെ പാരമ്പര്യം പേറുന്ന ക്‌നാനായ സമുദായം, കാലാകാലങ്ങളായി നെഞ്ചോടു ചേര്‍ത്തു കാത്തുസൂക്ഷിച്ചു പകര്‍ന്നുതന്ന ആചാരങ്ങളെയും പാരമ്പര്യങ്ങളെയും മുറുകെ പിടിച്ചുകൊണ്ടും, കാലത്തിന്‍റെ മാറ്റങ്ങള്‍ ഉള്‍ക്കൊണ്ടുകൊണ്ടും സ്‌നേഹത്തിലും ഐക്യത്തിലും ദൈവാശ്രയബോധത്തിലും ദൈവജനത്തെ നയിക്കുവാന്‍ നിയുക്ത പിതാവിന് സാധിക്കട്ടെ. മേല്‍പ്പട്ടശുശ്രൂഷയില്‍ എല്ലാവിധമായ നന്മകളും ദൈവാനുഗ്രഹവും ഹൃദയപൂര്‍വ്വം ആശംസിക്കുന്നു.
കര്‍മ്മനിരതമായ പൗരോഹിത്യ ജീവിതം: കോട്ടയം അതിരൂപതയുടെ പുതിയ സഹായമെത്രാന്‍
(റവ. ഡോ. ബിനു കുന്നത്ത്, സി.ഇ.ഒ & ഡയറക്ടര്‍, കാരിത്താസ് ഹോസ്പിറ്റല്‍)
കാര്യക്ഷമതയും വിവേകവും ഇഴചേര്‍ന്ന അപൂര്‍വ്വ ഭരണമികവിന്‍റെ മാതൃകയാണ് കോട്ടയം ക്‌നാനായ കത്തോലിക്കാ അതിരൂപതയുടെ നിയുക്ത സഹായമെത്രാന്‍ അഭി. മാര്‍ തോമസ് ആനിമൂട്ടില്‍ പിതാവ്. റോമിലെ പൊന്തിഫിക്കല്‍ യൂണിവേഴ്‌സിറ്റി ഓഫ് ദ ഹോളി ക്രോസ്സില് നിന്ന് കാനന്‍ നിയമത്തില്‍ നേടിയ ലൈസന്‍ഷ്യേറ്റ് അദ്ദേഹത്തിന്റെ ഭരണപരമായ നേതൃപാടവത്തിന് അടിത്തറ പാകിയ ഒന്നാണ്.
ഇടവക വികാരിയായിട്ടായിരുന്നു അദ്ദേഹത്തിന്റെ പൗരോഹിത്യ ശുശ്രൂഷയുടെ തുടക്കം. പുളിഞ്ഞാല്‍ ഇടവകയിലെ സേവനത്തിന് ശേഷം അതിരൂപതാ മെത്രാനായിരുന്ന അഭിവന്ദ്യ മാര്‍ കുര്യാക്കോസ് കുന്നശ്ശേരി പിതാവിന്‍റെ സെക്രട്ടറിയായും തുടര്‍ന്ന് അതിരൂപതയുടെ ചാന്‍സലറായും അദ്ദേഹം ചുമതലയേറ്റു. ഔദ്യോഗിക രേഖകളുടെ സൂക്ഷിപ്പും നിയമനടപടികളും ഭരണപരമായ ക്രമീകരണങ്ങളും ഒരുപോലെ നിര്‍വഹിക്കേണ്ടിയിരുന്ന ചാന്‍സലര്‍ പദവിയില്‍ അദ്ദേഹത്തിന്റെ കാനന്‍ നിയമത്തിലുള്ള അറിവ് വലിയൊരു കരുത്തായി മാറി. വിവാഹ ട്രൈബ്യൂണലിന്റെ ജഡ്ജി എന്ന നിലയിലും അദ്ദേഹം തന്റെ നീതിന്യായപരമായ മികവ് തെളിയിച്ചു.
ഉഴവൂര്‍ ഫൊറോനയില്‍ അഞ്ചു വര്‍ഷവും കടുത്തുരുത്തി ഫൊറോനയില്‍ ഒമ്പതു മാസവും ഫൊറോനാ വികാരിയായി സേവനം അനുഷ്ഠിച്ച അദ്ദേഹം, നിരവധി ഇടവകകളെ ഏകോപിപ്പിച്ചുകൊണ്ട് ഇടയശുശ്രൂഷയും ഭരണനിര്‍വഹണവും വിജയകരമായി മുന്നോട്ടുകൊണ്ടുപോയി.
പാസ്റ്ററല്‍ കൗണ്‍സിലിന്‍റെയും പ്രെസ്ബിറ്ററല്‍ കൗണ്‍സിലിന്‍റെയും സെക്രട്ടറി പദവികളില്‍ പ്രവര്‍ത്തിച്ചുകൊണ്ട് അതിരൂപതയുടെ സുപ്രധാന തീരുമാനമെടുക്കല്‍ പ്രക്രിയകളിലും അദ്ദേഹം സജീവ പങ്കാളിയായി.
മലബാര്‍ മേഖലയിലെ പ്രൊക്യുറേറ്ററായും കണ്ണൂര്‍ ബറുമറിയം പാസ്റ്ററല്‍ സെന്റര് ഡയറക്ടറായും അദ്ദേഹം നിര്‍വഹിച്ച ചുമതലകള്‍ ഭരണപാടവത്തിന്‍റെ മറ്റൊരു മുഖമാണ് വെളിപ്പെടുത്തുന്നത്.
2003 മുതല്‍ 2008 വരെ അമേരിക്കയിലെ സെന്‍റ് തോമസ് ദി അപ്പോസില്‍ ഓഫ് ചിക്കാഗോ എപാര്‍ക്കിയില്‍ സേവനമനുഷ്ഠിച്ച അദ്ദേഹം, ലോസ് ആഞ്ചലസ്, ന്യൂയോര്‍ക്ക്, ന്യൂ ജേഴ്‌സി എന്നിവിടങ്ങളിലെ ക്‌നാനായ മിഷനുകളുടെ ഡയറക്ടറായി പ്രവര്‍ത്തിച്ചു. സാംസ്‌കാരികമായ വൈവിധ്യങ്ങളും ഭാഷാപരമായ വെല്ലുവിളികളും നിറഞ്ഞ വിദേശ സാഹചര്യങ്ങളിലും പ്രവാസി സമൂഹത്തിന്‍റെ ആത്മീയവും ഭരണപരവുമായ ആവശ്യങ്ങള്‍ കൃത്യമായി നിറവേറ്റാന്‍ അദ്ദേഹത്തിന് സാധിച്ചു.
കോട്ടയം കാരിത്താസ് ആശുപത്രിയുടെ ഭരണരംഗത്ത് പതിനൊന്നു വര്‍ഷം നീണ്ട ശ്രദ്ധേയമായ സേവനമാണ് അദ്ദേഹം കാഴ്ചവച്ചത്. ആശുപത്രിയുടെ വളര്‍ച്ചയുടെ സുവര്‍ണ്ണ കാലഘട്ടമായിരുന്നു അത്. ഡയറക്ടര്‍ എന്ന നിലയില്‍ ദൈനംദിന ഭരണം, സാമ്പത്തിക നിയന്ത്രണം, അടിസ്ഥാന സൗകര്യ വികസനം, ഗുണനിലവാര മാനദണ്ഡങ്ങള്‍ എന്നിവയില്‍ അദ്ദേഹം നിര്‍ണ്ണായക നേതൃത്വം നല്‍കി. പാരിസ്ഥിതിക അനുമതി ഉള്‍പ്പെടെയുള്ള സങ്കീര്‍ണ്ണമായ വിപുലീകരണ നടപടികള്‍ക്ക് നേതൃത്വം നല്‍കിയതും ഈ കാലയളവിലാണ്. സഭാപരമായ മൂല്യങ്ങളും ആധുനിക ആരോഗ്യ സേവന രംഗത്തെ മാനദണ്ഡങ്ങളും ഒരുപോലെ സംയോജിപ്പിച്ചുകൊണ്ട് കാരിത്താസിനെ ഒരു മള്‍ട്ടി സൂപ്പര്‍ സ്‌പെഷ്യാലിറ്റി സ്ഥാപനമാക്കി ഉയര്‍ത്തുന്നതില്‍ അദ്ദേഹത്തിന്റെ ഭരണപരിജ്ഞാനം നിര്‍ണ്ണായകമായി.
2025 ഫെബ്രുവരി മുതല്‍ അതിരൂപത പ്രൊ – പ്രോട്ടോ സിന്‍സെഞ്ചുല്ലസ് (വികാരി ജനറല്‍) ആയി ചുമതലയേറ്റപ്പോഴും അദ്ദേഹത്തിന്റെ അഡ്മിനിസ്‌ട്രേറ്റീവ് മികവ് തെളിഞ്ഞുനിന്നു. അതിരൂപതയുടെ ദൈനംദിന കാര്യങ്ങള്‍, സ്ഥാപനങ്ങളുടെ മേല്‍നോട്ടം, സാമൂഹിക സേവന പ്രവര്‍ത്തനങ്ങള്‍ എന്നിവ അദ്ദേഹം കാര്യക്ഷമമായി ഏകോപിപ്പിച്ചു. കോട്ടയം സോഷ്യല്‍ സര്‍വീസ് സൊസൈറ്റിയുടെ പ്രസിഡന്‍റ് എന്ന നിലയിലും സാമൂഹ്യക്ഷേമ പ്രവര്‍ത്തനങ്ങള്‍ക്ക് അദ്ദേഹം കൃത്യമായ ദിശാബോധം നല്‍കി.
കാനന്‍ നിയമത്തിലുള്ള ആഴമായ അറിവ്, മികച്ച സംഘടനാ പാടവം, പ്രവാസി സമൂഹത്തോടുള്ള കരുതല്‍, സാമൂഹിക ഉത്തരവാദിത്ത ബോധം എന്നിവയെല്ലാം ഒത്തിണങ്ങിയ സമഗ്രവ്യക്തിത്വമാണ് മാര്‍ തോമസ് ആനിമൂട്ടില്‍ പിതാവ്. സഹായമെത്രാന്‍ എന്ന നിലയിലുള്ള അദ്ദേഹത്തിന്റെ പുതിയ നിയോഗം കോട്ടയം അതിരൂപതയുടെ ഭരണപരമായ കരുത്ത് കൂടുതല്‍ ഉയരങ്ങളിലെത്തിക്കുമെന്ന് തീര്‍ച്ചയാണ്
മലബാറിലെ കുടിയേറ്റ മണ്ണില്‍ നിന്നൊരു ഇടയശ്രേഷ്ഠന്‍
(ഫാ. ജോയി കട്ടിയാങ്കല്‍, ബറുമറിയം പാസ്റ്ററല്‍ സെന്റര് ഡയറക്ടര്‍ കണ്ണൂര്‍)
കഠിനാധ്വാനത്തിന്റെയും ആത്മസമര്‍പ്പണത്തിന്‍റെയും പാരമ്പര്യമുള്ള മലബാറിന്‍റെ മണ്ണില്‍ നിന്ന് കോട്ടയം അതിരൂപത സഹായ മെത്രാനായി ഉയര്‍ത്തപ്പെടുന്ന മാര്‍ തോമസ് ആനിമൂട്ടിലിന്‍റെ നിയമനം മലബാര്‍ ജനതയ്ക്ക് വിശേഷിച്ച് ക്‌നാനായ കുടിയേറ്റ ജനതയ്ക്ക് വലിയ സന്തോഷവും ആത്മനിര്‍വൃതിയും നല്‍കുന്നു.
സെമിനാരിയിലെ പരിശീലനകാലം മുതല്‍ അടുത്തറിയാവുന്ന ഒരാളെന്ന നിലയില്‍ അദ്ദേഹത്തിലെ നന്മയും വ്യക്തിപരമായ ഗുണങ്ങളും ഉറപ്പുള്ള സൗഹൃദവും നിലപാടുകളിലെ ദൃഢതയും തീരുമാനങ്ങളിലെ ആര്‍ജവവും അടുത്തറിഞ്ഞിട്ടുണ്ട്. ബന്ധങ്ങളുടെ ഇഴയടുപ്പം കാത്തുസൂക്ഷിക്കാനും സഹപ്രവര്‍ത്തകരെ പരിഗണിക്കാനും എപ്പോഴും അദ്ദേഹം ശ്രദ്ധാലുവായിരുന്നു. ഇടപെടുന്നവരോട് അദ്ദേഹം കാണിക്കുന്ന കരുതലും മാന്യതയും പക്വതയും പ്രശംസനീയമാണ്. കൃത്യതയോടും സമയനിഷ്ഠയോടും ഉത്തരവാദിത്വത്തോടും കാര്യങ്ങളെ യഥാവിധി തിരിച്ചറിഞ്ഞ് ഭാവി മുന്നില്‍കണ്ടുകൊണ്ട് പ്രവര്‍ത്തിക്കാന്‍ പിതാവ് എപ്പോഴും തത്പരനാണ്.
പിതാവ് ഒരു നല്ല സംഭാഷകനും അതിലേറെ കേള്‍വിക്കാരനും ശാന്തതയോടെ കാര്യങ്ങള്‍ പഠിച്ച് തീരുമാനങ്ങള്‍ എടുക്കാന്‍ പ്രാപ്തനുമാണെന്ന കാര്യം പ്രത്യേകം എടുത്തു പറയേണ്ടതുതന്നെ. ഒരു കര്‍ഷക കുടുംബത്തില്‍ ജനിച്ചു വളര്‍ന്ന പിതാവിന് സാധാരണക്കാരന്‍റെ നോവും ആവലാതികളും എളുപ്പത്തില്‍ തിരിച്ചറിയാന്‍ സാധിക്കുമെന്നതിനാല്‍ ദൈവജനത്തെ ചേര്‍ത്തു പിടിച്ച് ദൈവം കൃപയായി നല്കിയ മേല്പട്ട ശുശ്രൂഷ ദൈവമഹത്വത്തിനും ജനനന്മയ്ക്കുമായി നിര്‍ഭയം നിര്‍വഹിക്കാന്‍ പിതാവിന് സാധിക്കും.
കോട്ടയം അതിരൂപതയുടെ മലബാര്‍ റീജിയണിന്‍റെ ആത്മപാലന കേന്ദ്രമായ ബറുമറിയം പാസ്റ്ററല്‍ സെന്ററിന്‍റെ ഡയറക്ടറും മലബാറിന്‍റെ സാമ്പത്തിക കാര്യ വിചാരിപ്പുകാരന്‍ എന്ന നിലയിലും അഞ്ചു വര്‍ഷക്കാലം ചെയ്ത സ്തുത്യര്‍ഹമായ ശുശ്രൂഷകള്‍ വളരെ മഹത്തരവും ത്യാഗപൂര്‍ണവും ഫലദായകവുമായിരുന്നു. മലബാറിലെ ജനത്തിന്‍റെ അരിഷ്ടതകള്‍ മനസിലാക്കി കാലോചിതവും ഭാവിയെ മുന്‍നിറുത്തിയുള്ള കാര്യങ്ങളും നിര്‍മാണ പ്രവര്‍ത്തനങ്ങളും നടത്താന്‍ അക്കാലത്ത് അദ്ദേഹം ശ്രദ്ധിച്ചു.
വയനാട്ടില്‍ പുളിഞ്ഞാല്‍ ക്രിസ്തുരാജ പള്ളിയില്‍ വികാരിയായിരുന്ന പിതാവ് അന്നത്തെ പ്രതികൂല കാലാവസ്ഥയും സാമ്പത്തിക പരാധീനതകളും മറികടന്ന് ഇടവകജനത്തെ ചേര്‍ത്തു നിര്‍ത്തി വൈദിക മന്ദിരവും മറ്റു നിര്‍മാണ പ്രവര്‍ത്തനങ്ങളും നടത്തുന്നതിന് കൊടുത്ത ധീരമായ നേതൃത്വവും എടുത്ത ത്യാഗങ്ങളും ആ ഇടവകജനം എന്നും നന്ദിയോടെയാണ് അനുസ്മരിക്കുന്നത്.
വ്യക്തിജീവിതത്തിന്‍റെ നന്മയും അനുഭവ സമ്പത്തും ദീര്‍ഘമായ ആജപാലന പരിചയവും ക്‌നാനായ ജനത്തോടുള്ള സ്‌നേഹവും വരുംനാളുകളില്‍ തന്നെ ദൈവം ഭരമേല്പിക്കുന്ന ദൗത്യം കൂടുതല്‍ ഫലപ്രദമായി നിര്‍വഹിക്കാന്‍ ഇടവരുത്തും.
ക്‌നാനായ ജനതയ്ക്കുവേണ്ടി നാളിതുവരെ ശുശ്രൂഷചെയ്ത പിതാവില്‍ ലോകമാസകലമുള്ള ക്‌നാനായ ജനത വലിയ പ്രതീക്ഷയാണ് അര്‍പ്പിക്കുന്നത്.
അവരുടെ വിശ്വാസവും സ്വത്വബോധവും പാരമ്പര്യങ്ങളും ശക്തിപ്പെടുത്തുന്നതോടൊപ്പം അവര്‍ നേരിടുന്ന പ്രശ്‌നങ്ങള്‍ക്ക് പരിഹാരം കണ്ടെത്താനും നല്ല മാറ്റങ്ങള്‍ക്ക് നേതൃത്വം നല്‍കാനും അദ്ദേഹത്തിന് കഴിയട്ടെ. മലബാറിലെ അനുഭവസമ്പത്തും പ്രത്യേകതകളും വെല്ലുവിളികളും അടുത്തറിയുന്ന ഒരിടയന്‍ എന്ന നിലയില്‍ കോട്ടയം അതിരൂപതയ്ക്കും വിശിഷ്യ മലബാറിന്‍റെ സമഗ്ര വികസനത്തിനും ആസൂത്രിതവും കാലോചിതവുമായ നീക്കങ്ങള്‍ നടത്താന്‍ പിതാവിന് സാധിക്കട്ടെ എന്ന് പ്രാര്‍ഥിക്കുന്നു.
സാമൂഹിക ദര്‍ശനവും സേവനവും കൈമുതലാക്കിയ ഇടയന്‍
(ഫാ. സുനില്‍ പെരുമാനൂര്‍, എക്‌സിക്യൂട്ടീവ് ഡയറക്ടര്‍, കോട്ടയം സോഷ്യല്‍ സര്‍വ്വീസ് സൊസൈറ്റി)
ചില നിയമനങ്ങള്‍ സ്ഥാനങ്ങളിലേക്കുള്ള ഉയര്‍ച്ച മാത്രമല്ല. മറിച്ച് ജീവിത യാത്രയിലൂടെ നടന്നു വന്ന വഴികള്‍ക്ക് ലഭിക്കുന്ന അംഗീകാരം കൂടിയാണ്. കോട്ടയം അതിരൂപതയുടെ പുതിയ സഹായ മെത്രാനായി മാര്‍ തോമസ് ആനിമൂട്ടിലിനെ തിരഞ്ഞെടുത്തത് അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല്‍ സര്‍വീസ് സൊസൈറ്റിയെ സംബന്ധിച്ചിടത്തോളം ഏറെ അഭിമാനവും സന്തോഷവും നിറഞ്ഞ നിമിഷമാണ്. സാമൂഹിക പ്രതിബദ്ധതയും മനുഷ്യസ്‌നേഹവും സഭാദര്‍ശനവും സമന്വയിപ്പിച്ച അദ്ദേഹത്തിന്റെ പ്രവര്‍ത്തന മികവിനുള്ള അംഗീകാരം കൂടിയാണ് ഈ പുതിയ സ്ഥാനലബ്ധി.
കോട്ടയം സോഷ്യല്‍ സര്‍വ്വീസ് സൊസൈറ്റിയുടെ പ്രസിഡന്‍റ് എന്ന നിലയില്‍ ഫാ. തോമസ് ആനിമൂട്ടില്‍ നയിച്ച പ്രവര്‍ത്തനങ്ങള്‍ക്ക് പിന്നില്‍ വ്യക്തമായ ഒരു സാമൂഹിക ദര്‍ശനം ഉണ്ടായിരുന്നു. സമൂഹത്തിന്‍റെ വികസനത്തെ അദ്ദേഹം കണ്ടത് കെട്ടിടങ്ങളുടെയും പദ്ധതികളുടെയും കണക്കുകളിലൂടെ മാത്രമല്ല, മറിച്ച് മനുഷ്യരുടെ ജീവിതത്തില്‍ ഉണ്ടാകുന്ന മാറ്റങ്ങളിലൂടെയുമാണ്. ദരിദ്രനും അവഗണിക്കപ്പെട്ടവനും ഭിന്നശേഷിക്കാരനും പാര്‍ശ്വവല്‍ക്കരിക്കപ്പെട്ട ജനവിഭാഗവും വികസനത്തിന്‍റെ അവകാശികളാണെന്ന ബോധ്യം അദ്ദേഹത്തിന്റെ സാമൂഹിക ഇടപെടലുകള്‍ക്ക് കരുത്തായി.
കോട്ടയം അതിരൂപതയുടെ സാമൂഹിക പ്രവര്‍ത്തനങ്ങള്‍ക്ക് ദിശാബോധം നല്‍കുകയും അവയ്ക്ക് നേതൃത്വം നല്‍കുകയും ചെയ്തുകൊണ്ടിരിക്കുന്ന ഫാ. തോമസ് ആനിമൂട്ടിലിന്‍റെ പ്രവര്‍ത്തനങ്ങളില്‍ എന്നും മുന്‍പന്തിയില്‍ നിന്നിരുന്നത് മനുഷ്യത്വപരമായ സമീപനവും സഭാത്മകമായ ദര്‍ശനവുമാണ്. സമൂഹത്തിന്‍റെ മുഖ്യധാരയില്‍ നിന്ന് മാറ്റിനിര്‍ത്തപ്പെട്ടവരെയും ദരിദ്രരെയും ഭിന്നശേഷിക്കാരെയും ചേര്‍ത്തുപിടിക്കുന്ന കരുതലിന്‍റെ സമീപനമാണ് അദ്ദേഹത്തിന്റെ സാമൂഹിക കാഴ്ചപ്പാടിന്‍റെ സവിശേഷത.
തുല്യനീതി, മാനവിക അന്തസ്സ്, സാമൂഹിക ശാക്തീകരണം എന്നിവ അദ്ദേഹത്തിന്റെ പ്രവര്‍ത്തനങ്ങളുടെ അടിസ്ഥാന മൂല്യങ്ങളാണ്. സഹായം നല്‍കുക എന്നതില്‍ മാത്രം ഒതുങ്ങാതെ, അവകാശബോധത്തോടെയും ആത്മാഭിമാനത്തോടെയും സമൂഹത്തില്‍ മുന്നേറാന്‍ പിന്നോക്കം നില്‍ക്കുന്നവരെ പ്രാപ്തരാക്കുക എന്നതായിരുന്നു അദ്ദേഹത്തിന്റെ സമീപനം.
ആര്‍ക്കുവേണ്ടിയാണ് നാം പ്രവര്‍ത്തിക്കുന്നത്? എന്ന ചോദ്യം സാമൂഹിക പ്രവര്‍ത്തനത്തിന്‍റെ ഹൃദയത്തില്‍ നിലകൊള്ളുമ്പോഴാണ് ഒരു പ്രസ്ഥാനം യഥാര്‍ത്ഥ അര്‍ത്ഥത്തില്‍ സഭയുടെ ദൗത്യമായി മാറുന്നത്. ആ തിരിച്ചറിവോടെയാണ് കോട്ടയം സോഷ്യല്‍ സര്‍വീസ് സൊസൈറ്റിയുടെ പ്രവര്‍ത്തനങ്ങളെ അദ്ദേഹം സമീപിച്ചതും ബലപ്പെടുത്തിയതും.
ദാരിദ്ര്യത്തെ കേവലം സാമ്പത്തികമായി കാണാതെ, മനുഷ്യന്‍റെ അന്തസ്സിനെയും അവകാശങ്ങളെയും ബാധിക്കുന്ന അവസ്ഥയായി കാണുകഎന്നതായിരുന്നു അദ്ദേഹത്തിന്റെ സമീപനം. പ്രകൃതിസ്‌നേഹവും അദ്ദേഹത്തിന്റെ സാമൂഹിക ദര്‍ശനത്തിന്റെ അവിഭാജ്യ ഘടകമായിരുന്നു. മനുഷ്യന്‍റെ നന്മയും പ്രകൃതിയുടെ സംരക്ഷണവും പരസ്പരം വേര്‍തിരിക്കാനാവാത്തതാണെന്ന സഭയുടെ സാമൂഹിക കാഴ്ചപ്പാടിനോട് ചേര്‍ന്നു നില്‍ക്കുന്ന പ്രവര്‍ത്തനങ്ങളെയാണ് അദ്ദേഹം പ്രോത്സാഹിപ്പിച്ചത്.
മനുഷ്യനെ സംരക്ഷിക്കുന്നതും പ്രകൃതിയെ സംരക്ഷിക്കുന്നതും ഒരേ ദൗത്യത്തിന്‍റെ രണ്ടു മുഖങ്ങളാണെന്ന ബോധ്യം അദ്ദേഹത്തിന്റെ സാമൂഹിക കാഴ്ച്ചപ്പാടിന് വിശാലത നല്‍കി. അതുകൊണ്ടുതന്നെ കോട്ടയം സോഷ്യല്‍ സര്‍വീസ് സൊസൈറ്റിയുടെ വിവിധങ്ങളായ സാമൂഹികപാരിസ്ഥിതിക പ്രവര്‍ത്തനങ്ങള്‍ക്ക് അദ്ദേഹത്തിന്റെ നേതൃത്വം ഒരു ദിശാബോധമായി നില നിന്നിരുന്നു. ഫ്രാന്‍സിസ് പാപ്പയുടെ ‘ലൗദാത്തോസി’ എന്ന ചാക്രിക ലേഖനത്തിലെ പാരിസ്ഥിതിക ദര്‍ശനം നെഞ്ചിലേറ്റിയാണ് അദ്ദേഹം പ്രകൃതിയെയും മനുഷ്യനേയും വീക്ഷിച്ചത് .
ഒരു പ്രസിഡന്റിന്‍റെ സാന്നിധ്യം ഔപചാരികമായി മാത്രം ഒതുങ്ങാതെ സൊസൈറ്റിയുടെ പരിപാടികളിലും പ്രവര്‍ത്തനങ്ങളിലും അദ്ദേഹം സജീവമായി പങ്കെടുത്തു. കോട്ടയം സോഷ്യല്‍ സര്‍വ്വീസ് സൊസൈറ്റിയുടെ നേതൃത്വത്തില്‍ മധ്യകേരളത്തിലെ ഏറ്റവും വലിയ കാര്‍ഷിക മേളയായി നടത്തപ്പെടുന്ന ചൈതന്യ കാര്‍ഷിക മേളയ്ക്കും സ്വാശ്രയസംഘ മഹോത്സവത്തിനും എപ്പോഴും നിര്‍ലോഭമായ പിന്തുണയും പ്രോത്സാഹനവും അദ്ദേഹം നല്‍കി വന്നിരുന്നു. ഒപ്പം വിവിധ ദിനാചരണങ്ങളിലും അവബോധ പരിപാടികളിലും സാമൂഹ്യക്ഷേമ പ്രവര്‍ത്തനങ്ങളിലും എപ്പോഴും അദ്ദേഹത്തിന്റെ സജീവ സാന്നിദ്ധ്യവും സഹകരണവും കോട്ടയം സോഷ്യല്‍ സര്‍വ്വീസ് സൊസൈറ്റിക്ക് ലഭിച്ചിരുന്നു. പദ്ധതി ഗുണഭോക്താക്കളോടും കെ.എസ്.എസ്.എസ് പ്രവര്‍ത്തകരോടും നേരിട്ട് ഇടപഴകുവാനും അദ്ദേഹം ശ്രദ്ധിച്ചിരുന്നു, പദ്ധതികളുടെ വിജയത്തെക്കാള്‍ അതിലൂടെ മനുഷ്യജീവിതത്തില്‍ ഉണ്ടാകുന്ന മാറ്റത്തിനാണ് അദ്ദേഹം പ്രാധാന്യം നല്‍കിയത്. സ്റ്റാഫിനോടുള്ള അദ്ദേഹത്തിന്റെ സമീപനവും ശ്രദ്ധേയമായിരുന്നു. ഒരു സ്ഥാപനത്തിന്റെ യഥാര്‍ത്ഥ ശക്തി അതിന്‍റെ കെട്ടിടങ്ങളിലോ പദ്ധതികളിലോ അല്ല, അവയ്ക്കു പിന്നില്‍ പ്രവര്‍ത്തിക്കുന്ന മനുഷ്യരിലാണെന്ന തിരിച്ചറിവോടെ ഓരോരുത്തരെയും പരിഗണിക്കുകയും പ്രോത്സാഹിപ്പിക്കുകയും അദ്ദേഹം ചെയ്തിരുന്നു. അധികാരത്തിന്റെ അകലം പാലിക്കുന്നതിനു പകരം സഹപ്രവര്‍ത്തകനിലേക്കുള്ള അടുപ്പം കാത്തുസൂക്ഷിച്ച നേതൃത്വമായിരുന്നു അദ്ദേഹം പിന്തുടര്‍ന്നിരുന്നത്.
ഫാ. തോമസ് ആനിമൂട്ടില്‍ കോട്ടയം അതിരൂപതയുടെ സഹായ മെത്രാനായി പുതിയ ദൗത്യത്തിലേക്ക് പ്രവേശിക്കുമ്പോള്‍, കോട്ടയം സോഷ്യല്‍ സര്‍വീസ് സൊസൈറ്റിക്ക് ഇത് അഭിമാന നിമിഷത്തോടൊപ്പം തങ്ങളോടൊപ്പം നടന്ന ഒരു നേതാവ് കൂടുതല്‍ വിശാലമായൊരു ശുശ്രൂഷാ മേഖലയിലേക്ക് ഉയരുന്നതിന്റെ സന്തോഷം കൂടിയാണ്. സാമൂഹിക പ്രവര്‍ത്തനത്തിന്‍റെ അനുഭവവും മനുഷ്യജീവിതത്തോടുള്ള കരുതലും സഭയുടെ സാമൂഹിക പ്രബോധനത്തിലുള്ള ആഴമായ വിശ്വാസവും പാരിസ്ഥിതിക സംരക്ഷണവും ഇനിയും അദ്ദേഹത്തിന്റെ മെത്രാന്‍ ശുശ്രൂഷയ്ക്ക് കൂടുതല്‍ വിശാലമായ മാനവികത നല്‍കട്ടെ.
ഒരു നല്ല മെത്രാന്‍ അള്‍ത്താരയില്‍ മാത്രം ദൈവത്തെ കാണുന്നവനല്ല; മനുഷ്യന്‍റെ കണ്ണീരിലും പ്രതീക്ഷയിലും ദൈവസാന്നിധ്യം തിരിച്ചറിയുന്നവനാണ്. അത്തരമൊരു തിരിച്ചറിവോടെ ദരിദ്രനൊപ്പം നില്‍ക്കാനും, ഭിന്നശേഷിക്കാരന്‍റെ കൈപിടിക്കാനും, അവഗണിക്കപ്പെട്ടവന് ശബ്ദമാകാനും, പ്രകൃതിയുടെ നിലവിളി കേള്‍ക്കാനും കഴിയുന്ന മെത്രാനായി ഫാ. തോമസ് ആനിമൂട്ടിലിന്‍റെ പുതിയ ശുശ്രൂഷ കൂടുതല്‍ ഫലപ്രദമാകട്ടെ. ദരിദ്രന്‍റെ കണ്ണീരില്‍ ദൈവത്തിന്‍റെ മുഖം കാണുകയും, അവഗണിക്കപ്പെട്ടവന്‍റെ ജീവിതത്തില്‍ പ്രത്യാശയുടെ വെളിച്ചം പകരുകയും ചെയ്യുന്ന ഒരു ശുശ്രൂഷയാണ് സഭയുടെ സാമൂഹിക ദൗത്യം. ആ ദൗത്യത്തിന് തന്റെ ജീവിതവും നേതൃത്വവും സമര്‍പ്പിച്ച ഫാ. തോമസ് ആനിമൂട്ടിലിന് പുതിയ ശുശ്രൂഷാ ദൗത്യത്തിലും അതേ കരുതലിന്‍റെ കരങ്ങള്‍ കൂടുതല്‍ മനുഷ്യരിലേക്ക് നീട്ടാന്‍ കഴിയട്ടെ.
തോമസ് ആനിമൂട്ടില്‍ അച്ചനുമായി കൂടുതല്‍ ആഴപ്പെടുവാനും പരിചയപ്പെടുവാനും എന്‍റെ സെമിനാ രി പരിശീലനത്തിന്‍റെ ഭാഗമായി സാധിച്ചുവെന്ന കാര്യം സന്തോഷപൂര്‍വ്വം അനുസ്മരിക്കുന്നു. എന്‍റെ റീജന്‍സി കാലത്ത് കോട്ടയം അതിരൂപത മെത്രാസന മന്ദിരത്തില്‍ ഒരു വര്‍ഷകാലം താമസിച്ചപ്പോള്‍ നിയുക്ത ബിഷപ്പും കോട്ടൂര്‍ തോമസച്ചനും എനിക്ക് നല്കിയ സൗഹൃദവും സംരക്ഷണവും എന്‍റെ പൗരോഹിത്യ ശുശ്രൂഷക്കും സാമൂഹ്യ പ്രതിബദ്ധതക്കും കൂടുതല്‍ മിഴിവ് നല്‍കി .
പുതിയ സഹായ മെത്രാനായി അദ്ദേഹം സ്ഥാനാരോഹിതനാകുമ്പോള്‍ കോട്ടയം സോഷ്യല്‍ സര്‍വീസ് സൊസൈറ്റിയുടെ ഹൃദയം നിറഞ്ഞ പ്രാര്‍ത്ഥനയും ആശംസകളും നേരുന്നു.
