ഉത്തർപ്രദേശിലെ ഒരു ഫാമൗസിൽ അതിക്രമിച്ചുകടന്ന പുള്ളിപ്പുലിയെ ധീരതയോടെ നേരിട്ട് വളർത്തുനായ. ലഖിംപൂർ ഖേരി ജില്ലയിലെ ബെൽറയാൻ വനമേഖലയോട് ചേർന്നുള്ള മാൻജ്ര പുരബ് ഗ്രാമത്തിലാണ് സംഭവം. പുലിയെ കണ്ടിട്ടും ഭയന്നോടാതെ ഉറക്കെ കുരച്ച് അതിനെ തുരത്തിയ ലാബ്രഡോർ ഇനത്തിൽപ്പെട്ട നായയുടെ വീഡിയോ സമൂഹമാധ്യമങ്ങളിൽ വൈറലായി.
പുലർച്ചെ 4 മണിയോടെയാണ് സംഭവം നടന്നത്. ഫാം ഉടമ ഗുർമീത് സിംഗ് ഉറങ്ങിക്കിടക്കുമ്പോൾ നായയുടെ കനത്ത കുരകേട്ടാണ് ഉണർന്നത്. ജനലിലൂടെ പുറത്തേക്ക് നോക്കിയപ്പോഴാണ് ഫാമൗസിന്‍റെ മുറ്റത്തേക്ക് പുള്ളിപ്പുലി കയറിവരുന്നത് അദ്ദേഹം കണ്ടത്.
സാധാരണയായി വളർത്തുനായ്ക്കളെ ഇരയാക്കാറുള്ള പുള്ളിപ്പുലിയാണ് ഫാമൗസിലേക്ക് എത്തിയത്. എന്നാൽ നായയുടെ ശക്തമായ നിലവിളിയും പ്രതിരോധവും കണ്ടതോടെ പുലി ആക്രമണത്തിന് മുതിരാതെ തിരികെ നടന്നുപോവുകയായിരുന്നു. ഫാമൗസിൽ സ്ഥാപിച്ചിരുന്ന സിസിടിവി ക്യാമറയിലാണ് ഈ അസാധാരണ ദൃശ്യങ്ങൾ പതിഞ്ഞത്.
മനുഷ്യവാസമേഖലയും വനവും അടുത്തുകിടക്കുന്ന പ്രദേശങ്ങളിൽ വളർത്തുപട്ടികൾ നേരിടുന്ന അപകടസാധ്യതകളിലേക്കാണ് ഈ സംഭവം വിരൽ ചൂണ്ടുന്നത്. നായയുടെ ധൈര്യത്തെയും സമയോചിതമായ ഇടപെടലിനെയും പ്രശംസിച്ച് നിരവധിപ്പേരാണ് ഈ ദൃശ്യങ്ങൾ സമൂഹമാധ്യമങ്ങളിൽ പങ്കുവെക്കുന്നത്.
