കൊച്ചി: സിനിമാ ചിത്രീകരണത്തിനിടെ അപകടത്തില് പരിക്കേറ്റ് ചികിത്സയിലായിരുന്ന നടന് വിനായകന് ആശുപത്രി വിട്ടു. ആട്-3 സിനിമയുടെ ചിത്രീകരണത്തിനിടെയാണ് അപകടമുണ്ടായത്. തമിഴ്നാട്ടിലെ തിരുച്ചെന്തൂരില് സിനിമയിലെ സംഘട്ടനരംഗങ്ങള് ചിത്രീകരിക്കുന്നതിനിടെ ജീപ്പുകള് കൂട്ടിയിടിക്കുന്ന രംഗം ചിത്രീകരിക്കുമ്പോഴായിരുന്നു അപകടം.
ചിത്രീകരണം തുടര്ന്നെങ്കിലും പിന്നീട് ദേഹാസ്വാസ്ഥ്യത്തെത്തുടര്ന്ന് വിനായകനെ ശനിയാഴ്ചയാണ് കൊച്ചിയിലെ സ്വകാര്യ ആശുപത്രിയില് പ്രവേശിപ്പത്. പരിശോധനയില് കഴുത്തിലെയും തോളിലെയും പേശികള്ക്കു ക്ഷതമേറ്റതായി കണ്ടെത്തിയിരുന്നു.
‘കഴുത്തിലാണ് പരിക്കേറ്റത്. ഞരമ്പുകള്ക്ക് ക്ഷതമുണ്ടായതായും ചികിത്സ വൈകിയാല് തളര്ന്നുപോകുമായിരുന്നു’, എന്ന് ആശുപത്രി വിട്ട വിനായകന് മാധ്യമങ്ങളോട് പ്രതികരിച്ചു. സംസാരിക്കാനും നടക്കാനും ബുദ്ധിമുട്ടുണ്ടെന്നും വിനായകന് പറഞ്ഞു.
2015 ല് മിഥുന് മാനുവല് തോമസ് സംവിധാനം ചെയ്ത ആട് എന്ന ചിത്രത്തിന്റെ മൂന്നാം ഭാഗമാണ് ആട് 3. അടുത്ത വര്ഷം ഈദ് റിലീസായി ചിത്രം എത്തുമെന്നാണ് അണിയറപ്രവര്ത്തകര് അറിയിച്ചിരിക്കുന്നത്.
കാവ്യ ഫിലിം കമ്പനിയുടെ ബാനറില് വേണു കുന്നപ്പിള്ളിയും ഫ്രൈഡേ ഫിലിം ഹൗസിന്റെ ബാനറില് വിജയ് ബാബുവും ചേര്ന്നാണ് ആട് 3 നിര്മിക്കുന്നത്. ജയസൂര്യയാണ് ചിത്രത്തില് നായകനായെത്തുന്നത്. വിജയ് ബാബു, സൈജു കുറുപ്പ്, സണ്ണി വെയ്ന്, ഇന്ദ്രന്സ് എന്നിവരും ചിത്രത്തില് പ്രധാന വേഷങ്ങളിലെത്തുന്നുണ്ട്. മമ്മൂട്ടി ചിത്രം കളങ്കാവല് ആണ് വിനായകന്റേതായി ഒടുവില് തിയറ്ററുകളിലെത്തിയ ചിത്രം.
