പിതാവ് മൈത്രേയനെ കുറിച്ച് നടി കനി കുസൃതി പങ്കുവച്ച അനുഭവങ്ങളാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. ചെറുപ്പം മുതൽ മൈത്രേയൻ തനിക്ക് 18 വയസായാൽ കുടുംബം പിരിച്ച് വിടുമെന്ന് പറയുമായിരുന്നു. എന്നാൽ അന്ന് അതിന്‍റെ അർഥം മനസിലായില്ലെന്നാണ് കനി പറഞ്ഞത്.
പ്രായപൂർത്തിയായ ഏതൊരു മനുഷ്യനും നൽകുന്ന പിന്തുണ തനിക്ക് തരുമെന്ന് അദ്ദേഹം പറഞ്ഞിരുന്നെന്നും എന്നാൽ തനിക്ക് കാണാൻ തോന്നുന്നെന്ന് പറഞ്ഞാൽ മൈത്രേയൻ ഉടൻ തന്നെ വരുമെന്നും കനി കുസൃതി ഒരു യൂട്യൂബ് ചാനലിന് നൽകിയ അഭിമുഖത്തിൽ വ്യക്തമാക്കി.
‘ഞാന്‍ കുഞ്ഞായിരിക്കുമ്പോഴേ, എനിക്ക് 18 വയസ്സാവുമ്പോള്‍ കുടുംബം പിരിച്ചുവിടുമെന്ന് മൈത്രേയന്‍ പറയുന്നുണ്ട്. ഞാന്‍ എന്‍റെ വഴിക്ക്, നീ നിന്‍റെ വഴിക്ക് എന്ന് പറയും. 18 വയസ്സായ മറ്റൊരാളെ എങ്ങനെ സഹായിക്കുന്നോ അതുപോലെ നിന്നേയും പിന്തുണയ്ക്കും. എന്‍റെ കൂടെ എപ്പോള്‍ താമസിക്കണമെന്ന് തോന്നിയാലും വരാം, നിന്‍റെ അടുത്തേക്ക് വരണമെന്ന് പറഞ്ഞാലും വരാം.
ഏതൊരു മനുഷ്യന്‍ ചോദിച്ചാലും ഞാന്‍ പോവും. അതുപോലെ നിനക്കും വരാം. കുട്ടിക്കാലത്ത് തന്നെ ഇതൊക്കെ പറയുമായിരുന്നു. തീരെ ചെറുതായിരിക്കുമ്പോള്‍ അതിന്‍റെ അര്‍ഥമൊന്നും അറിയില്ലല്ലോ. ശരിക്കും അങ്ങനെ സംഭവിച്ചപ്പോള്‍ മൈത്രേയന്‍ ഇനി ഇല്ലല്ലേ എന്ന് മനസിലായി. പക്ഷേ മൈത്രേയാ, എനിക്ക് കാണാന്‍ തോന്നുന്നു എന്ന് വിളിച്ച് പറഞ്ഞാല്‍ അപ്പോള്‍ തന്നെ വരും. മൈത്രേയന്‍ എന്തോ പറയുന്നോ അത് പ്രവര്‍ത്തിക്കും. എന്നാല്‍ എനിക്ക് വേണ്ടി അവിടെ ഉണ്ട്,’ കനി കുസൃതി പറഞ്ഞു.
