ഇന്ത്യയിലെ യാത്രയ്ക്കായി വാങ്ങിയ പ്രിയപ്പെട്ട ഓട്ടോറിക്ഷ തിരികെ ബ്രിട്ടനിലേക്ക് ഷിപ്പ് ചെയ്ത് ബ്രിട്ടീഷ് ദമ്പതികൾ. ‘ടിമ്മി ദി ടിൻ കാൻ’ എന്ന് പേരിട്ടിരിക്കുന്ന തങ്ങളുടെ ചുവപ്പും കറുപ്പും കലർന്ന ബജാജ് ഓട്ടോറിക്ഷയാണ് ഹെലൻ, മിക്ക് എന്നീ ദമ്പതികൾ യുകെയിലേക്ക് കൊണ്ടുപോയത്. വ്യവസായി ഹർഷ് ഗോയങ്കയാണ് എക്സിലൂടെ ഈ അപൂർവ്വവും കൗതുകകരവുമായ യാത്രാകഥ പങ്കുവെച്ചത്.
തമിഴ്നാട്ടിലെ ചെന്നൈയിൽ രജിസ്റ്റർ ചെയ്ത ഈ ഓട്ടോറിക്ഷയിൽ ദമ്പതികൾ 75 ദിവസങ്ങൾ കൊണ്ട് താജ്മഹൽ ഉൾപ്പെടെയുള്ള സ്ഥലങ്ങൾ സന്ദർശിച്ച് 4,218 കിലോമീറ്ററോളം ഇന്ത്യയിലൂടെ സഞ്ചരിച്ചിരുന്നു. മുൻഭാഗത്ത് കാർട്ടൂൺ കണ്ണുകളും പുഞ്ചിരിയും വരച്ച് പ്രത്യേക രീതിയിൽ ഡിസൈൻ ചെയ്ത ഓട്ടോറിക്ഷയെ യാത്രയ്‌ക്കൊടുവിൽ ഉപേക്ഷിച്ചുപോരാൻ തോന്നാത്തതിനാലാണ് യുകെയിലേക്ക് അയക്കാൻ ദമ്പതികൾ തീരുമാനിച്ചത്.
ഇന്ത്യയിലെ റോഡ് യാത്രകൾക്കും കടൽമാർഗ്ഗമുള്ള നീണ്ട യാത്രയ്ക്കും ശേഷം 2026 ഒക്ടോബർ 23നാണ് ലണ്ടൻ ഗേറ്റ്‌വേ പോർട്ടിൽ ഓട്ടോറിക്ഷ എത്തിച്ചേർന്നത്. ബ്രിട്ടനിലെ എത്തിച്ചേർന്നുവെങ്കിലും അവിടെ വാഹന നിയന്ത്രണ നിയമങ്ങൾ പാലിക്കുന്നതിനും റോഡിൽ നിയമപരമായി ഓടിക്കുന്നതിനുമുള്ള പേപ്പർവർക്കുകൾ പൂർത്തിയാക്കേണ്ടതുണ്ട്.
“ഇന്ത്യൻ റോഡുകളിൽ നിന്ന് ബ്രിട്ടീഷ് തെരുവുകളിലേക്ക്, എന്ത് അപാരമായ യാത്ര!” എന്ന കുറിപ്പോടെ ഹർഷ് ഗോയങ്ക പങ്കുവെച്ച വീഡിയോ സോഷ്യൽ മീഡിയയിൽ തരംഗമായി മാറി. ഇന്ത്യൻ യാത്രയുടെ സ്മരണികയായി ഫ്രിഡ്ജ് മാഗ്നറ്റുകൾക്കും പോസ്റ്റ് കാർഡുകൾക്കും പകരം ഒരു മുഴുവൻ ഓട്ടോറിക്ഷ തന്നെ സ്വന്തം നാട്ടിലേക്ക് എത്തിച്ച ഇവരുടെ യാത്ര സോഷ്യൽ മീഡിയയിൽ വലിയ ശ്രദ്ധ നേടുകയാണ്.
