നീണ്ട പത്തുമാസത്തെ നിരന്തര ശ്രമങ്ങൾക്കൊടുവിലും ജോലി കണ്ടെത്താനാകാതെ വിഷമിച്ച ഭാര്യക്ക് താങ്ങായി ഒരു ഭർത്താവ് നിർമിച്ച എഐ ആപ്പ് ഇപ്പോൾ സോഷ്യൽ മീഡിയയിൽ തരംഗമാകുന്നു. ഭാര്യക്കായി താൻ വികസിപ്പിച്ചെടുത്ത ‘ഡൊസിയർ’ എന്ന എഐ ടൂൾ ഉപയോഗിച്ച് അവർക്ക് ജോലി ലഭിച്ചതോടെ, സമാന സാഹചര്യങ്ങളിലൂടെ കടന്നുപോകുന്ന മറ്റുള്ളവർക്കായി ഇത് സൗജന്യമായി ലഭ്യമാക്കിയിരിക്കുകയാണ് ഈ സോഫ്റ്റ്‌വെയർ എഞ്ചിനീയർ.
റെഡ്ഡിറ്റിലെ ഒരു കമ്മ്യൂണിറ്റിയിലാണ് അദ്ദേഹം തന്‍റെ സന്തോഷം പങ്കുവെച്ചത്. ജൂനിയർ സോഫ്റ്റ്‌വെയർ എഞ്ചിനീയറായ ഭാര്യ ഓരോ കമ്പനിയിലെയും ഒഴിവുകൾക്കനുസരിച്ച് റസ്യൂമെയിൽ മണിക്കൂറുകളോളം മാറ്റങ്ങൾ വരുത്തി തയാറാക്കുന്നത് കണ്ടാണ് ഇത്തരമൊരു ആശയം മനസിൽ ഉദിച്ചതെന്ന് അദ്ദേഹം കുറിച്ചു.
ലിങ്ക്ഡ്ഇൻ, ഇൻഡീഡ്, അഡ്സുന തുടങ്ങിയ ജോബ് പോർട്ടലുകളിൽ നിന്നുള്ള ഒഴിവുകൾ കണ്ടെത്തി നൽകാൻ ഈ ആപ്പിന് സാധിക്കും. ഉദ്യോഗാർഥി നൽകുന്ന വിവരങ്ങൾ മാത്രം അടിസ്ഥാനമാക്കി കമ്പനികളുടെ ആവശ്യാനുസരണം റസ്യൂമെ, കവർ ലെറ്റർ, ആപ്ലിക്കേഷൻ ഇമെയിലുകൾ എന്നിവ എഐ സാങ്കേതികവിദ്യയിലൂടെ സ്വയം തയാറാക്കി നൽകുന്നതാണ് ഇതിന്‍റെ പ്രധാന പ്രത്യേകത.
വാർത്ത പുറത്തുവന്നതോടെ നിരവധി പേരാണ് ദമ്പതികൾക്ക് ആശംസകളുമായി രംഗത്തെത്തിയത്. ജോലി അന്വേഷിച്ച് മടുത്ത ലക്ഷക്കണക്കിന് ഉദ്യോഗാർഥികൾക്ക് ഈ എഐ ടൂൾ വലിയൊരു ആശ്വാസമാകുമെന്നാണ് വിലയിരുത്തൽ.
