ശക്തമായ ഭൂകമ്പം ഉണ്ടാകുന്നതിനിടയിലും സ്വന്തം ജീവൻ പണയം വെച്ച് രോഗിയുടെ സുരക്ഷ ഉറപ്പാക്കി ശസ്ത്രക്രിയ പൂർത്തിയാക്കിയ ഡോക്ടർമാരുടെയും നഴ്സുമാരുടെയും വീഡിയോ സോഷ്യൽ മീഡിയയിൽ വൈറലാകുന്നു. ജപ്പാനിലെ കുമാമോട്ടോ പ്രവിശ്യയിലെ യത്സുഷിറോ സിറ്റിയിലുള്ള കുമാമോട്ടോ കോംപ്രിഹെൻസീവ് ഹോസ്പിറ്റലിൽ ജൂലൈ 28നാണ് ഹൃദയസ്പർശിയായ ഈ സംഭവം നടന്നത്.
ശസ്ത്രക്രിയാ മുറി കഠിനമായി കുലുങ്ങുകയും ഭാരമേറിയ വൈദ്യുത ഉപകരണങ്ങൾ തറയിലൂടെ തെന്നിമാറുകയും ചെയ്യുമ്പോൾ, ഡോക്ടർമാരും നഴ്സുമാരും ഒട്ടും പരിഭ്രമിക്കാതെ രോഗിയെ പൊതിഞ്ഞുപിടിച്ച് ഉപകരണങ്ങൾ സുരക്ഷിതമാക്കുന്നത് സിസിടിവി ദൃശ്യങ്ങളിൽ വ്യക്തമാണ്. ഈ സമയത്ത് നടന്നിരുന്ന നാല് ശസ്ത്രക്രിയകളും വിജയകരമായി പൂർത്തിയാക്കാൻ വൈദ്യസംഘത്തിന് സാധിച്ചു.
ദുരന്തമുഖത്തും കർത്തവ്യബോധവും മനുഷ്യത്വവും ഉയർത്തിപ്പിടിച്ച ജാപ്പനീസ് മെഡിക്കൽ സംഘത്തിന്റെ ഈ ദൃശ്യങ്ങൾക്ക് ലോകമെമ്പാടുമുള്ള സോഷ്യൽ മീഡിയ ഉപയോക്താക്കളിൽ നിന്നും വലിയ പ്രശംസയാണ് ലഭിച്ചുകൊണ്ടിരിക്കുന്നത്.
