തിരുവനന്തപുരം: സ്ത്രീധനത്തിനായി ഡോ. റുവൈസ് സമ്മര്‍ദം ചെലുത്തിയെന്ന് മരിച്ച ഷഹന യുടെ സഹോദരന്‍ ജാസിം നാസ്. കഴിയുന്നത്ര പണം നല്‍കാമെന്ന് സമ്മതിച്ചിട്ടും റുവൈസ് വഴങ്ങിയില്ലെന്നും സഹോദരന്‍റെ വെളിപ്പെടുത്തൽ.
റുവൈസിന്‍റെ പിതാവാണ് സ്ത്രീധനം ആവശ്യപ്പെട്ടത്. അച്ഛനെ ധിക്കരിക്കാനാവില്ലെന്ന് റുവൈസ് പറഞ്ഞു. റുവൈസിനെ ഇഷ്ടപ്പെട്ടിരുന്നതിനാല്‍ ബന്ധത്തില്‍നിന്ന് പിന്മാറാൻ ഷഹനയ്ക്ക് പ്രയാസമായിരുന്നു.
ഇതിനിടെ ഷഹനയ്ക്കുമേല്‍ സ്ത്രീധനം ആവശ്യപ്പട്ടുകൊണ്ട് നിരന്തരം സമ്മര്‍ദം ചെലുത്തി. രജിസ്റ്റര്‍ വിവാഹം നടത്തികൊടുക്കാന്‍ പോലും തങ്ങള്‍ തയാറായിരുന്നു. എന്നാൽ പണമാണ് വലുതെന്ന് റുവൈസ് പറഞ്ഞെന്നും ജാസിം പറഞ്ഞു.
യുവ ഡോക്ടര്‍ ഷഹനയുടെ ആത്മഹത്യയുമായി ബന്ധപ്പെട്ട് ഇന്ന് രാവിലെയാണ് റുവൈസിനെ പോലീസ് കസ്റ്റഡിയിലെടുത്തത്. ഇയാളെ പോലീസ് ചോദ്യം ചെയ്ത് വരികയാണ്.
ഉയര്‍ന്ന സ്ത്രീധനം നല്‍കാത്തതിന്‍റെ പേരില്‍ വിവാഹാലോചനയില്‍ നിന്ന് പിന്മാറിയതിലെ നിരാശയാണ് ആത്മഹത്യയ്ക്ക് കാരണമെന്ന് ഷഹനയുടെ മാതാവും സഹോദരിയും പോലീസിന് മൊഴി നല്‍കിയിരുന്നു. ഇതിന്‍റെ അടിസ്ഥാനത്തിൽ ഇയാള്‍ക്കെതിരേ പോലീസ് കേസെടുത്തിരുന്നു.ആത്മഹത്യാപ്രേരണ, സ്ത്രീധന നിരോധന നിയമം എന്നീ ജാമ്യമില്ലാ വകുപ്പുകള്‍ പ്രകാരമാണ് കേസെടുത്തത്.
യുവ ഡോക്ടർ ഷഹനയുടെ ആത്മഹത്യയുമായി ബന്ധപ്പെട്ട് സുഹൃത്ത് പിടിയിൽ. ഡോ. റൂവൈസിനെയാണ് പോലീസ് കസ്റ്റഡിയിലെടുത്തത്.
ഒളിവിലായിരുന്ന ഇയാളെ ഇന്ന് പുലർച്ചെ കരുനാഗപ്പള്ളിയിൽ നിന്നും തിരുവനന്തപുരം മെഡിക്കൽ കോളജ് പോലീസ് ആണ് കസ്റ്റഡിയിലെടുത്തത്. റുവൈസിനെ തിരുവനന്തപുരത്ത് എത്തിച്ച് പൊലീസ് ചോദ്യം ചെയ്തുവരുകയാണ്. ഇതിനു ശേഷം അറസ്റ്റിലേക്ക് കടക്കും.
കൊല്ലം ശക്തികുളങ്ങര സ്വദേശിയാണ് റുവൈസ്. പിജി ഡോക്ടേഴ്സ് അസോസിയേഷൻ സംസ്ഥാന പ്രസിഡന്‍റായിരുന്നു ഇയാൾ. ബുധനാഴ്ച റുവൈസിനെതിരെ ആത്മഹത്യാപ്രേരണ, സ്ത്രീധന നിരോധന നിയമം എന്നിവ ചുമത്തി ജാമ്യമില്ലാ വകുപ്പ് പ്രകാരം പോലീസ് കേസെടുത്തിരുന്നു.
ഉയർന്ന സ്ത്രീധനം നൽകാത്തതിന്‍റെ പേരിൽ വിവാഹാലോചനയിൽ നിന്ന് പിന്മാറിയതിലെ നിരാശയാണ് ആത്മഹത്യയ്ക്ക് കാരണമെന്ന് ഷഹാനയുടെ മാതാവും സഹോദരിയും പോലീസിന് മൊഴി നൽകി. ഇതിന്‍റെ അടിസ്ഥാനത്തിലാണ് കേസ്.
