ഗ്യാ​സ് ഇ​റ​ക്കു​ന്ന​ത് നാ​ട്ടു​കാ​ർ ത​ട​ഞ്ഞു;  മു​യി​പ്ര​യി​ൽ സം​ഘ​ർ​ഷം; ജനവാസ കേന്ദ്രത്തിലെ ഗ്യാ​സ് ഗോ​ഡൗ​ണ്‍ അ​ന​ധി​കൃ​ത​മെന്ന് നാട്ടുകാർ

വ​ട​ക​ര: ഏ​റാ​മ​ല പ​ഞ്ചാ​യ​ത്തി​ലെ മു​യി​പ്ര​യി​ൽ പ​ണി​ത ഗോ​ഡൗ​ണി​ൽ പാ​ച​ക​വാ​ത​കം ഇ​റ​ക്കാ​നു​ള്ള ശ്ര​മം നാ​ട്ടു​കാ​ർ ത​ട​ഞ്ഞ​ത് സം​ഘ​ർ​ഷാ​വ​സ്ഥ സൃ​ഷ്ടി​ച്ചു. ഗ്യാ​സ് ഗോ​ഡൗ​ണ്‍ അ​ന​ധി​കൃ​ത​മെ​ന്ന് ചൂ​ണ്ടി​ക്കാ​ട്ടി​യാ​ണ് നാ​ട്ടു​കാ​ർ രം​ഗ​ത്തെ​ത്തി​യ​ത്.

ജ​ന​വാ​സ കേ​ന്ദ്ര​ത്തി​ൽ ഗ്യാ​സ് ഗോ​ഡൗ​ണ്‍ അ​നു​വ​ദി​ക്കി​ല്ലെ​ന്നു വ്യ​ക്ത​മാ​ക്കി നാ​ട്ടു​കാ​ർ ദീ​ർ​ഘ​കാ​ല​മാ​യി സ​മ​ര​ത്തി​ലാ​ണ്. പ​ഞ്ചാ​യ​ത്തി​നെ തെ​റ്റി​ദ്ധ​രി​പ്പി​ച്ച് കെ​ട്ടി​ട നി​ർ​മാ​ണ അ​നു​മ​തി തേ​ടി​യെ​ടു​ക്കു​ക​യാ​യി​രു​ന്നു​വെ​ന്നു പ​റ​യു​ന്നു. എ​ന്നാ​ൽ ഗ്യാ​സ് ഗോ​ഡൗ​ണ്‍ തു​ട​ങ്ങാ​ൻ പ​ഞ്ചാ​യ​ത്ത് അ​നു​മ​തി ന​ൽ​കി​യി​ല്ല. വാ​ണി​ജ്യാ​വ​ശ്യ​ത്തി​നു കെ​ട്ടി​ടം പ​ണി​യു​ന്ന​തി​നാ​ണ് അ​നു​മ​തി ന​ൽ​കി​യ​ത്.

ഇ​ത​നു​സ​രി​ച്ച് കെ​ട്ടി​ടം പ​ണി​ത ശേ​ഷം ഗ്യാ​സ് സൂ​ക്ഷി​ക്കു​ന്ന​തി​നു​ള്ള ലൈ​സ​ൻ​സ് നേ​ടി​യെ​ടു​ക്കാ​നാ​യി ശ്ര​മം. ഇ​ക്കാ​ര്യ​ത്തി​ൽ സ​ർ​വ​ക​ക്ഷി​ക​ള​ട​ങ്ങി​യ നാ​ട്ടു​കാ​ർ ഗ്യാ​സ് ഗോ​ഡൗ​ണി​നെ​തി​രെ ശ​ക്ത​മാ​യ സ​മ​ര​ത്തി​ലാ​ണ്. പ​ഞ്ചാ​യ​ത്തി​നെ തെ​റ്റി​ദ്ധ​രി​പ്പി​ച്ച​തി​നാ​ൽ ഭ​ര​ണ​സ​മി​തി​യും എ​തി​ർ​പി​ന്‍റെ പാ​ത​യി​ലാ​ണ്. മാ​സ​ങ്ങ​ൾ​ക്കു മു​ന്പ് പ​ണി​ത കെ​ട്ടി​ട​ത്തി​ൽ അ​ടു​ത്ത ദി​വ​സം ത​ന്നെ ഗ്യാ​സ് സൂ​ക്ഷി​ക്കാ​ൻ സാ​ധ്യ​ത​യു​ണ്ടെ​ന്നു ചൂ​ണ്ടി​ക്കാ​ട്ടി പ​ഞ്ചാ​യ​ത്ത് അ​ധി​കൃ​ത​ർ എ​ട​ച്ചേ​രി പോ​ലീ​സി​ൽ പ​രാ​തി ന​ൽ​കി​യി​രു​ന്നു.

ഇ​തി​നു പി​ന്നാ​ലെ​യാ​ണ് ഇ​ന്നു രാ​വി​ലെ ഗോ​ഡൗ​ണി​ലേ​ക്കു ഗ്യാ​സു​മാ​യി ലോ​റി​യെ​ത്തി​യ​ത്. ഇ​ത​റി​ഞ്ഞ് നാ​ട്ടു​കാ​ർ പ്ര​തി​ഷേ​ധി​ച്ച് ഗ്യാ​സ് ഇ​റ​ക്കു​ന്ന​ത് ത​ട​യു​ക​യാ​യി​രു​ന്നു. ഗ്യാ​സ്ഏ​ജ​ൻ​സി​യു​ടെ വ​ക്താ​ക്ക​ളും നാ​ട്ടു​കാ​രും ത​മ്മി​ൽ ഏ​റെ നേ​രം വാ​ക്കേ​റ്റ​മു​ണ്ടാ​യി. പോ​ലീ​സെ​ത്തി​യാ​ണ് രം​ഗം ശാ​ന്ത​മാ​ക്കി​യ​ത്. പ​ഞ്ചാ​യ​ത്ത് പ്ര​സി​ഡ​ന്‍റ് എം.​കെ.​ഭാ​സ്ക​ര​നും നേ​താ​ക്ക​ളും സ്ഥ​ല​ത്തെ​ത്തി.