പലരുടെയും ഭക്ഷണശീലങ്ങള്‍ പല തരത്തിലുള്ളതാണ്. ചിലര്‍ മാംസാഹാരികളാണെങ്കില്‍ മറ്റുചിലര്‍ സസ്യാഹാരികളാണ്. എങ്കിലും കൂടുതല്‍ ആളുകളും ഇഷ്ടപ്പെടുന്നത് നോണ്‍ വെജിറ്റേറിയന്‍ ഭക്ഷണമാണെന്നതാണ് പരമാര്‍ത്ഥം.
എന്നാല്‍ ജന്മനാ വെജിറ്റേറിയനായ ചിലര്‍ പിന്നീട് നോണ്‍ വെജ് ഭക്ഷണത്തിലേക്ക് മാറുന്നതും നോണ്‍വെജായ ചിലര്‍ വെജിറ്റേറിയന്‍ ആഹാരരീതി സ്വീകരിക്കുന്നതും നാം ശ്രദ്ധിക്കാറുണ്ട്.
കാലാവസ്ഥയും ആരോഗ്യവുമൊക്കെ കണക്കിലെടുത്താവും ഇത്തരം മാറ്റങ്ങള്‍. ഇപ്പോഴിതാ ബോളിവുഡ് താരം ഭൂമി പട്‌നേക്കര്‍ പൂര്‍ണമായും വെജിറ്റേറിയനാവുകയാണെന്ന് പറഞ്ഞിരിക്കുകയാണ്.
വര്‍ഷങ്ങളായി താന്‍ വെജിറ്റേറിയന്‍ ആകണമെന്ന് ആഗ്രഹിക്കുകയായിരുന്നുവെന്നും പക്ഷേ തന്റെ ശീലങ്ങള്‍ കാരണം അവ സാധ്യമായിരുന്നില്ലെന്നും ഭൂമി പറയുന്നു.
മറ്റു ജീവികളോട് കൂടുതല്‍ അനുകമ്പയുണ്ടാവാന്‍ ശീലിച്ചു. അങ്ങനെയിരിക്കുമ്പോള്‍ മാംസം കഴിക്കുന്നത് ഒരിക്കലും നല്ല അനുഭവം നല്‍കില്ല. ഭൂമി പറയുന്നു.
ലോക്ഡൗണ്‍ കാലത്താണ് താന്‍ ഈ തീരുമാനമെടുത്തതെന്നും ഒരു ദിവസം, താന്‍ മാംസാഹാരങ്ങള്‍ പാടേ ഉപേക്ഷിക്കുകയാണെന്ന് വീട്ടില്‍ പറയുകയായിരുന്നുവെന്നും ഭൂമി പറയുന്നു.
ഇപ്പോള്‍ താന്‍ മാംസാഹാരം ഉപേക്ഷിച്ചിട്ട് മാസങ്ങളായി, ഇപ്പോള്‍ തനിക്ക് സന്തോഷമുണ്ടെന്നും കുറ്റബോധം ഇല്ലെന്നും ആരോഗ്യപരമായി കരുത്തയായെന്നും ഭൂമി പറയുന്നു.
സെലിബ്രിറ്റികള്‍ ഉള്‍പ്പെടെ നിരവധി പേരാണ് ഭൂമിയുടെ തീരുമാനത്തെ അഭിനന്ദിച്ച് കമന്റ് ചെയ്തിരിക്കുന്നത്.
ഭൂമിയുടെ ഇന്‍സ്റ്റഗ്രാം പോസ്റ്റ് പങ്കുവച്ച് വെജിറ്റേറിയന്‍ ക്ലബിലേക്കു സ്വാഗതം എന്നു പറഞ്ഞാണ് നടി അനുഷ്‌ക ശര്‍മയും ശ്രദ്ധാ കപൂറും പ്രതികരിച്ചിരിക്കുന്നത്. ബോളിവുഡ് നടിമാരില്‍ നിരവധി പേര്‍ വെജിറ്റേറിയന്‍ ഭക്ഷണശീലം പിന്തുടരുന്നവരാണ്.
