തെന്നിന്ത്യൻ സിനിമാലോകം ഒന്നടങ്കം കാത്തിരിക്കുന്ന സാമന്തയുടെ പുതിയ ചിത്രം മാ ഇന്ടി ബംഗാരം എന്ന സിനിമയെക്കുറിച്ചുള്ള തികച്ചും അപ്രതീക്ഷിതമായ ഒരു വെളിപ്പെടുത്തലുമായി താരം. ഈ ചിത്രത്തിൽ ആദ്യം നായികയായി പരിഗണിച്ചിരുന്നത് തന്നെ ആയിരുന്നില്ലെന്നും, മറിച്ച് സായ് പല്ലവിയെയായിരുന്നുവെന്നുമാണ് സാമന്ത ഇപ്പോൾ തുറന്നുപറഞ്ഞിരിക്കുന്നത്.
ഇൻസ്റ്റാഗ്രാമിലൂടെ ആരാധകരുമായി നടത്തിയ ചോദ്യോത്തര വേളയിലാണ് സാമന്ത സിനിമയുടെ ഈ അണിയറക്കഥ വെളിപ്പെടുത്തിയത്. ചിത്രത്തിലേക്ക് താൻ എങ്ങനെയാണ് എത്തിയത് എന്ന ആരാധകന്റെ ചോദ്യത്തിന്, ഞാനല്ല ഈ സിനിമ തിരഞ്ഞെടുത്തത്, ഈ സിനിമ എന്നെ തെരഞ്ഞെടുക്കുകയായിരുന്നു എന്നായിരുന്നു സാമന്തയുടെ മറുപടി.
സ്ത്രീകേന്ദ്രീകൃതമായ ശക്തമായ കഥകൾക്ക് പ്രാധാന്യം നൽകുക എന്ന ലക്ഷ്യത്തോടെയാണ് സാമന്ത ട്രലാല എന്ന എന്റെ നിർമാണ കമ്പനി ആരംഭിച്ചത്. ഈ പ്രോജക്റ്റിലേക്ക് ആദ്യം സായ് പല്ലവിയെ സമീപിക്കാനായിരുന്നു ടീമിന്റെ തീരുമാനം. എന്നാൽ മറ്റ് ചിത്രങ്ങളുടെ തിരക്കുകൾ കാരണം സായ് പല്ലവിക്ക് ഇതിനായി സമയം കണ്ടെത്താൻ കഴിഞ്ഞില്ല. തുടർന്നാണ് അണിയറപ്രവർത്തകർ കഥയിൽ മാറ്റങ്ങൾ വരുത്തി ചിത്രം എന്നിലേക്ക് എത്തിച്ചത്. ഭാവിയിൽ കൂടുതൽ സ്ത്രീ കേന്ദ്രീകൃതമായ സിനിമകൾ ഏറ്റെടുക്കണം. ഒരു ദിവസം സായ് പല്ലവിയും ഇത്തരമൊരു ചിത്രത്തിന്റെ ഭാഗമാകുമെന്ന് ഞാൻ പ്രതീക്ഷിക്കുന്നു-സാമന്ത പറഞ്ഞു.
സാമന്തയുടെ ഇൻസ്റ്റാഗ്രാം സ്റ്റോറി പങ്കുവെച്ചുകൊണ്ട് സായ് പല്ലവിയും ചിത്രത്തിന് ആശംസകളുമായി എത്തി. “മാ ഇന്ടി ബംഗാരം നിങ്ങളിലേക്ക് തന്നെ എത്തിച്ചേരേണ്ടതായിരുന്നു പ്രിയപ്പെട്ട സാമന്ത. നിങ്ങൾക്കും നന്ദിനി റെഡ്ഡിക്കും എന്റെ വലിയൊരു കെട്ടിപ്പിടിത്തവും ആശംസകളും നേരുന്നു. തീർച്ചയായും, നമ്മൾ ഉടൻ തന്നെ ഒന്നിക്കും- എന്നാണ് സായ് പല്ലവി കുറിച്ചത്. ഇരുതാരങ്ങളുടെയും ഈ മനോഹരമായ സൗഹൃദം സോഷ്യൽ മീഡിയയിൽ ഇതിനകം വൈറലായിക്കഴിഞ്ഞു.
2019ൽ ബോക്സ് ഓഫീസിൽ വൻ വിജയം നേടിയ ഓ ബേബി എന്ന ചിത്രത്തിനുശേഷം സംവിധായിക നന്ദിനി റെഡ്ഡിയും സാമന്തയും വീണ്ടും ഒന്നിക്കുന്ന ചിത്രമെന്ന പ്രത്യേകതയും മാ ഇന്ടി ബംഗാരത്തിനുണ്ട്. ഫാമിലി ആക്ഷൻ-കോമഡി വിഭാഗത്തിലാണ് ചിത്രം ഒരുങ്ങുന്നത്. പ്രശസ്ത സംവിധായകൻ രാജ് നിഡിമോരുവും വസന്ത് മരിംഗന്തിയും ചേർന്നാണ് ചിത്രത്തിന്റെ തിരക്കഥ തയാറാക്കിയിരിക്കുന്നത്.
