കോട്ടയം: എന്‍സിപിയുടെ പാലാ സീറ്റിനെ സംബന്ധിച്ചുള്ള തര്‍ക്കങ്ങള്‍ക്കിടയില്‍ മുഖ്യമന്ത്രി പിണറായി വിജയന്‍ സിപിഎം ജില്ലാ സെക്രട്ടറിയേറ്റ് യോഗത്തില്‍ പങ്കെടുത്തു. തിരുനക്കരയിലെ സിപിഎം ജില്ലാ കമ്മിറ്റി ഓഫീല്‍ ഇന്നു രാവിലെയാണ് ജില്ലാ നേതാക്കളുമായി മുഖ്യമന്ത്രി ചര്‍ച്ച നടത്തിയത്.
ഇന്നലെ രാത്രി 10.50ന് നാട്ടകം ഗസ്റ്റ് ഹൗസില്‍ മുഖ്യമന്ത്രി എത്തിയിരുന്നു. ഇന്നു എംജി യൂണിവേഴ്‌സിറ്റി കാമ്പസില്‍ വിദ്യാര്‍ഥി പ്രതിഭകളുമായി സംവദിക്കുന്ന സിഎം അറ്റ് കാമ്പസ് പരിപാടിയില്‍ പങ്കെടുക്കുന്നതിനായാണ് മുഖ്യമന്ത്രി ജില്ലയിലെത്തിയത്.
എന്‍സിപിയുടെ പാലാ സിറ്റിനെക്കുറിച്ചായിരുന്നു പ്രധാന ചര്‍ച്ച. മുന്നണി വിട്ടു യുഡിഎഫില്‍ മത്സരിക്കാനുള്ള മാണി സി. കാപ്പന്റെ തീരുമാനും സെക്രട്ടറിയേറ്റ് യോഗത്തില്‍ ചര്‍ച്ച ചെയ്തു. കേരള കോണ്‍ഗ്രസ് എം മുന്നണിയിലെത്തിയതോടെ കാഞ്ഞിരപ്പള്ളി സീറ്റ് വിട്ടു കൊടുക്കുന്ന കാര്യവും ചര്‍ച്ചയ്ക്കു വെച്ചു.
കാഞ്ഞിരപ്പള്ളി സീറ്റ് ഒരു കാരണവശാലും വിട്ടു കൊടുക്കില്ലെന്നു സിപിഐ ജില്ലാ കമ്മിറ്റിയോഗം തീരുമാനിച്ചിരുന്നതാണ്. പാലാ സീറ്റിന്റെ കാര്യത്തില്‍ ഉടന്‍ തീരുമാനം വ്യക്തമാക്കണമെന്നു മാണി സി. കാപ്പനും ആവശ്യപ്പെട്ടിട്ടുണ്ട്. ഇതിന്റെ ഭാഗമായി എന്‍സിപി ദേശിയ സെക്രട്ടറി പ്രഫുല്‍ പട്ടേല്‍ മുഖ്യമന്ത്രിയുമായി കഴിഞ്ഞ ദിവസം കൂടിക്കാഴ്ച നടത്താന്‍ തീരുമാനിച്ചിരുന്നെങ്കിലും മുഖ്യമന്ത്രി സമയം അനുവദിച്ചില്ല.
സീറ്റിന്റെ കാര്യത്തില്‍ മാണി സി. കാപ്പന്‍ നിലപാട് കടുപ്പിച്ചതോടെ മുഖ്യമന്ത്രിയുടെ സാന്നിധ്യത്തില്‍ ചേരുന്ന ജില്ലാ സെക്രട്ടറിയേറ്റ് യോഗം നിര്‍ണായക തീരുമാനമെടുത്തേക്കും. സെക്രട്ടറിയോഗത്തിനു ശേഷം ഉച്ചകഴിഞ്ഞു ജില്ലാ കമ്മിറ്റി യോഗവും ചേരുന്നുണ്ട്.
കോട്ടയം, പുതുപ്പളി, ഏറ്റുമാനൂര്‍ മണ്ഡലങ്ങളിലെ സിപിഎം സ്ഥാനാര്‍ഥികളെ സംബന്ധിച്ചുള്ള ചര്‍ച്ചയും യോഗത്തില്‍ ഉയരും. ജില്ലാ സെക്രട്ടറി വി.എന്‍. വാസന്റെ സ്ഥാനാര്‍ഥിത്വം സംബന്ധിച്ചും തീരുമാനമുണ്ടായേക്കും.
കേന്ദ്രകമ്മിറ്റി അംഗം വൈക്കം വിശ്വന്‍, ജില്ലാ സെക്രട്ടറി വി.എന്‍. വാസവന്‍, പ്രഫ. എം.ടി. ജോസഫ്, കെ. സുരേഷ് കുറുപ്പ്, പി.കെ. ഹരികുമാര്‍, പി.ആര്‍. രഘുനാഥന്‍, എ.വി. റസല്‍, കെ.എം. രാധാകൃഷണന്‍, സി.ജെ. ജോസഫ്, വി.പി. ഇബ്രാഹിം എന്നിവര്‍ സെക്രട്ടറിയേറ്റ് യോഗത്തില്‍ പങ്കെടുത്തു.
