എല്ലാ കാലത്തും പുത്തൻ പരീക്ഷണങ്ങൾ നടക്കുന്ന ഇടമാണ് ഫാഷൻ ലോകം. വ്യത്യസ്തമായ വസ്ത്രങ്ങളും മേക്കപ്പുകളും ലുക്കുമായി ഓരോ ദിവസവും നമ്മെ ഞെട്ടിപ്പിക്കുന്നതാണ് മോഡലുകൾ.
സ്പ്രിംഗ്-സമ്മർ ശേഖരങ്ങളോടെയുള്ള പാരിസ് ഫാഷൻ വീക്ക് സെപ്തംബർ 25 -നാണ് തുടങ്ങിയത്.
പാരിസ് ഫാഷൻ വീക്ക് 2024 -ൽ കാണികളെ ഞെട്ടിച്ചു കൊണ്ട് ഒരു മോഡൽ റാംപിൽ കൂടി നടക്കുകയാണ്. മോഡൽ ജീവനുള്ള ചിത്രശലഭങ്ങളാൽ നിറഞ്ഞ വസ്ത്രം ധരിച്ചാണ് റാംപിൽ കൂടി നടന്നത്.
മോഡലിന്‍റെ വസ്ത്രം എല്ലാവരിലും ഏറെ കൗതുകമുണർത്തി. അണ്ടർകവർ ക്രിയേറ്റീവ് ഡയറക്ടറായ ജുൻ തകഹാഷിയാണ് ഈ വസ്ത്രം തയ്യാറാക്കിയത്.
ഇതിന്‍റെ വീഡിയോയും ചിത്രങ്ങളും സാമൂഹിക മാധ്യമങ്ങളിൽ പെട്ടെന്ന് തന്നെ വെെറലായി.യുവതിയുടെ വസ്ത്രത്തിനുള്ളിൽ ജീവനുള്ള ചിത്രശലഭങ്ങൾ പാറി കളിക്കുന്നത് ഏവരിലും കൗതുകമുണർത്തി.
പലരും വസ്ത്രത്തിന്റെ ഡിസെെനറെ അഭിനന്ദിച്ച് രംഗത്തെത്തി. അസാമാന്യ കഴിവാണെന്ന് പലരും പ്രശംസിച്ചു. എന്നാൽ കുറ്റപ്പെടുത്തുന്നവരും കുറവില്ലായിരുന്നു.
ജീവികൾ നിങ്ങൾക്ക് വസ്തുവൽക്കരിക്കാനുള്ളവയല്ല എന്നാണ് വിമർശകർ പറഞ്ഞത്. എന്നാൽ വിമർശകർ തെറ്റദ്ധരിക്കുന്നതു പോലെയല്ല, ചിത്രശലഭങ്ങളെ സ്വതന്ത്രമാക്കുന്നതിന് വേണ്ടി വസ്ത്രത്തിന്റെ പിൻഭാഗത്ത് വാതിലുകൾ ഉണ്ടെന്നാണ് ആരാധകർ പറയുന്നത്.
