പാറശാല: മീൻ കയറ്റിവന്ന ലോറിയും കന്യാകുമാരിക്ക്‌ വിനോദ യാത്ര പോവുകയായിരുന്ന ടെംപോ ട്രാവലറുമായി കൂട്ടിയിടിച്ചു പന്ത്രണ്ടു വയസുകാരൻ മരിച്ചു. പതിനൊന്നു പേർക്ക് പരിക്കേറ്റു.
ഇന്ന് പുലർച്ചെ മൂന്ന് മണിക്കാണ് അപകടം നടന്നത്. കോതമംഗലത്തുനിന്നും കന്യാകുമാരിയിലേക്കു വന്ന വാഹനമാണ് അപകടത്തിൽപെട്ടത്. വിനോദ സംഘത്തിലുണ്ടായിരുന്ന ആരോമൽ (12 )ണ് മരണമടഞ്ഞത്.
പരുക്കേറ്റ ആറുപേരെ നെയ്യാറ്റിൻകര സ്വകാര്യ ആശുപത്രിയിലും മറ്റുള്ളവരെ തിരുവനന്തപുരം മെഡിക്കൽ കോളേജിലും എസ്എടി ആശുപത്രികളിലും പ്രവേശിപ്പിച്ചു.
കോതമംഗലം സ്വദേശികളായ എൽദോസ് (42 )ഷിബി (41 )നോവ (17)ഹണി ബിനു (38 )ബിനു (40 )അഭിഷേക് (40 ) ഏതെൻ (10 ) അജിത അരുൾ ബിനുകുമാർ എന്നിവർ പരിക്കേറ്റവരാണ്.
ഇഞ്ചിവിള വളവിലാണ് അപകടം നടന്നത്. അമിതവേഗത്തിൽ വന്ന മീൻലോറി ട്രാവലറിന്‍റെ വശത്തു ഇടിച്ചുകയറുകയായിരുന്നുവെന്നു പ്രദേശവാസികൾ പറഞ്ഞു.
ചാറ്റൽ മഴയും വളവും അപകടകാരണമെന്നു കരുതുന്നു. പാറശാല പോലീസും അഗ്നിശമന സേനയും സ്ഥലത്തെത്തി രക്ഷാപ്രവർത്തനം നടത്തുകയായിരുന്നു.
പരിക്കേറ്റവരെ ആദ്യം പാറശാല താലൂക് ആശുപത്രിയിൽ പ്രവേശിപ്പിച്ചുവെങ്കിലും വിദഗ്ധ ചികിത്സക്കായി മറ്റു ആശുപത്രികളിലേക്ക് മാറ്റുകയായിരുന്നു.
