ഓഫീസിലിരുന്ന് ക്രിക്കറ്റ് കളി കാണാൻ ഇതിലും മികച്ച സ്ഥലം വേറെയില്ലെന്ന് കരുതിയ രണ്ട് ജീവനക്കാർക്ക് കിട്ടിയത് വലിയ പണി! സ്റ്റേഡിയത്തിന് അഭിമുഖമായുള്ള ഓഫീസിൽ ജോലിക്കിടെ കളി ആസ്വദിച്ച ഇവർ സ്റ്റേഡിയത്തിലെ ബിഗ് സ്ക്രീനിൽ പ്രത്യക്ഷപ്പെട്ടതോടെ പെട്ടെന്ന് ജോലി ചെയ്യുന്നതുപോലെ കാണിക്കുന്ന രസകരമായ ദൃശ്യങ്ങൾ ഇപ്പോൾ സമൂഹമാധ്യമങ്ങളിൽ വൈറലായിരിക്കുകയാണ്.
കേപ്ടൗണിലെ ന്യൂലാൻഡ്സ് ക്രിക്കറ്റ് ഗ്രൗണ്ടിൽ ദക്ഷിണാഫ്രിക്കയും ഓസ്ട്രേലിയയും തമ്മിലുള്ള ടെസ്റ്റ് മത്സരത്തിനിടയിലാണ് സംഭവം. സ്റ്റേഡിയത്തിന് തൊട്ടടുത്തുള്ള കെട്ടിടത്തിലെ ഓഫീസിലിരുന്ന് ജോലി ചെയ്യുന്നതിനിടയിൽ ഇവർ കളി ശ്രദ്ധിക്കുകയായിരുന്നു. ഇതിനിടയിലാണ് ബ്രോഡ്കാസ്റ്റ് ക്യാമറകളുടെ ശ്രദ്ധയിൽ ഇവർ പെട്ടത്.
സ്റ്റേഡിയത്തിലെ കൂറ്റൻ സ്ക്രീനിൽ തങ്ങളെ തന്നെയല്ലേ ലൈവായി കാണുന്നത് എന്ന് മനസ്സിലായതോടെ ജീവനക്കാരുടെ ഭാവം പെട്ടെന്ന് മാറി. തൊട്ടുമുമ്പ് വരെ കളി ആസ്വദിച്ചുകൊണ്ടിരുന്ന ഇവർ, ഞൊടിയിടയിൽ തങ്ങളുടെ കമ്പ്യൂട്ടർ സ്ക്രീനിലേക്ക് തിരിഞ്ഞ് ജോലിയെടുക്കുകയാണെന്ന് നടിക്കാൻ തുടങ്ങി!
ഇവരുടെ ഈ പെട്ടെന്നുള്ള നാടകം കണ്ട് കമന്‍റേറ്റർക്കും ചിരിയടക്കാൻ കഴിഞ്ഞില്ല. സ്ക്രീനിൽ ഇത് കണ്ട ഉടൻ തന്നെ അദ്ദേഹം “സോറി ബോയ്സ്” എന്ന് പറഞ്ഞ് ചിരിയോടെ അവരെ പരിഹസിക്കുകയും ചെയ്തു. ലക്ഷക്കണക്കിന് കാണികൾക്ക് മുന്നിലാണ് തങ്ങൾ പെട്ടുപോയതെന്ന് അറിയാതെ ഇവർ നടത്തിയ ഈ ‘അഭിനയം’ ഇപ്പോൾ ഇന്‍റർനെറ്റിൽ ചിരി പടർത്തുകയാണ്. ഓഫീസിൽ രഹസ്യമായി കളി കാണുന്ന സമാനമായ അനുഭവങ്ങളുള്ള നിരവധി പേരാണ് ഈ വീഡിയോയ്ക്ക് രസകരമായ കമന്‍റികളുമായി രംഗത്തെത്തിയിരിക്കുന്നത്.
