മുംബൈ: ഐപിഎല് ട്വന്റി-20 ക്രിക്കറ്റില് ക്യാപ്റ്റന്സി ലഭിച്ചപ്പോള് മുതല് മികച്ച നേതൃപാടവത്തിലൂടെ ടീമുകളെ മുന്നോട്ടുനയിച്ച ശ്രേയസ് അയ്യറിനെ ഇന്ത്യന് ടീമിന്റെ അടുത്ത നായകനാക്കാന് നീക്കം നടത്തുന്നതായി സൂചന.
ഇന്ത്യന് പുരുഷ വൈറ്റ്ബോള് ക്രിക്കറ്റ് ടീമുകള്ക്ക് ഒരു ക്യാപ്റ്റന് എന്ന നിര്ദേശവും ബിസിസിഐക്കുള്ളില് ഉയര്ന്നുകഴിഞ്ഞതായാണ് റിപ്പോര്ട്ട്. ഇതിന്റെ ഭാഗമായി ഇന്ത്യയുടെ ഏകദിന, ട്വന്റി-20 ടീമുകളുടെ ക്യാപ്റ്റന് സ്ഥാനത്ത് ശ്രേയസ് അയ്യര് എത്തുമെന്ന് ബിസിസിഐ വൃത്തങ്ങള് സൂചിപ്പിച്ചു.
ഇന്ത്യന് വൈറ്റ്ബോള് ക്രിക്കറ്റിന് ഒരു ക്യാപ്റ്റന് എന്ന നീക്കം ശുഭ്മാന് ഗില്ലിലൂടെ ബിസിസിഐ നടത്തിയെങ്കിലും അതു പരാജയപ്പെട്ടിരുന്നു. ഗില്ലിന്റെ ഫോമില്ലായ്മ അദ്ദേഹത്തെ ടീമില്നിന്നുതന്നെ പുറത്താക്കാന് ബിസിസിഐയെ നിര്ബന്ധിതമാക്കി. നിലവില് ഇന്ത്യയുടെ ട്വന്റി-20 ടീമിനെ സൂര്യകുമാര് യാദവും ഏകദിന ടീമിനെ ശുഭ്മാന് ഗില്ലുമാണ് നയിക്കുന്നത്. ടെസ്റ്റ് ടീം ക്യാപ്റ്റനും ഗില്ലാണ്.
സൂര്യയുടെ മോശം ഫോം
ട്വന്റി-20 ബാറ്റര്മാരില് ഒരിക്കല് ഒന്നാം സ്ഥാനത്തായിരുന്ന സൂര്യകുമാര് യാദവ് തുടര്ച്ചയായി പരാജയപ്പെടുന്നതാണ് ക്യാപ്റ്റന്സിയില് മാറ്റംവരുത്താന് ബിസിസിഐയെ പ്രേരിപ്പിക്കുന്നത്. ഐസിസി 2026 ട്വന്റി-20 ലോകകപ്പ്, 2025 ഏഷ്യ കപ്പ് തുടങ്ങിയ ട്രോഫികളില് ഇന്ത്യയെ എത്തിച്ച ക്യാപ്റ്റനാണ് സൂര്യകുമാര് യാദവ്. എന്നാല്, ഈ രണ്ട് ടൂര്ണമെന്റിലുമായി ഒരു അര്ധസെഞ്ചുറി മാത്രമാണ് സൂര്യകുമാര് യാദവ് നേടിയത്. അതാകട്ടെ, ലോകകപ്പില് മുംബൈ വാങ്കഡെയില്വച്ച് അമേരിക്കയ്ക്ക് എതിരേ 49 പന്തില് നേടിയ 84 നോട്ടൗട്ട്. ഐപിഎല് 2026 സീസണിലും സൂര്യകുമാറിന്റെ മോശം ഫോമില് മാറ്റമില്ല. 19-ാം സീസണ് ഐപിഎല്ലില് ഡല്ഹിക്ക് എതിരേ നേടിയ 51 റണ്സ് ആണ് ഉയര്ന്ന സ്കോര്. ഈ സീസണില് സൂര്യകുമാര് 40നു മുകളില് സ്കോര് ചെയ്ത ഏക ഇന്നിംഗ്സും അതായിരുന്നു.
അടുത്ത സീസണ് ശ്രേയസ്
2026 ട്വന്റി-20 ലോകകപ്പിനുശേഷമുള്ള, അടുത്ത സീസണിലേക്ക് ശ്രേയസ് അയ്യറിനെ ക്യാപ്റ്റനാക്കാനാണ് അജിത് അഗാര്ക്കര് നയിക്കുന്ന ബിസിസിഐ സെലക്ഷന് പാനലിന്റെ നീക്കം. ഐപിഎല്ലില് ക്യാപ്റ്റനായപ്പോള് മുതല് ശ്രേയസ് അയ്യര് മികച്ച ട്രാക്ക് റിക്കാര്ഡാണ് കെട്ടിപ്പടുത്തത്. 2019ല് ഡല്ഹി ക്യാപ്പിറ്റല്സിന്റെ ക്യാപ്റ്റന്സിയില്. ആ സീസണില് ടീം പ്ലേ ഓഫില്. 2020 സീസണില് ഡല്ഹിയെ ഫൈനലില് എത്തിച്ചു. ഐപിഎല് ചരിത്രത്തില് ഡല്ഹി കളിച്ച ഏക ഫൈനല്. പരിക്കിനെത്തുടര്ന്ന് പിന്നീട് ഡല്ഹിക്കു പുറത്ത്. 2022 ലേലത്തില് 12.25 കോടി രൂപയ്ക്ക് കോല്ക്കത്ത നൈറ്റ് റൈഡേഴ്സില്.
ടീം പോയിന്റ് ടേബിളില് ഏഴാം സ്ഥാനത്ത്. 2023 സീസണില് പരിക്കിനെത്തുടര്ന്ന് നഷ്ടമായി. എന്നാല്, 2024 സീസണില് കോല്ക്കത്ത നൈറ്റ് റൈഡേഴ്സിനെ ഐപിഎല് കിരീടത്തില് എത്തിച്ചു. തുടര്ന്ന് 2025 ലേലത്തില് 26.75 കോടി രൂപയ്ക്ക് പഞ്ചാബ് കിംഗ്സിലേക്ക്. അവിടെയും ക്യാപ്റ്റന്സി. ടീമിനെ ഫൈനലില് എത്തിച്ചു. 2014നുശേഷം പഞ്ചാബ് ടീം ഫൈനലില് കളിച്ചത് അന്നാദ്യം. 2026 സീസണില് പഞ്ചാബിനെ ആദ്യ ഏഴ് മത്സരങ്ങളിലും തോല്വി അറിയാതെ നയിച്ചു. ഈ ട്രാക്ക് റിക്കാര്ഡിന്റെ പശ്ചാത്തലത്തിലാണ് ഇന്ത്യയുടെ അടുത്ത വൈറ്റ്ബോള് ക്യാപ്റ്റനായി ശ്രേയസ് അയ്യറിനെ ബിസിസിഐ പരിഗണിക്കുന്നതെന്നാണ് സൂചന.
അയര്ലന്ഡ്, ഇംഗ്ലണ്ട് പര്യടനം
ഇന്ത്യയുടെ അയര്ലന്ഡ്, ഇംഗ്ലണ്ട് പര്യടനത്തിനുള്ള ട്വന്റി-20 ടീം ക്യാപ്റ്റന്സി ശ്രേയസ് അയ്യറിനെ ഏല്പ്പിക്കാനാണ് സാധ്യത. 2028 ട്വന്റി-20 ലോകകപ്പ്, ഒളിമ്പിക്സ് മുന്നിര്ത്തിയുള്ള നീക്കമാണ് ബിസിസിഐ നടത്തുന്നത്. സൂര്യകുമാര് യാദവിന്റെ കീഴില് 76.92 ആണ് ഇന്ത്യയുടെ വിജയശതമാനം. വൈഭവ് സൂര്യവംശി അടക്കമുള്ള പുതുമുഖങ്ങളെ ഉള്പ്പെടുത്തിയാകും ഇന്ത്യ അടുത്ത സൈക്കിളിലേക്കുള്ള ടീമിനെ പ്രഖ്യാപിക്കുക എന്നാണ് വിവരം.
