കോട്ടയം : സീറാം സാംബശിവ റാവുവിനെ എക്സൈസ് കമ്മിഷണര്‍ സ്ഥാനത്ത് നിന്ന് മാറ്റിയത് എന്തിനാണെന്ന് സര്‍ക്കാര്‍ വ്യക്തമാക്കണമെന്ന് എല്‍ഡിഎഫ് കണ്‍വീനര്‍ ടി.പി.രാമകൃഷ്ണന്‍. നിയമാനുസൃതം പ്രവര്‍ത്തിക്കുന്ന ഉദ്യോഗസ്ഥനാണ് അദ്ദേഹം. സാംബശിവ റാവുവിനെ മാറ്റിയ നടപടി മന്ത്രിയെ സംശയനിഴലില്‍ നിര്‍ത്തുന്നതാണ്.
മന്ത്രി അഴിമതി നടത്തിയിട്ടുണ്ടോയെന്ന് ഇക്കാര്യത്തിലുള്ള വസ്തുതകള്‍ പുറുത്തുവന്നതിനുശേഷമേ വ്യക്തമാകു. അഴിമതിക്കെതിരെ പ്രവര്‍ത്തിക്കുന്ന ഉദ്യോഗസ്ഥരെ ഉടനെ മാറ്റുന്ന നടപടിയാണിപ്പോള്‍ നടക്കുന്നത്. ഇതുതന്നെയാണ് വൈദ്യുതി വകുപ്പിലും നടക്കുന്നത്. മുഖ്യമന്ത്രി ഇതൊക്കെ നടത്തുന്നതു അഴിമതിക്കു വേണ്ടിയാണെന്നും ഇക്കാര്യത്തില്‍ സമഗ്ര അന്വേഷണം വേണമെന്നും ടി.പി.രാമകൃഷ്ണന്‍ ആവശ്യപ്പെട്ടു.
സംസ്ഥാനത്തെ ബാർ വിവാദം; ‘വീര്യം’ അളക്കാൻ വിജിലൻസ്
തിരുവനന്തപുരം: സംസ്ഥാനത്തെ ബാർ വിവാദത്തിൽ മൂന്നു വിഷയങ്ങളിൽ വിജിലൻസ് അന്വേഷണം വരും. മുഖ്യമന്ത്രി വി.ഡി. സതീശനുമായി ഇന്ന് എക്സൈസ് മന്ത്രി എം. ലിജു നേരിട്ടു ചർച്ച നടത്തിയശേഷം ഇക്കാര്യത്തിൽ തീരുമാനം എടുക്കും. തുടർന്ന് വിജിലൻസ് അന്വേഷണം ആവശ്യപ്പെട്ട് ആഭ്യന്തര മന്ത്രി രമേശ് ചെന്നിത്തലയ്ക്കു കത്തു നൽകും. രമേശ് ചെന്നിത്തലയുമായി കഴിഞ്ഞ ദിവസം എക്സൈസ് മന്ത്രി സംസാരിച്ചിരുന്നു.
ഉദ്യോഗസ്ഥർക്കെതിരേ ഗുരുതര കൈക്കൂലിയും മാസപ്പടിയും ഉൾപ്പടെയുള്ള ആരോപണങ്ങൾ റിപ്പോർട്ടിൽ കമ്മിഷണർ അക്കമിട്ടു നിരത്തുകയും വിജിലൻസ് അന്വേഷണത്തിനു ശിപാർശ നൽകുകയും ചെയ്ത സാഹചര്യത്തിൽ സർക്കാരിന് അന്വേഷണത്തിനു വിടേണ്ടി വരും. കമ്മിഷണർ സ്ഥാനത്തുനിന്നു മാറ്റിയതിനു തൊട്ടുപിന്നാലെ റിപ്പോർട്ട് നൽകിയ നടപടിയിലാണ് ദുരൂഹത കാണുന്നത്. നേരത്തെ ഇക്കാര്യം അറിയിച്ചിരുന്നെങ്കിൽ അന്വേഷണം നടത്താൻ കഴിയുമായിരുന്നുവെന്നാണ് മന്ത്രിയുടെ വാദം.
എന്നാൽ, സീറാം സാംബശിവറാവു എക്സൈസ് കമ്മിഷണറായിരിക്കേ സർക്കാർ നിർദേശം മറികടന്നു ബാർ ലൈസൻസുകൾ അനുവദിച്ച നടപടിയും ഇതോടൊപ്പം അന്വേഷിക്കും. വിവിധ മേഖലകളിലെ ഡെപ്യൂട്ടി കമ്മിഷണർമാർക്ക് ബാർ ലൈസൻസ് അനുവദിക്കാനുള്ള അനുമതി മറയാക്കി സർക്കാർ നിർദേശം മറികടന്നു ലൈസൻസ് അനുവദിച്ചതാണ് രണ്ടാമത്തെ വിഷയം. ഇതിൽ എക്സൈസ് കമ്മിഷണർ എന്ന നിലയിലുള്ള സീറാം സാംബശിവറാവുവിന്‍റെ നടപടികളും അന്വേഷണപരിധിയിൽ വരും.
രണ്ടാം പിണറായി സർക്കാരിന്‍റെ കാലത്ത് തരംമാറ്റി 488 ബാറുകൾക്ക് പൊടുന്നനെ ലൈസൻസ് അനുവദിച്ചതിലെ ക്രമക്കേടാണ് മൂന്നാമത്തെ അന്വേഷണ വിഷയം. ഉമ്മൻചാണ്ടി സർക്കാരിന്‍റെ കാലത്തു നിലവാരമില്ലാത്തതിനെ തുടർന്നു പൂട്ടിയ ബാറുകൾ, പിന്നീട് ബിയർ- വൈൻ പാർലറുകളാക്കിയിരുന്നു. ത്രീ സ്റ്റാർ പദവിയുള്ള ഹോട്ടലുകൾക്ക് ബാർ ലൈസൻസ് അനുവദിക്കാമെന്ന ചട്ടഭേദഗതിയും ഇതിനു മറവിൽ വേഗത്തിൽ ബാർ ലൈസൻസുകൾ കൂട്ടത്തോടെ അനുവദിച്ചതുമാണ് ഇക്കാര്യത്തിൽ പ്രധാനമായി അന്വേഷിക്കുക. വിഷയത്തിനായി പ്രത്യേക അന്വേഷണ സംഘത്തെ നിയോഗിക്കണമോ എന്ന കാര്യവും എക്സൈസ് വകുപ്പ് പരിശോധിച്ചു വരുന്നു.
സ്ഥലംമാറ്റത്തിനു തൊട്ടുപിന്നാലെ എക്സൈസ് കമ്മിഷണർ ഉന്നത ഉദ്യോഗസ്ഥർക്കെതിരേ ഗുരുതര ആരോപണങ്ങൾ ഉയർത്തിയിരുന്നു. സന്തോഷം എന്ന പേരിൽ ബാറുടമകളിൽനിന്ന് എക്സൈസ് ഉദ്യോഗസ്ഥർ മാസപ്പടി നിരന്തരം കൈപ്പറ്റുന്നതായും 30000, 20000 രൂപ രൂപ വീതം കൈപ്പറ്റിയതിന്‍റെ തെളിവുകൾ ഉണ്ടെന്നും കമ്മിഷണറുടെ റിപ്പോർട്ടിൽ വ്യക്തമാക്കിയിരുന്നു.
മദ്യനയം: കരട് റിപ്പോർട്ട് ഈ ആഴ്ച കൈമാറും
തിരുവനന്തപുരം: യുഡിഎഫ് സർക്കാരിന്‍റെ പ്രഥമ മദ്യനയവുമായി ബന്ധപ്പെട്ടു തയാറാക്കിയ കരട് എക്സൈസ് മന്ത്രി എം. ലിജു ഈ ആഴ്ച തന്നെ മുഖ്യമന്ത്രിക്കു കൈമാറിയേക്കും. മദ്യനയം പ്രഖ്യാപനം വേഗത്തിലാക്കുന്നതിന്‍റെ ഭാഗമായാണ് നടപടി.
യുഡിഎഫ് യോഗം വിളിച്ച് മദ്യനയത്തിന്‍റെ കരട് ചർച്ച ചെയ്ത ശേഷമാകും മന്ത്രിസഭയിലേക്കു പോകുക. സംസ്ഥാനത്തു പുതിയ ബാർ ലൈസൻസുകൾ അനുവദിക്കുന്നതിനു കടുത്ത നിയന്ത്രണം കൊണ്ടുവരണമെന്ന അഭിപ്രായം കോണ്ഗ്രസിലെയും യുഡിഎഫിലെയും മുതിർന്ന നേതാക്കൾക്കിടയിലുണ്ട്. പുതിയ ബാർ ലൈസൻസുകൾ അനുവദിക്കുന്നതിനും നിലവിലുള്ളവ പുതുക്കുന്നതിനും മദ്യനയത്തിൽ നിയന്ത്രണങ്ങൾ കടുപ്പിക്കും. മുൻകാലങ്ങളിൽനിന്നു വ്യത്യസ്തമായി മദ്യവിരുദ്ധ പ്രസ്ഥാനങ്ങൾ, സാമൂഹിക, സാംസ്കാരിക, മതസംഘടനകൾ തുടങ്ങിയവയുടെ അഭിപ്രായം മദ്യനയവുമായി ബന്ധപ്പെട്ട ചർച്ചകളിൽ എക്സൈസ് മന്ത്രി തേടിയിരുന്നു.
മദ്യനയം വരുന്നതുവരെ ബാർ ലൈസൻസ് നൽകരുതെന്ന് കമ്മിഷണറുടെ ഉത്തരവ്
തിരുവനന്തപുരം: യുഡിഎഫ് സർക്കാരിന്‍റെ മദ്യനയം നിലവിൽ വരുന്നതുവരെ പുതിയ മദ്യശാല ലൈസൻസുകൾ അനുവദിക്കരുതെന്നു നിർദേശിച്ച് എക്സൈസ് ഡപ്യൂട്ടി കമ്മിഷണർമാർക്ക് എക്സൈസ് കമ്മിഷണറുടെ ചുമതല വഹിക്കുന്ന അഡീഷണൽ കമ്മിഷണർ ആർ. ജയശങ്കറിന്‍റെ ഉത്തരവ്. മദ്യവിൽപനയ്ക്കായി സർക്കാരിനു മുന്നിലുള്ള അപേക്ഷകളിലൊന്നും ഇപ്പോൾ തീരുമാനം എടുക്കേണ്ടതില്ല.
2026-27ലെ മദ്യനയം രൂപീകരിച്ച ശേഷം അതിലെ നിബന്ധനകൾക്കും നിയമവ്യവസ്ഥകൾക്കും വിധേയമായി അപേക്ഷ പുനഃസമർപ്പിക്കാനാണ് ഉത്തരവിൽ നിർദേശിച്ചത്. ലൈസൻസുമായി ബന്ധപ്പെട്ടു ലഭിച്ച അപേക്ഷകൾ സർക്കാർ മടക്കി നൽകിയിരുന്നു. ബാർ ലൈസൻസ് നൽകാൻ എക്സൈസ് ഡെപ്യൂട്ടി കമ്മിഷണർമാർക്ക് അനുമതി നൽകി മുൻ സർക്കാർ ചട്ടഭേദഗതി കൊണ്ടുവന്നിരുന്നു. ഇതിന്‍റെ മറവിൽ യുഡിഎഫ് സർക്കാർ അധികാരത്തിൽ എത്തിയശേഷം വ്യാപകമായി ബാർ ലൈസൻസുകൾ വിതരണം ചെയ്ത സാഹചര്യത്തിലാണ് കടുത്ത നിയന്ത്രണം ഏർപ്പെടുത്തി ഉത്തരവിറക്കിയത്.
കഴിഞ്ഞ മന്ത്രിസഭായോഗത്തിലും ബാർ ലൈസൻസ് അനുവദിക്കരുതെന്നു നിർദേശിച്ച് ഡപ്യൂട്ടി കമ്മിഷണർമാർക്ക് കർശന നിർദേശം നൽകി ഉത്തരവിറക്കണമെന്ന ആവശ്യം ഉയർന്നിരുന്നു.
