കൊച്ചി: യുവതാരങ്ങൾക്കു പ്രാമുഖ്യം നൽകി സന്തോഷ് ട്രോഫി ദക്ഷിണമേഖലാ യോഗ്യതാ റൗണ്ട് മത്സരങ്ങൾക്കായുള്ള കേരള ടീമിനെ പ്രഖ്യാപിച്ചു. നാലുവർഷമായി സന്തോഷ് ട്രോഫി ടീമിന്‍റെ ഭാഗമായ കണ്ണൂർ സ്വദേശിയും ഗോൾ കീപ്പറുമായ വി. മിഥുൻ ഇക്കുറി 20 അംഗ ടീമിനെ നയിക്കും. 2017ൽ കിരീടം നേടിയ സന്തോഷ് ട്രോഫി കേരള ടീമിൽ അംഗമായിരുന്ന മിഥുനു പുറമേ എട്ടു താരങ്ങൾക്കു സന്തോഷ് ട്രോഫി കളിച്ച പരിചയമുണ്ട്. ഏഴു പേർ അണ്ടർ-21 താരങ്ങളാണ്.
നവംബർ അഞ്ച് മുതൽ പത്തു വരെ കോഴിക്കോട് കോർപറേഷൻ സ്റ്റേഡിയത്തിലാണു ദക്ഷിണ മേഖല യോഗ്യത റൗണ്ട് മത്സരങ്ങൾ. രണ്ടു ഗ്രൂപ്പുകളിലായി ഏഴു ടീമുകൾ ഫൈനൽ റൗണ്ട് യോഗ്യത തേടി മത്സരിക്കും. ഗ്രൂപ്പ് എയിൽ തമിഴ്നാടിനും ആന്ധ്രാപ്രദേശിനും ഒപ്പമാണ് കേരളം. അഞ്ചിന് ആന്ധ്രയ്ക്കെതിരേയാണ് ആദ്യമത്സരം. ഒന്പതിന് തമിഴ്നാടിനെ നേരിടും. ഇന്നു മുതൽ ടീം കോഴിക്കോട് ദേവഗിരി കോളജ് ഗ്രൗണ്ടിൽ പരിശീലനം നടത്തും.
ടീം: (താരം, ക്ലബ്, സ്വദേശം എന്ന ക്രമത്തിൽ). ഗോൾകീപ്പർമാർ -വി. മിഥുൻ (എസ്ബിഐ-കണ്ണൂർ, സച്ചിൻ സുരേഷ് (എഫ്സി കേരള-തൃശൂർ), പ്രതിരോധനിര: ജിഷ്ണു ബാലകൃഷ്ണൻ (കേരള ബ്ലാസ്റ്റേഴ്സ്-മലപ്പുറം), വിബിൻ തോമസ് (കേരള പോലീസ്-തൃശൂർ), വി.ജി. ശ്രീരാഗ് (കേരള പോലീസ്-മലപ്പുറം), ജി. സഞ്ജു (ഗോകുലം എഫ്സി-തൃശൂർ), അലക്സ് സജി (ഗോകുലം എഫ്സി-വയനാട്), അജിൻ ടോം (ചെന്നൈയിൻ എഫ്സി-വയനാട്). മധ്യനിര: പി. അഖിൽ. (ഓസോണ് എഫ്സി ബംഗളൂരു-എറണാകുളം), ജിജോ ജോസഫ് (എസ്ബിഐ-തൃശൂർ), ഹൃഷിദത്ത് (കേരള ബ്ലാസ്റ്റേഴ്സ്-തൃശൂർ), എം.എസ്. ജിതിൻ (തൃശൂർ), പി.പി. റിഷാദ് (സാറ്റ് തിരൂർ-മലപ്പുറം), ലിയോണ് അഗസ്റ്റിൻ (ബംഗളൂരു എഫ്സി-കോഴിക്കോട്), താഹിർ സമാൻ (ഗോകുലം എഫ്സി-കോഴിക്കോട്), എമിൽ ബെന്നി (ഗോകുലം എഫ്സി-വയനാട്), റോഷൻ വി. ജിജി (എഫ്സി കേരള-തൃശൂർ). മുന്നേറ്റ നിര: മൗസൂഫ് നൈസാൻ (എഫ്സി കേരള-തൃശൂർ), പി.വി. വിഷ്ണു (ഗോകുലം എഫ്സി -കാസർഗോഡ്). ഷിഹാദ് നെല്ലിപ്പറന്പൻ (ഗോകുലം എഫ്സി-മലപ്പുറം).
മുൻ ഗോകുലം കേരള എഫ്സി പരിശീലകൻ ബിനോ ജോർജാണ് ടീം പരിശീലകൻ. ടി.ജി. പുരുഷോത്തമനാണ് സഹ പരിശീലകൻ. നായകൻ മിഥുന് പുറമെ അണ്ടർ-21 താരം അലക്സ് സജിയാണ് കഴിഞ്ഞ സന്തോഷ് ട്രോഫി ടീമിലുണ്ടായിരുന്നത്. ഇരുവർക്കും പുറമെ വിബിൻ, ശ്രീരാഗ്, ജിജോ, ജിഷ്ണു, ജിതിൻ എന്നിവരും നേരത്തെ സന്തോഷ് ട്രോഫി ടീമിൽ കളിച്ചിരുന്നു. രണ്ടുതവണ കർണാടകയുടെ സന്തോഷ് ട്രോഫി ടീം അംഗമായിരുന്നു ലിയോണ്.
അലക്സ് സജി, സച്ചിൻ സുരേഷ്, അജിൻ ടോം, റോഷൻ വി. ജിജി, ഹൃഷിദത്ത്, വിഷ്ണു, എമിൽ ബെന്നി എന്നിവരാണ് ടീമിലെ അണ്ടർ-21 താരങ്ങൾ. രാംകോ സിമന്‍റാണ് ഇത്തവണയും ടീമിന്‍റെ സ്പോണ്സർ. കൊച്ചിയിൽ നടന്ന ടീം പ്രഖ്യാപന ചടങ്ങിൽ പരിശീലകൻ ബിനോ ജോർജ്, കെഎഫ്എ ഹോണററി പ്രസിഡന്‍റ് കെ.എം.ഐ. മേത്തർ, പ്രസിഡന്‍റ് ടോം ജോസ്, ജനറൽ സെക്രട്ടറി പി. അനിൽകുമാർ, രാംകോ മാർക്കറ്റിംഗ് ജി.എം. ഗോപകുമാർ എന്നിവർ പങ്കെടുത്തു.
