കരുമാലൂർ: ആലുവ-തടിയ്ക്കക്കടവ് റോഡിൽ മില്ലുപടിക്കു സമീപം പാടത്ത് ഉപേക്ഷിച്ച നിലയിൽ മനുഷ്യന്‍റെ അസ്ഥികൂടം കണ്ടെത്തിയ കേസിൽ ഫോറൻസിക് വിദഗ്ധർ പരിശോധന നടത്തും.
ഇന്നലെ രാത്രി ഏഴോടെയാണ് അസ്ഥികൂടം കണ്ടെത്തിയത്. സമീപവാസിയായ വ്യക്തി കാർഡ് ബോർഡ് പെട്ടി പാടത്ത് കിടക്കുന്നത് കണ്ട് പരിശോധിച്ചപ്പോഴാണ് അസ്ഥികൂടം കണ്ടത്.
ഉടൻ തന്നെ ആലങ്ങാട് വെസ്റ്റ് പോലീസ് സറ്റേഷനിൽ വിവരമറിക്കുകയായിരുന്നു. രണ്ടര അടിയോളം വലിപ്പമുള്ള കാർഡ് ബോർഡ് പെട്ടിയാലാക്കി തള്ളിയ നിലയിലാണ് അസ്ഥികൂടം കണ്ടെത്തിയത്.
തലയോട്ടിയും മറ്റു അനുബന്ധ അസ്ഥികളുമാണ് പാടത്തുനിന്നും കണ്ടെത്തിയത്. പോലീസെത്തി പരിശോധന നടത്തി. മെഡിക്കൽ വിദ്യാർഥികൾ പഠിക്കാൻ ഉപയോഗിക്കുന്ന തലയോട്ടിയും അനുബന്ധ അസ്ഥികളുമാണെന്നാണ് പോലീസിന്‍റെ നിഗമനം.
അസ്ഥിയുടെ ഭാഗത്ത് മാർക്കർ കൊണ്ട് രേഖപ്പെടുത്തിയിട്ടുണ്ടെന്നും പോലീസ് പറയുന്നു.
