ഉത്തർഖണ്ഡിലെ ചക്രതയിൽ റോഡ് കണക്റ്റിവിറ്റിയുടെ കുറവ് കാരണം വിവാഹവേഷത്തിൽ 18 കിലോമീറ്ററിലധികം നടന്ന് വധു. ഉത്തർഖണ്ഡ് മുഖ്യമന്ത്രി പുഷ്കർ സിംഗ് ധാമിയോട് ഗ്രാമത്തിലേക്ക് ഒരു റോഡ് നിർമിച്ചു നൽകാൻ അഭ്യർഥിച്ചുകൊണ്ടാണ് ശർമിള എന്ന യുവതി ദുർഘടമായ പാതയിലൂടെ കാൽനടയായി യാത്ര ചെയ്തത്.
കഴിഞ്ഞ ചൊവ്വാഴ്ചയായിരുന്നു സംഭവം. ബുൽഹാർ ഗ്രാമത്തിൽ നിന്ന് ഡെറാഡൂണിന് സമീപമുള്ള ഉന്ദവ എന്ന ഉൾഗ്രാമത്തിലേക്ക് വിവാഹ സംഘത്തോടൊപ്പം പോകുകയായിരുന്ന ശർമിളയ്ക്ക്, റോഡ് ഇല്ലാത്തതിനാൽ അവസാന കിലോമീറ്ററുകൾ നടന്ന് താണ്ടേണ്ടി വരികയായിരുന്നു. ഭവനപ്രവേശന ചടങ്ങിന്‍റെ ശുഭമുഹൂർത്തത്തിൽ എത്തുന്നതിനായി കനത്ത വിവാഹ ലെഹങ്ക ധരിച്ച് കുടപിടിച്ചും ബുദ്ധിമുട്ടുകൾ വകവെക്കാതെയും യുവതി ദീർഘദൂരം നടക്കുന്ന ദൃശ്യങ്ങൾ സമൂഹമാധ്യമങ്ങളിൽ വൈറലായി.
ഗ്രാമവാസികൾ ചിത്രീകരിച്ച വീഡിയോയിൽ ക്ഷീണിതയായ വധു മുഖ്യമന്ത്രി പുഷ്കർ സിംഗ് ധാമിയോട് നേരിട്ട് അപേക്ഷിക്കുന്നത് കാണാം. തങ്ങൾ അനുഭവിക്കുന്ന ഈ ദുരിതം മറ്റാരും അനുഭവിക്കാതിരിക്കാൻ ഉന്ദവ ഗ്രാമത്തിലേക്ക് എത്രയും പെട്ടെന്ന് ഒരു റോഡ് നിർമിച്ചു നൽകണമെന്ന് അവർ അഭ്യർഥിച്ചു.
സ്വാതന്ത്ര്യം ലഭിച്ച് പതിറ്റാണ്ടുകൾ കഴിഞ്ഞിട്ടും ഉന്ദവ ഗ്രാമത്തിൽ ഇതുവരെ റോഡ് സൗകര്യം എത്തിയിട്ടില്ല. ഇത് വിവാഹങ്ങൾ പോലെയുള്ള പ്രധാനപ്പെട്ട ചടങ്ങുകളെയും ജനങ്ങളുടെ ദൈനംദിന ജീവിതത്തെയും ഗുരുതരമായി ബാധിക്കുന്നുണ്ട്. ഉത്തർഖണ്ഡിലെ മലയോര മേഖലകളിൽ റോഡുകൾ ഇല്ലാത്തത് ഗർഭിണികൾക്കും രോഗികൾക്കും പ്രായമായവർക്കും അത്യാഹിത ഘട്ടങ്ങളിൽ ആശുപത്രികളിൽ എത്തിച്ചേരുന്നതിന് വലിയ തടസമാണ് സൃഷ്ടിക്കുന്നത്.
ഇത്തരം ഉൾഗ്രാമങ്ങളിലെ അടിസ്ഥാന സൗകര്യമില്ലായ്മയും യാത്രാദുരിതവും ഒരിക്കൽ കൂടി ദേശീയ തലത്തിൽ ശ്രദ്ധിക്കപ്പെടാൻ ഈ സംഭവം കാരണമായിരിക്കുകയാണ്.
