സോഷ്യൽ മീഡിയയിൽ തരംഗമായ 80കളിലെ എഐ ട്രെൻഡിനിടെ എഐ സഹായമില്ലാതെ തന്റെ യഥാർഥ ചിത്രം പങ്കുവച്ച് കോൺഗ്രസ് എം.പി ശശി തരൂർ. ഇരട്ടക്കുട്ടികളായ ഇഷാൻ തരൂർ, കനിഷ്ക് തരൂർ എന്നിവർക്കൊപ്പമുള്ള തന്റെ പഴയ ചിത്രമാണ് അദ്ദേഹം പങ്കുവെച്ചത്. എന്നാൽ ഈ ചിത്രത്തിനൊപ്പം 12 വർഷം മുമ്പ് നൽകിയ ക്യാപ്ഷനിലെ തെറ്റ് തിരുത്താനും അദ്ദേഹം മറന്നില്ല.
2014ൽ ഈ ചിത്രം ആദ്യമായി പങ്കുവെച്ചപ്പോൾ, “വർഷങ്ങൾക്ക് മുമ്പ് ന്യൂയോർക്കിൽ വെച്ച് മക്കൾക്കൊപ്പം എടുത്ത പഴയ ചിത്രം” എന്നായിരുന്നു തരൂർ കുറിച്ചിരുന്നത്.
എന്നാൽ കഴിഞ്ഞ ദിവസം ചിത്രം വീണ്ടും പങ്കുവെച്ചുകൊണ്ട് അദ്ദേഹം ആ തെറ്റ് തിരുത്തി: “ഇതും എൺപതുകളിലെ ഞാൻ തന്നെയാണ് -പഴയ ക്യാപ്ഷനിൽ തെറ്റായി നൽകിയത് പോലെ ന്യൂയോർക്കിൽ വെച്ചല്ല, ജനീവയിൽ വെച്ചെടുത്ത ചിത്രമാണിത്!”
എഐ ചിത്രങ്ങൾക്ക് പകരം താൻ യഥാർത്ഥ 80കളിലെ ഫോട്ടോകൾ പങ്കുവെച്ച് ട്രെൻഡിന്റെ ഭാഗമാകുന്നുവെന്ന് അദ്ദേഹം വ്യക്തമാക്കി. 2014ൽ ന്യൂയോർക്ക് എന്ന് തെറ്റായി നൽകിയ ലൊക്കേഷൻ ജനീവ എന്നാക്കി തരൂർ തിരുത്തി.
ചാറ്റ് ജിപിടിയും മറ്റ് എഐ ടൂളുകളും ഉപയോഗിച്ച് എൺപതുകളിലെ ഫാഷനിലും ലുക്കിലും ചിത്രങ്ങൾ ഉണ്ടാക്കുന്ന ട്രെൻഡ് ഇപ്പോൾ സോഷ്യൽ മീഡിയയിൽ വൻ ഹിറ്റാണ്.
എഐ നിർമിത ചിത്രങ്ങൾക്ക് പകരം യഥാർഥ ഓർമ്മകൾ പങ്കുവെച്ച തരൂരിന്റെ പോസ്റ്റിന് മികച്ച പിന്തുണയാണ് സോഷ്യൽ മീഡിയയിൽ ലഭിക്കുന്നത്.
