ഗുജറാത്തിലെ ഗിർ ഈസ്റ്റ് ഫോറസ്റ്റ് ഡിവിഷന്‍റെ പരിധിയിലുള്ള പാർക്കിൽ സിംഹത്തെ പിന്തുടരുന്ന വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്. ബൈക്കുകളിൽ ഉണ്ടായിരുന്നത് വനംവകുപ്പ് ജീവനക്കാരാണെന്നാണ് ഉയരുന്ന ആരോപണം. ബൈക്കുകളിലും ബൊലേറോ വാഹനത്തിലുമായി ഒരു സിംഹത്തെ പിന്തുടരുന്ന ദൃശ്യങ്ങളാണ് ഇത്.
സഫാരി പാർക്കിനുള്ളിലേക്ക് സ്വകാര്യ വാഹനങ്ങൾക്ക് പ്രവേശനമില്ലെന്നിരിക്കെയാണ് ഈ ദൃശ്യങ്ങൾ പുറത്തുവന്നിരിക്കുന്നത്. വന്യജീവികളെ സംരക്ഷിക്കേണ്ട ഉദ്യോഗസ്ഥർ തന്നെ ഇത്തരമൊരു പ്രവൃത്തിയിൽ ഏർപ്പെട്ടത് എന്തിനെന്ന ചോദ്യമാണ് ഇപ്പോൾ ശക്തമാകുന്നത്.
സിംഹത്തെ ഇത്രയടുത്ത് വാഹനങ്ങളിൽ പിന്തുടരുന്നത് മൃഗത്തിന് കടുത്ത സമ്മർദമുണ്ടാക്കാനും പ്രകോപനപരമായ സാഹചര്യം സൃഷ്ടിക്കാനും ഇടയാക്കുമെന്നാണ് വന്യജീവി സ്നേഹികളുടെ ആശങ്ക. ഇത് സഫാരി പാർക്കിലെ സന്ദർശകരുടെ സുരക്ഷയ്ക്കും ഭീഷണിയാകാം.
സംഭവം വിവാദമായതോടെ പ്രിൻസിപ്പൽ ചീഫ് കൺസർവേറ്റർ ഓഫ് ഫോറസ്റ്റ് (PCCF) ജയ്പാൽസിങ് റാത്തോഡ് അന്വേഷണത്തിന് ഉത്തരവിട്ടു. വീഡിയോ പഴയതാണെന്ന് അദ്ദേഹം വ്യക്തമാക്കിയെങ്കിലും ദൃശ്യങ്ങളിൽ വനംവകുപ്പിലെ ഗാർഡുമാരെയും ട്രാക്കർമാരെയും കാണുന്ന സാഹചര്യത്തിൽ അന്വേഷണം അനിവാര്യമാണെന്ന് അറിയിച്ചു.
