പത്തനംതിട്ട: മല്ലപ്പള്ളി -പുല്ലാട് റോഡിന്‍റെ താത്കാലികമായ പുനരുദ്ധാരണ പ്രവര്‍ത്തനങ്ങള്‍ രണ്ടു ദിവസത്തിനകം ആരംഭിക്കുമെന്ന് ആന്‍റോ ആന്‍റണി എംപി. ഇതു സംബന്ധിച്ച് ദേശീയപാത ഉദ്യോഗസ്ഥരുമായി ചര്‍ച്ച നടത്തിയതായും രണ്ടു ദിവസത്തിനകം റോഡിലെ കുഴികള്‍ താത്കാലികമായി അടയ്ക്കുന്നതിനുള്ള നടപടികള്‍ ആരംഭിക്കുമെന്ന് ദേശീയപാത ഉദ്യോഗസ്ഥര് ഉറപ്പുനല്‍കിയതായും എംപി പറഞ്ഞു.
കേന്ദ്ര ഗവണ്‍മെന്‍റിന്‍റെ റോഡ് വികസന പദ്ധതിയായ സെൻട്രൽ റോഡ് ഫണ്ടില്‍ ഉള്‍പ്പെടുത്തി 12.64 കോടി രൂപയാണ് അനുവദിച്ച് ടെന്‍ഡര്‍ നടപടികള്‍ പൂര്‍ത്തീകരിച്ചത്. 13 കിലോമീറ്റര്‍ ദൈര്‍ഘ്യമുള്ള ഈ റോഡില്‍ ജലഅഥോറിറ്റിയുടെ പൈപ്പ് ലൈന്‍ നിലവിലുണ്ട്. റോഡ് നവീകരിക്കുമ്പോള്‍ കാലപ്പഴക്കം ചെന്ന ഈ പൈപ്പുകള്‍ പൊട്ടി പോകുമെന്ന് ജലഅഥോറിറ്റി അധികൃതര്‍ അറിയിച്ചതിനെ തുടര്‍ന്ന് പഴയ പൈപ്പ് ലൈനുകള്‍ മാറ്റി പുതിയ പൈപ്പുകള്‍ സ്ഥാപിക്കേണ്ടി വന്നു.
ഈ പ്രവൃത്തികള്‍ ഇപ്പോള്‍ പൂര്‍ത്തീകരിച്ചിട്ടുണ്ട്. ഇക്കാരണത്താലാണ് റോഡ് നിര്‍മാണം ആരംഭിക്കാന്‍ കാലതാമസം നേരിട്ടത്. കാലതാമസം നേരിട്ടതിനാല്‍ ഏറ്റെടുത്ത കരാറുകാരന്‍ പ്രവൃത്തി ഉപേക്ഷിച്ചുപോയി. ഇനി പുതുതായി ടെന്‍ഡര്‍ ചെയ്തു വേണം പ്രവൃത്തി ആരംഭിക്കാനെന്ന് എംപി ചൂണ്ടിക്കാട്ടി റോഡിലൂടെയുള്ള യാത്രക്കാരുടെ ബുദ്ധിമുട്ട് മാറ്റുവാന്‍ പുനരുദ്ധാരണ ജോലികള്‍ അടിയന്തിരമായി നടത്തണമെന്നുള്ള നിര്‍ദ്ദേശത്തെ തുടര്‍ന്നാണ് തീരുമാനമുണ്ടായതെന്ന് എംപി പറഞ്ഞു.
