തിരുവനന്തപുരം: ശബരിമല സ്വര്ണക്കൊള്ളക്കേസില് യുഡിഎഫ് കണ്വീനര് അടൂര് പ്രകാശിനെ എസ്ഐടി ചോദ്യം ചെയ്യുന്നു. നോട്ടീസ് നല്കി അടൂര് പ്രകാശിനെ വിളിച്ചുവരുത്തുകയായിരുന്നു. ക്രൈംബ്രാഞ്ച് ഓഫീസിലാണ് ചോദ്യം ചെയ്യല്.
ഉണ്ണികൃഷ്ണന് പോറ്റിയുമായുള്ള ബന്ധത്തെക്കുറിച്ച് അറിയുന്നതിനാണ് അടൂര് പ്രകാശിനെ ചോദ്യം ചെയ്യുന്നത്. ഡല്ഹിയില് സോണിയാഗാന്ധിയുമായുള്ള കൂടിക്കാഴ്ചയുടെ ചിത്രങ്ങളില് ഉണ്ണികൃഷ്ണന് പോറ്റിയോടൊപ്പം അടൂര് പ്രകാശിന്റെ ചിത്രവും ഉണ്ടായിരുന്നു.
സിപിഎം നേതാക്കള് ഉണ്ണികൃഷ്ണന് പോറ്റിയും അടൂര് പ്രകാശും തമ്മിലുള്ള ബന്ധം അന്വേഷിക്കണമെന്ന് ആവശ്യപ്പെട്ടിരുന്നു. എന്നാല് പോറ്റിയെ തനിക്കറിയാമെന്നും മണ്ഡലത്തിലുള്ള ആളെന്ന നിലയില് പരിചയമുണ്ടെന്നും ഏത് അന്വേഷണത്തോടും സഹകരിക്കുമെന്നും അടൂര് പ്രകാശ് വ്യക്തമാക്കിയിരുന്നു.
ചോദ്യം ചെയ്യലിനു വിളിപ്പിച്ചാല് മാധ്യമങ്ങളെ അറിയിക്കുമെന്ന് അദ്ദേഹം നേരത്തെ വ്യക്തമാക്കിയിരുന്നു. അതേസമയം കടകംപള്ളി സുരേന്ദ്രനെ എസ്ഐടി ചോദ്യം ചെയ്ത വിവരം രഹസ്യമാക്കി വച്ചിരുന്നത് ഏറെ വിമര്ശനങ്ങള്ക്കിടയാക്കിയിരുന്നു.
