തണുത്തുറഞ്ഞ മലനിരകളിൽ ഒരു പ്ലേറ്റ് ചൂടുള്ള മാഗിയും ഒരു കപ്പ് ചായയും വിറ്റ് ദിവസവും 14,000 മുതൽ 15,000 രൂപ വരെ വിറ്റുവരവ് നേടുന്ന കച്ചവടക്കാരന്‍റെ വിവരങ്ങൾ വൈറലാകുന്നു. ഹിമാചൽ പ്രദേശിലെ പ്രശസ്തമായ റോഹ്താങ് പാസിലെ ഒരു തട്ടുകടക്കാരനാണ് ടൂറിസ്റ്റുകൾ കുറവുള്ള ‘ഓഫ് സീസണിൽ’ പോലും ഈ നേട്ടം കൊയ്യുന്നത്.
ഹർഷ് ചൗഹാൻ എന്ന കണ്ടന്‍റ് ക്രിയേറ്റർ ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെയാണ് ഈ വിവരങ്ങൾ പുറത്തുവന്നത്. സീസണല്ലാത്ത സമയത്തെ വരുമാനത്തെക്കുറിച്ച് ചോദിച്ചപ്പോഴാണ് കച്ചവടക്കാരൻ തന്‍റെ പ്രതിദിന വിൽപ്പന കണക്കുകൾ വെളിപ്പെടുത്തിയത്.
100 രൂപ നിരക്കിൽ ദിവസവും 60-70 പ്ലേറ്റ് മാഗി ഇവിടെ വിറ്റഴിയുന്നു (വരുമാനം: ₹6,000 – ₹7,000). കൂടാതെ 40 രൂപ നിരക്കിൽ 200 കപ്പ് ചായയും (വരുമാനം: ₹8,000) മുട്ട വിഭവങ്ങളും ദിവസേന വിൽക്കുന്നുണ്ട്. “ഒരു ബിസിനസ്സും ചെറുതല്ല” എന്ന സന്ദേശത്തോടെയാണ് ഹർഷ് വീഡിയോ പങ്കുവെച്ചത്. എന്നാൽ 15,000 രൂപ എന്നത് വിറ്റുവരവ് മാത്രമാണെന്നും, ഹിമാചൽ പോലുള്ള കഠിനമായ കാലാവസ്ഥയുള്ള ഉയർന്ന മലനിരകളിൽ സാധനങ്ങൾ എത്തിക്കുന്നതിനുള്ള ചെലവുകളും അസംസ്കൃത വസ്തുക്കളുടെ വിലയും ലാഭത്തിൽ നിന്ന് കുറയ്ക്കേണ്ടതുണ്ടെന്നും ഉപയോക്താക്കൾ ചൂണ്ടിക്കാട്ടി.
തണുപ്പുള്ള മലനിരകളിൽ യാത്ര ചെയ്യുന്ന സഞ്ചാരികൾക്ക് ചൂടുള്ള മാഗിയും ചായയും വലിയ ആശ്വാസമാണ് നൽകുന്നത്. ടൂറിസ്റ്റ് തിരക്ക് കുറവുള്ള സമയത്തെ ബിസിനസ്സ് ഇതാണെങ്കിൽ, തിരക്കുള്ള സീസണിൽ ഇവിടുത്തെ വരുമാനം എത്രയായിരിക്കും എന്ന അത്ഭുതത്തിലാണ് സോഷ്യൽ മീഡിയ.
