നദിയിൽ പാൽ അർപ്പിച്ച് പ്രാർത്ഥിച്ച ശേഷം അതിന്‍റെ ഒഴിഞ്ഞ പാക്കറ്റ് നദിയിലേക്ക് തന്നെ വലിച്ചെറിഞ്ഞ യുവാവിന്റെ പ്രവർത്തിക്കെതിരെ സോഷ്യൽ മീഡിയയിൽ വ്യാപക അമർഷം. അസമിലെ ഡിബ്രൂഗഢിൽ ബ്രഹ്മപുത്ര നദിക്കരയിൽ നടന്ന സംഭവത്തിന്റെ ദൃശ്യങ്ങളാണ് ഇപ്പോൾ വൈറലാകുന്നത്.
ബംഗളൂരു സ്വദേശിയായ നവീൻ റെഡ്ഡി എന്ന വ്യക്തിയാണ് ഈ ദൃശ്യങ്ങൾ എക്സിൽ പങ്കുവെച്ചത്. വിശ്വാസത്തിന്‍റെ പേരിൽ നദിയെ പൂജിക്കുമ്പോഴും, പ്ലാസ്റ്റിക് കവർ വെള്ളത്തിലേക്ക് എറിയുന്നത് നദിയോടും പ്രകൃതിയോടുമുള്ള അനാദരവാണെന്ന് അദ്ദേഹം കുറിച്ചു. “വിശ്വാസങ്ങളെ ബഹുമാനിക്കൂ, ഒപ്പം പ്രകൃതിയെയും സംരക്ഷിക്കൂ” എന്ന സന്ദേശത്തോടെയാണ് അദ്ദേഹം വീഡിയോ പങ്കുവെച്ചത്.
നദി ശുചിയായി സൂക്ഷിക്കേണ്ടതിന്‍റെ പ്രാധാന്യത്തെക്കുറിച്ച് ഓർമിപ്പിച്ച നവീൻ, ആ പ്രദേശത്ത് പൊതുജനങ്ങൾക്കായി മാലിന്യക്കുട്ടകൾ സ്ഥാപിച്ചിട്ടില്ലെന്ന കാര്യവും അധികൃതരുടെ ശ്രദ്ധയിൽപ്പെടുത്തി. വ്യക്തിഗത ഉത്തരവാദിത്തമില്ലായ്മയെയും പൊതുസ്ഥലങ്ങളിൽ മാലിന്യം തള്ളുന്ന സംസ്കാരത്തെയും വിമർശിച്ച് നിരവധി ആളുകളാണ് ഈ പോസ്റ്റിന് താഴെ പ്രതികരണങ്ങളുമായി രംഗത്തെത്തിയത്.
മധ്യപ്രദേശിലെ അജ്നാർ നദി ശുചീകരിക്കുന്നതിനിടെ സന്നദ്ധ പ്രവർത്തകനായ ബിട്ടു തബാഹിയുടെ മുന്നിലേക്ക് ആളുകൾ മാലിന്യം തള്ളുന്ന വീഡിയോകൾ അടുത്തിടെ വൈറലായിരുന്നു. ഇതിന് പിന്നാലെയാണ് ബ്രഹ്മപുത്രയിലെ ഈ സംഭവവും ചർച്ചയാകുന്നത്. വിശ്വാസാചാരങ്ങൾ പാലിക്കുമ്പോൾ തന്നെ പരിസ്ഥിതി സംരക്ഷണത്തിനും മുൻഗണന നൽകേണ്ടതുണ്ടെന്ന് ഓർമിപ്പിക്കുന്നതാണ് ഈ സംഭവം.
