കാര്യമായി എന്തെങ്കിലും തടയുമെന്ന് കരുതി കഷ്ടപ്പെട്ട് വീടിന്റെ രണ്ടാംനിലയില്‍ കയറിയ കള്ളന് അവസാനം ലഭിച്ചത് നിരാശ മാത്രം. ഒന്നും കിട്ടാതെ വന്നതോടെ ചുറ്റുപാടും നിരീക്ഷിച്ച് ഇളിഭ്യനായി മടങ്ങി.
ഇളങ്ങുളം രണ്ടാംതോട് ഉപാസനയില്‍ സാബുവിന്റെ വീട്ടിലെ സി.സി.ടി.വി.യിലാണ് പരാജയപ്പെട്ട മോഷണശ്രമത്തിന്റെ ദൃശ്യങ്ങളുള്ളത്. ശനിയാഴ്ച രാത്രി 12.15 സമയം രേഖപ്പെടുത്തിയ ദൃശ്യങ്ങളില്‍ മുറ്റത്തു കൂടി ചുറ്റിത്തിരിയുന്ന യുവാവിന്റെ ദൃശ്യമുണ്ട്.
ആളെ തിരിച്ചറിയാതിരിക്കാന്‍ ഉടുമുണ്ടഴിച്ച തലയില്‍ കെട്ടുകയായിരുന്നു. തുടര്‍ന്ന് രണ്ടാം നിലയില്‍ കോണിപ്പടി കയറിച്ചെന്നപ്പോഴാണ് അത് റൂഫിട്ട മേല്‍ക്കൂര മാത്രമാണെന്ന് കള്ളന് തിരിച്ചറിഞ്ഞത്.
വീടിന്റെ ഉള്ളിലേക്ക് കടക്കാന്‍ യാതൊരു മാര്‍ഗവുമില്ലെന്ന് മനസ്സിലായ കള്ളന് തുറന്നുകിടന്ന ജനാലയിലൂടെ നിരീക്ഷിച്ചപ്പോള്‍ മുറിക്കുള്ളില്‍ നായയുടെ കുരയുയര്‍ന്നു. ഇതു കേട്ട് വീട്ടുകാര്‍ ഉണര്‍ന്നപ്പോഴേക്കും യുവാവ് ഓടി രക്ഷപെട്ടു. പൊന്‍കുന്നം പോലീസ് സ്ഥലത്തെത്തി പരിശോധന നടത്തി.
