കൊച്ചി: നിയമസഭാ തെരഞ്ഞെടുപ്പ് നടക്കുന്ന ഏപ്രില് ഒന്പതിന് സമ്മതിദായകര്ക്ക് പോളിംഗ് ബൂത്തുകളിലെത്താന് സൗജന്യ യാത്രയൊരുക്കി ഊബര് ഇന്ത്യ. ഊബര് ആപ്പിലെ കാര്, ഓട്ടോ, ബൈക്ക് എന്നീ വിഭാഗങ്ങളില് ഈ സൗജന്യ സേവനം ലഭ്യമാകും. വോട്ടര്മാരെ പിക്ക് ചെയ്യുന്ന സ്ഥലത്തുനിന്നും രണ്ട് കിലോമീറ്റര് വരെയുള്ള യാത്രകള് പൂര്ണമായും സൗജന്യമായിരിക്കും. രണ്ട് കിലോമീറ്ററിന് ശേഷമുള്ള യാത്രക്ക് ഊബര് നിശ്ചയിച്ചിട്ടുള്ള തുക നല്കണം.
എല്ലാ പോളിംഗ് ബൂത്തുകളുടെയും ലൊക്കേഷനുകള് ആപ്പില് ലഭ്യമാക്കിയിട്ടുണ്ട്. മുതിര്ന്ന പൗരന്മാര്ക്കും ശാരീരിക ബുദ്ധിമുട്ടുള്ളവര്ക്കും ഉള്പ്പെടെ എല്ലാ വോട്ടര്മാര്ക്കും ഈ സേവനം പ്രയോജനപ്പെടുത്താം.
സംസ്ഥാന മുഖ്യ തെരഞ്ഞെടുപ്പ് ഓഫീസറുടെ കാര്യാലയവുമായി സഹകരിച്ചാണ് ഈ പദ്ധതി നടപ്പാക്കുന്നത്. തിരുവനന്തപുരം, എറണാകുളം ജില്ലകളിലെ വോട്ടര്മാര്ക്കാണ് ഈ ആനുകൂല്യം ലഭിക്കുക.
യാത്രാ സൗകര്യങ്ങളുടെ അഭാവം മൂലം വോട്ടിംഗ് ശതമാനം കുറയാതിരിക്കാനും എല്ലാവര്ക്കും സമ്മതിദാനാവകാശം വിനിയോഗിക്കാന് അവസരമൊരുക്കുകയുമാണ് പദ്ധതിയുടെ ലക്ഷ്യമെന്ന് മുഖ്യ തെരഞ്ഞെടുപ്പ് ഓഫീസര് ഡോ. രത്തന് യു. കേല്ക്കര് അറിയിച്ചു. ഇതിനു പുറമെ ആപ്പ് നോട്ടിഫിക്കേഷനുകളിലൂടെയും സോഷ്യല് മീഡിയയിലൂടെയും വോട്ടര് ബോധവല്ക്കരണ സന്ദേശങ്ങള് പ്രചരിപ്പിക്കുമെന്നും അധികൃതര് വ്യക്തമാക്കി.
