ഏറെ വിവാദമായ വിമാനത്തിലെ മൂത്രമൊഴിക്കലിനു ശേഷം സമാനമായ സംഭവങ്ങള്‍ ആവര്‍ത്തിക്കുകയാണ്.
ഇപ്പോഴിതാ കര്‍ണാടകയില്‍ നിന്നാണ് സമാനമായൊരു സംഭവം റിപ്പോര്‍ട്ട് ചെയ്തിരിക്കുന്നത്.
ഇവിടെ ബസ് യാത്രികനാണ് സഹയാത്രികയുടെ സീറ്റില്‍ യാത്രക്കാരന്‍ മൂത്രം ഒഴിച്ചത്. മദ്യലഹരിയില്‍ 32കാരന്‍ സീറ്റില്‍ മൂത്രമൊഴിക്കുകയായിരുന്നുവെന്നാണ് വിവരം.
ഹുബ്ലിയില്‍ ചൊവ്വാഴ്ച രാത്രിയാണ് സംഭവം. വിജയപുരയില്‍ നിന്ന് മംഗളൂരുവിലേക്ക് സര്‍വീസ് നടത്തിയ കര്‍ണാടക സ്റ്റേറ്റ് റോഡ് ട്രാന്‍സ്പോര്‍ട്ട് കോര്‍പ്പറേഷന്‍ ബസിലാണ് യുവാവ് 20കാരി സഹയാത്രികയുടെ സീറ്റില്‍ മൂത്രം ഒഴിച്ചത്. നോണ്‍- എസി സ്ലീപ്പര്‍ ബസിലായിരുന്നു യാത്ര.
ഭക്ഷണം കഴിക്കാനായി ഹുബ്ലിക്ക് സമീപമുള്ള ധാബയില്‍ വാഹനം നിര്‍ത്തിയപ്പോഴാണ് സംഭവം നടന്നത്.
യുവതി ഒച്ചവെച്ചപ്പോഴാണ് ബസിലെ മറ്റു യാത്രക്കാര്‍ കാര്യം അറിഞ്ഞത്. മദ്യലഹരിയിലായിരുന്നു യുവാവ്. സഹയാത്രികയുടെ സീറ്റില്‍ മൂത്രം ഒഴിച്ചത് ചോദ്യം ചെയ്തപ്പോള്‍ യുവാവ് യാത്രക്കാരോട് മോശമായി പെരുമാറിയതായാണ് റിപ്പോര്‍ട്ടുകള്‍.
മദ്യപിച്ച് ലക്കുകെട്ട യുവാവിന്റെ ശല്യം സഹിക്കാന്‍ കഴിയാതെ വന്നതോടെ, യുവാവിനെ ബസില്‍ നിന്ന് പുറത്താക്കി.
മെക്കാനിക്കല്‍ എന്‍ജിനീയറാണ് യുവാവ്. എന്നാല്‍ യുവാവിനെതിരേ പരാതി നല്‍കാന്‍ 20കാരി തയ്യാറായില്ലെന്ന് കെഎസ്ആര്‍ടിസി അധികൃതര്‍ അറിയിച്ചു.
