സെബി മാളിയേക്കൽ
തൃശൂർ: ലിസ്ബണിലെ ലോക യുവജന സമ്മേളനവേദിയിൽ ഇന്നലെ മലയാളത്തിന്‍റെ മധുരിതഗാനം ഉയർന്നു. യുഎഇ ആസ്ഥാനമായുള്ള മാസ്റ്റർ പ്ലാൻ മ്യൂസിക് ബാൻഡാണു തങ്ങളുടെ ‘ഡുങ്കു ഡുങ്കു ഡുങ്കു ഡുങ്കുണു’ എന്നു തുടങ്ങുന്ന ഗാനത്തിനിടെ മലയാളത്തിന്‍റെ മധുരസ്വരത്തിലൂടെ യേശുവിനെ പ്രകീർത്തിച്ചത്.
പഞ്ചാബി ഗാനത്തിന്‍റെ ഈണത്തിലുള്ള തട്ടുപൊളിപ്പൻ പാട്ടിനു ലോകമെന്പാടുമുള്ള യുവജനങ്ങൾ ചുവടുവയ്ക്കുകയും സ്നേഹമുദ്രകൾ കാണിക്കുകയും ചെയ്യുന്നതിനിടയിലാണു ഗായകനായ സ്റ്റിയോ ഔസേപ്പ് തന്‍റെ മാതൃഭാഷയായ മലയാളത്തെ ലോകവേദിയിൽ പാടി ദൈവത്തെ സ്തുതിച്ചത്.
“ഇരുളടഞ്ഞ വഴികളിലൂടെ ഞാൻ നടന്നീടുന്പോൾ ആരോരുമില്ലാതെ ഞാൻ ഒറ്റയ്ക്കാകുന്പോൾ അവനെന്‍റെ മുന്പേ നടക്കും; വചനം വഴിനടത്തും എന്നും എപ്പോഴും എന്‍റെ കൂടെ”- എന്നായിരുന്നു വരികൾ. ഭാഷയൊന്നും മനസിലായില്ലെങ്കിലും ബ്രസീൽ, മെക്സിക്കോ, പോർച്ചുഗൽ, സൗത്ത് ആഫ്രിക്ക തുടങ്ങിയവിടങ്ങളിൽനിന്നെല്ലാം എത്തിയ യുവജനങ്ങൾ ഈണത്തിനൊപ്പം താളംപിടിച്ചു.
ദുബായിൽ ആരംഭിച്ച സുവിശേഷപ്രഘോഷണ മ്യൂസിക് ബാൻഡായ മാസ്റ്റർ പ്ലാൻ നാലാം തവണയാണു ലോക യുവജന സമ്മേളനവേദിയിൽ പ്രോഗ്രാം അവതരിപ്പിക്കുന്നതെങ്കിലും മലയാളഗാനം ആദ്യമാണ്. ലിസ്ബണിലെ പ്രധാന വേദിയിൽ ഉദ്ഘാടന വിശുദ്ധ കുർബാനയ്ക്കു തൊട്ടുമുന്പായിരുന്നു കൺസേർട്ട്. ലക്ഷക്കണക്കിനു പേരാണ് ഈ സമയം ഇവിടെയുണ്ടായിരുന്നത്.
2103ൽ ബ്രസീൽ, 2016ൽ പോളണ്ട്, 2019ൽ പനാമ എന്നിവിടങ്ങളിൽ നടന്ന ലോകയുവജന സമ്മേളനത്തിലും മാസ്റ്റർപ്ലാൻ സംഗീതപരിപാടി നടത്തിയിരുന്നു.
തിരുവനന്തപുരം സ്വദേശിയായ ബിബിൻ വോക്കൽസും കൊച്ചി സ്വദേശിയായ ജോർജ് ഒാർക്കസ്ട്രയും കോ-ഓർഡിനേറ്റ് ചെയ്യുന്നു. അന്തരിച്ച നടൻ എൻ.എഫ്. വർഗീസിന്‍റെ മകനായ സോണി വർഗീസാണ് ഒരു കീബോർഡിസ്റ്റ്.
അദ്ദേഹംതന്നെയാണ് മ്യൂസിക് കോ-ഒാർഡിനേറ്റ് ചെയ്യുന്നതും. മുഖ്യഗായികയായ മിനി മാത്യുവിന്‍റെ ഭർത്താവ് ഷെർവലാണു ലീഡ് ഗിറ്റാറിസ്റ്റ്. എഡ്‌വിൻ (ബേസ് ഗിറ്റാർ) എറണാകുളം സ്വദേശിയാണ്. ഒന്പതംഗ ബാൻഡിൽ ഡയ്ഗോ (ഗുജറാത്തി), നീൽ (പാക്കിസ്ഥാനി) എന്നിവരൊഴികെ ഏഴുപേരും മലയാളികളാണ്.
ലോകവേദിയിൽ മലയാളത്തിന്‍റെ മധുരസ്വരം അവതരിപ്പിച്ച സ്റ്റിയോ ഔസേപ്പ് ഇരിങ്ങാലക്കുട കാരാത്രക്കാരൻ ഔസേപ്പിന്‍റെയും ഗ്രേസിയുടെയും മകനാണ്. ജോലി സംബന്ധമായി അബുദാബിയിലാണു താമസം. ഭാര്യ: ജാൻസി. മക്കൾ: ഇമ്മാനുവേൽ, ഗബ്രിയേൽ, മിഷേൽ.
