ബോളിവുഡ്-തെന്നിന്ത്യൻ നടി മൃണാൾ ഠാക്കൂറും ഇന്ത്യൻ ക്രിക്കറ്റ് താരം ശ്രേയസ് അയ്യരും പ്രണയത്തിലാണെന്ന അഭ്യൂഹങ്ങൾ പ്രചരിക്കാൻ തുടങ്ങിയിട്ടു കുറച്ചു നാളുകളായി. അഭ്യൂഹങ്ങൾക്കു മറുപടിയുമായി എത്തിയിരിക്കുകയാണ് നടി മൃണാൽ ഠാക്കൂർ. ഇൻസ്റ്റഗ്രാമിൽ പങ്കുവച്ച ചെറുവിഡിയോയിലാണ് മൃണാൽ ഇതു സംബന്ധിച്ച് പരോക്ഷ വിശദീകരണം നൽകിയത്. അവർ സംസാരിക്കുന്നു, ഞങ്ങൾ ചിരിക്കുന്നു. കിംവദന്തികൾ സൗജന്യ പിആർ ആണ്, സൗജന്യ കാര്യങ്ങൾ എനിക്ക് ഇഷ്ടമാണ്!- എന്നാണ് മൃണാൾ ഠാക്കൂർ ഷോർട്ട് വീഡിയോയിൽ പറയുന്നത്.
നർമത്തിൽ പൊതിഞ്ഞുള്ള വിഡിയോയിൽ, മൃണാലിന്റെ പുറകിൽ അമ്മ ഇരിക്കുന്നതും ഇരുവരും ചിരിക്കുന്നതും കാണാം. ഇതോടെ ഈ അഭ്യൂഹങ്ങൾക്ക് അന്ത്യമായിരിക്കുകയാണ്. മൃണാലും ശ്രേയസ് അയ്യരും തമ്മിൽ ഡേറ്റിംഗിലാണെന്ന് അവകാശപ്പെട്ട് ഒട്ടേറെ പോസ്റ്റുകളാണ് കഴിഞ്ഞ കുറച്ച് ആഴ്ചകളായി സൈബർ ലോകത്ത് കറങ്ങുന്നത്. ഇരുവരും ഒന്നിച്ചു സമയം ചെലവഴിച്ചെന്ന് അവകാശപ്പെട്ടുള്ള പോസ്റ്റ് റെഡിറ്റിലാണ് ആദ്യം പ്രത്യക്ഷപ്പെട്ടത്. പിന്നീട് ഇതിനെ ചുറ്റിപ്പറ്റി ചർച്ചകൾ നടക്കുകയായിരുന്നു.
ഇതോടെയാണ് മൃണാൽ തന്നെ അഭ്യൂഹങ്ങൾ തള്ളി രംഗത്തെത്തിയത്. എന്നാൽ, ശ്രേയസ് അയ്യർ ഇതുവരെ ഇക്കാര്യത്തിൽ പ്രതികരിച്ചിട്ടില്ല. ഏതാനും നാൾ മുന്പ് ഇതുപോലെ തമിഴ് നടൻ ധനുഷുമായി മൃണാൾ ഠാക്കൂർ പ്രണയത്തിലാണെന്ന തരത്തിലുള്ള വാർത്തകൾ പ്രചരിച്ചിരുന്നു. ഇരുവരും ഒന്നിച്ച് ഒരു സിനിമയുടെ പ്രമോഷനും ഒരു പൊതുചടങ്ങിലും പങ്കെടുത്തതോടെയാണ് അഭ്യൂഹങ്ങൾക്കു തുടക്കമായത്. ഇരുവരും അടുത്തിടപഴകുന്നതിന്റെ ചിത്രങ്ങളും പുറത്തുവന്നിരുന്നു. ഇതോടെയാണ് അഭ്യൂഹങ്ങൾ ശക്തമായത്. പിന്നീട്, ഈ ഗോസിപ്പ് ആവിയായി.
